໑໑. ປໂຣສຕວຄ຺ໂຄ

໑໐໑. ປໂຣສຕໍ ເຈປິ ສມາຄຕານໍ, ຌາເຍຍ຺ຍຸໍ ເຕ ວສ຺ສສຕໍ ອປຎ຺ຎາ;

ເອໂກວ ເສຍ຺ໂຍ ປຸຣິໂສ ສປຎ຺ໂຎ, ໂຍ ຠາສິຕສ຺ສ ວິຊານາຕິ ອຕ຺ຖນ຺ຕິ.

ປໂຣສຕຊາຕກໍ ປຐມໍ.

໑໐໒. ໂຍ ທຸກ຺ຂຜຸຏ຺ຐາຍ ຠເວຍ຺ຍ ຕາຓໍ, ໂສ ເມ ປິຕາ ທຸພ຺ຠິ [ທູຠິ (ສີ. ປີ.)] ວເນ ກໂຣຕິ;

ສາ ກສ຺ສ ກນ຺ທາມິ ວນສ຺ສ ມຊ຺ເຌ, ໂຍ ຕາຍິຕາ ໂສ ສຫສໍ [ສຫສາ (ສີ. ສ຺ຍາ. ປີ.)] ກໂຣຕີຕິ.

ປຓ຺ຓິກຊາຕກໍ ທຸຕິຍໍ.

໑໐໓. ຍຕ຺ຖ ເວຣີ ນິວິສຕິ [ນິວສຕິ (ສີ. ກ.)], ນ ວເສ ຕຕ຺ຖ ປຓ຺ຑິໂຕ;

ເອກຣຕ຺ຕໍ ທິຣຕ຺ຕໍ ວາ, ທຸກ຺ຂໍ ວສຕິ ເວຣິສູຕິ.

ເວຣິຊາຕກໍ ຕຕິຍໍ.

໑໐໔. ຈຕຸພ຺ຠິ ອຏ຺ຐຊ຺ຌຄມາ, ອຏ຺ຐາຫິປິ ຈ ໂສຬສ;

ໂສຬສາຫິ ຈ ພາຕ຺ຕິໍສ [ພຕ຺ຕິໍສ (ສີ. ສ຺ຍາ. ປີ.)], ອຕ຺ຣິຈ຺ຉໍ ຈກ຺ກມາສໂທ;

ອິຈ຺ຉາຫຕສ຺ສ ໂປສສ຺ສ, ຈກ຺ກໍ ຠມຕິ ມຕ຺ຖເກຕິ.

ມິຕ຺ຕວິນ຺ທກຊາຕກໍ ຈຕຸຕ຺ຖໍ.

໑໐໕. ພຫຸມ຺ເປຕໍ ວເນ ກຏ຺ຐໍ, ວາໂຕ ຠຎ຺ຊຕິ ທຸພ຺ພລໍ;

ຕສ຺ສ ເຈ ຠາຍສີ ນາຄ, ກິໂສ ນູນ ຠວິສ຺ສສີຕິ.

ທຸພ຺ພລກຏ຺ຐຊາຕກໍ ປຎ຺ຈມໍ.

໑໐໖. ສຸຂໍ ວຕ ມໍ ຊີວນ຺ຕໍ [ສຸຂກໍ ວຕ ຊີວໍ (ກ.)], ປຈມານາ ອຸທຎ຺ຈນີ;

ໂຈຣີ ຊາຍປ຺ປວາເທນ, ເຕລໍ ໂລຓຎ຺ຈ ຍາຈຕີຕິ.

ອຸທຎ຺ຈນີຊາຕກໍ ຉຏ຺ຐໍ.

໑໐໗. ສາຘຸ ໂຂ ສິປ຺ປກໍ ນາມ, ອປິ ຍາທິສ ກີທິສໍ;

ປສ຺ສ ຂຎ຺ຊປ຺ປຫາເຣນ, ລທ຺ຘາ ຄາມາ ຈຕຸທ຺ທິສາຕິ.

ສາລິຕ຺ຕກຊາຕກໍ ສຕ຺ຕມໍ.

໑໐໘. ສິກ຺ເຂຍ຺ຍ ສິກ຺ຂິຕພ຺ພານິ, ສນ຺ຕິ ຕຈ຺ຉນ຺ທິໂນ [ສຈ຺ຉນ຺ທິໂນ (ສີ. ປີ.)] ຊນາ;

ພາຫິຍາ ຫິ [ປິ (ສີ. ສ຺ຍາ. ປີ.)] ສຸຫນ຺ເນນ, ຣາຊານມຠິຣາຘຍີຕິ.

ພາຫິຍຊາຕກໍ ອຏ຺ຐມໍ.

໑໐໙. ຍຖນ຺ໂນ ປຸຣິໂສ ໂຫຕິ, ຕຖນ຺ນາ ຕສ຺ສ ເທວຕາ;

ອາຫເຣຕໍ ກຸຓ຺ຑປູວໍ [ກຓໍ ປູວໍ (ສີ. ປີ.)], ມາ ເມ ຠາຄໍ ວິນາສຍາຕິ.

ກຸຓ຺ຑປູວຊາຕກໍ ນວມໍ.

໑໑໐. ສພ຺ພສໍຫາຣໂກ [ສພ຺ພສາຫາຣໂກ (ກ.)] ນຕ຺ຖິ, ສຸທ຺ຘໍ ກງ຺ຄຸ ປວາຍຕິ;

ອລິກໍ ຠາຍຕິຍໍ ຘຸຕ຺ຕີ, ສຈ຺ຈມາຫ ມຫລ຺ລິກາຕິ.

ສພ຺ພສໍຫາຣກປຎ຺ຫຊາຕກໍ ທສມໍ.

ປໂຣສຕວຄ຺ໂຄ ເອກາທສໂມ.

ຕສ຺ສຸທ຺ທານໍ –

ສປໂຣສຕ ຕາຍິຕ ເວຣີ ປຸນ, ຠມຈກ຺ກຖ ນາຄສິຣິວ຺ຫຍໂນ;

ສຸຂກຎ຺ຈ ວຕ ສິປ຺ປກ ພາຫິຍາ, ກຸຓ຺ຑປູວ ມຫລ຺ລິກກາ ຈ ທສາຕິ.