໑໒. ຫໍຈິວຄ຺ໂຄ

໑໑໑. ຫໍຈິ [ຫໍສິ (ສີ. ສ຺ຍາ.), ຫຎ຺ຈິ (?)] ຕຸວໍ ເອວມຎ຺ຎສິ ເສຍ຺ໂຍ, ປຸຕ຺ເຕນ ປິຕາຕິ ຣາຊເສຏ຺ຐ;

ຫນ຺ທສ຺ສຕຣສ຺ສ ເຕ ອຍໍ, ອສ຺ສຕຣສ຺ສ ຫິ ຄທ຺ຣໂຠ ປິຕາຕິ.

ຄທ຺ຣຠປຎ຺ຫຊາຕກໍ ປຐມໍ.

໑໑໒. ເຍນ ສຕ຺ຕຸພິລງ຺ຄາ ຈ, ທິຄຸຓປລາໂສ ຈ ປຸປ຺ຜິໂຕ;

ເຍນ ທທາມິ [ເຍນາ’ທາມິ (ສີ. ສ຺ຍາ.)] ເຕນ ວທາມິ, ເຍນ ນ ທທາມິ [ເຍນ ນາ’ທາມິ (ສີ. ສ຺ຍາ.)] ນ ເຕນ ວທາມິ;

ເອສ ມຄ຺ໂຄ ຍວມຊ຺ຌກສ຺ສ, ເອຕໍ ຉນ຺ນປຖໍ ວິຊານາຫີຕິ.

ອມຣາເທວີປຎ຺ຫຊາຕກໍ ທຸຕິຍໍ.

໑໑໓. ສທ຺ທຫາສິ ສິງ຺ຄາລສ຺ສ [ສິຄາລສ຺ສ (ສີ. ສ຺ຍາ. ປີ.)], ສຸຣາປີຕສ຺ສ ພ຺ຣາຫ຺ມຓ;

ສິປ຺ປິການໍ ສຕໍ ນຕ຺ຖິ, ກຸໂຕ ກໍສສຕາ ທຸເວຕິ.

ສິງ຺ຄາລຊາຕກໍ ຕຕິຍໍ.

໑໑໔. ພຫຸຈິນ຺ຕີ ອປ຺ປຈິນ຺ຕີ, ອຸໂຠ ຊາເລ ອພຊ຺ຌເຣ;

ມິຕຈິນ຺ຕີ ປໂມເຈສີ, ອຸໂຠ ຕຕ຺ຖ ສມາຄຕາຕິ.

ມິຕຈິນ຺ຕິຊາຕກໍ ຈຕຸຕ຺ຖໍ.

໑໑໕. ຍາຍຎ຺ຎ [ຍາຍຎ຺ເຎ (ກ.)] ມນຸສາສຕິ, ສຍໍ ໂລລຸປ຺ປຈາຣິນີ;

ສາຍໍ ວິປກ຺ຂິກາ ເສຕິ, ຫຕາ ຈກ຺ເກນ ສາສິກາຕິ [ສາລິກາຕິ (ສີ. ສ຺ຍາ. ປີ.)].

ອນຸສາສິກຊາຕກໍ ປຎ຺ຈມໍ.

໑໑໖. ອຕິກຣມກຣາຈຣິຍ, ມຍ຺ຫມ຺ເປຕໍ ນ ຣຸຈ຺ຈຕິ;

ຈຕຸຕ຺ເຖ ລງ຺ຆຍິຕ຺ວານ, ປຎ຺ຈມາຍສິ ອາວຸໂຕຕິ.

ທຸພ຺ພຈຊາຕກໍ ຉຏ຺ຐໍ.

໑໑໗. ອຈ຺ຈຸຄ຺ຄຕາຕິລປຕາ [ອຕິພລຕາ (ສີ. ສ຺ຍາ. ປີ.), ອຕິລປກາ (ກຕ຺ຖຈິ)], ອຕິເວລໍ ປຠາສິຕາ;

ວາຈາ ຫນຕິ ທຸມ຺ເມຘໍ, ຕິຕ຺ຕິຣໍວາຕິວສ຺ສິຕນ຺ຕິ.

ຕິຕ຺ຕິຣຊາຕກໍ ສຕ຺ຕມໍ.

໑໑໘. ນາຈິນ຺ຕຍນ຺ໂຕ ປຸຣິໂສ, ວິເສສມຘິຄຈ຺ຉຕິ;

ຈິນ຺ຕິຕສ຺ສ ຜລໍ ປສ຺ສ, ມຸຕ຺ໂຕສ຺ມິ ວຘພນ຺ຘນາຕິ.

ວຏ຺ຏກຊາຕກໍ ອຏ຺ຐມໍ.

໑໑໙. ອມາຕາປິຕຣສໍວທ຺ໂຘ [ປິຕຣິ (ສີ. ປີ.), ປິຕຸ (ສ຺ຍາ.)], ອນາເຈຣກຸເລ ວສໍ;

ນາຍໍ ກາລໍ ອກາລໍ ວາ, ອຠິຊານາຕິ ກຸກ຺ກຸໂຏຕິ.

ອກາລຣາວິຊາຕກໍ ນວມໍ.

໑໒໐. ອພທ຺ຘາ ຕຕ຺ຖ ພຊ຺ຌນ຺ຕິ, ຍຕ຺ຖ ພາລາ ປຠາສເຣ;

ພທ຺ຘາປິ ຕຕ຺ຖ ມຸຈ຺ຈນ຺ຕິ, ຍຕ຺ຖ ຘີຣາ ປຠາສເຣຕິ.

ພນ຺ຘນໂມກ຺ຂຊາຕກໍ ທສມໍ.

ຫໍຈິວຄ຺ໂຄ [ຫໍສິວຄ຺ໂຄ (ສີ. ສ຺ຍາ.)] ທ຺ວາທສໂມ.

ຕສ຺ສຸທ຺ທານໍ –

ອຖ ຄທ຺ຣຠ ສຕ຺ຕຸວ ກໍສສຕໍ, ພຫຸຈິນ຺ຕິ ສາສິກາຍາຕິກຣ;

ອຕິເວລ ວິເສສມນາຈຣິໂຍວ, ຘີຣາປຠາສຣເຕນ ທສາຕິ.