໔. ກຸລາວກວຄ຺ໂຄ

໓໑. ກຸລາວກາ ມາຕລິ ສິມ຺ພລິສ຺ມິໍ, ອີສາມຸເຂນ ປຣິວຊ຺ຊຍສ຺ສຸ;

ກາມໍ ຈຊາມ ອສຸເຣສຸ ປາຓໍ, ມາ ເມ ທິຊາ ວິກ຺ກຸລວາ [ມາຍິເມ ທິຊາ ວິກຸລາວາ (ສີ. ສ຺ຍາ. ປີ.)] ອເຫສຸນ຺ຕິ.

ກຸລາວກຊາຕກໍ ປຐມໍ.

໓໒. ຣຸທໍ ມນຸຎ຺ຎໍ ຣຸຈິຣາ ຈ ປິຏ຺ຐິ, ເວຬຸຣິຍວຓ຺ຓູປນິຠາ [ວຓ຺ຓູປຏິຠາ (ສ຺ຍາ.), ວຓ຺ຓສນ຺ນິຠາ (ກ.)] ຈ ຄີວາ;

ພ຺ຍາມມຕ຺ຕານິ ຈ ເປຂຸຓານິ, ນຈ຺ເຈນ ເຕ ຘີຕຣໍ ໂນ ທທາມີຕິ.

ນຈ຺ຈຊາຕກໍ ທຸຕິຍໍ.

໓໓. ສມ຺ໂມທມານາ ຄຈ຺ຉນ຺ຕິ, ຊາລມາທາຍ ປກ຺ຂິໂນ;

ຍທາ ເຕ ວິວທິສ຺ສນ຺ຕິ, ຕທາ ເອຫິນ຺ຕິ ເມ ວສນ຺ຕິ.

ສມ຺ໂມທມານຊາຕກໍ ຕຕິຍໍ.

໓໔. ນ ມໍ ສີຕໍ ນ ມໍ ອຸຓ຺ຫໍ, ນ ມໍ ຊາລສ຺ມິ ພາຘນໍ;

ຍຎ຺ຈ ມໍ ມຎ຺ຎເຕ ມຈ຺ຉີ, ອຎ຺ຎໍ ໂສ ຣຕິຍາ ຄໂຕຕິ.

ມຈ຺ຉຊາຕກໍ ຈຕຸຕ຺ຖໍ.

໓໕. ສນ຺ຕິ ປກ຺ຂາ ອປຕນາ, ສນ຺ຕິ ປາທາ ອວຎ຺ຈນາ;

ມາຕາປິຕາ ຈ ນິກ຺ຂນ຺ຕາ, ຊາຕເວທ ປຏິກ຺ກມາຕິ.

ວຏ຺ຏກຊາຕກໍ ປຎ຺ຈມໍ.

໓໖. ຍໍ ນິສ຺ສິຕາ ຊຄຕິຣຸຫໍ ວິຫງ຺ຄມາ, ສ຺ວາຍໍ ອຄ຺ຄິໍ ປມຸຎ຺ຈຕິ;

ທິສາ ຠຊຖ ວກ຺ກງ຺ຄາ [ວງ຺ກງ຺ຄາ (ສ຺ຍາ.)], ຊາຕໍ ສຣຓໂຕ ຠຍນ຺ຕິ.

ສກຸຓຊາຕກໍ ຉຏ຺ຐໍ.

໓໗. ເຍ ວຸຑ຺ຒ [ວທ຺ຘ (ສີ. ປີ.)] ມປຈາຍນ຺ຕິ, ນຣາ ຘມ຺ມສ຺ສ ໂກວິທາ;

ທິຏ຺ເຐວ ຘມ຺ເມ ປາສໍສາ, ສມ຺ປຣາເຍ ຈ ສຸຄ຺ຄຕີຕິ.

ຕິຕ຺ຕິຣຊາຕກໍ ສຕ຺ຕມໍ.

໓໘. ນາຈ຺ຈນ຺ຕໍ ນິກຕິປ຺ປຎ຺ໂຎ, ນິກຕ຺ຍາ ສຸຂເມຘຕິ;

ອາຣາເຘຕິ ນິກຕິປ຺ປຎ຺ໂຎ [ອາຣາເຘ ນິກຕິປ຺ປຎ຺ໂຎ (ປີ.)], ພໂກ ກກ຺ກຏກາມິວາຕິ.

ພກຊາຕກໍ ອຏ຺ຐມໍ.

໓໙. ມຎ຺ເຎ ໂສວຓ຺ຓໂຍ ຣາສິ, ໂສຓ຺ຓມາລາ ຈ ນນ຺ທໂກ;

ຍຕ຺ຖ ທາໂສ ອາມຊາໂຕ, ຐິໂຕ ຖຸລ຺ລານິ [ຖູລານິ (ກ.)] ຄຊ຺ຊຕີຕິ.

ນນ຺ທຊາຕກໍ ນວມໍ.

໔໐. ກາມໍ ປຕາມິ ນິຣຍໍ, ອຸທ຺ຘໍປາໂທ ອວໍສິໂຣ;

ນານຣິຍໍ ກຣິສ຺ສາມິ, ຫນ຺ທ ປິຓ຺ຑໍ ປຏິຄ຺ຄຫາຕິ.

ຂທິຣງ຺ຄາຣຊາຕກໍ ທສມໍ.

ກຸລາວກວຄ຺ໂຄ ຈຕຸຕ຺ໂຖ.

ຕສ຺ສຸທ຺ທານໍ –

ສິຣິມາຕລິ ຘີຕຣ ປກ຺ຂິວໂຣ, ຣຕິຍາຄໂຕ ມາຕາປິຕາ ຈ ປຸນ;

ຊຄຕີຣຸຫ ວຸຑ຺ຒ ສຸກກ຺ກຏໂກ, ຕຖາ ນນ຺ທກປິຓ຺ຑວເຣນ ທສາຕິ.