໕. ອຕ຺ຖກາມວຄ຺ໂຄ

໔໑. ໂຍ ອຕ຺ຖກາມສ຺ສ ຫິຕານຸກມ຺ປິໂນ, ໂອວຊ຺ຊມາໂນ ນ ກໂຣຕິ ສາສນໍ;

ອຊິຍາ ປາທໂມລມ຺ພ [ປາທໂມລຸມ຺ພ (ສີ. ສ຺ຍາ. ປີ.)], ມິຕ຺ຕໂກ ວິຍ ໂສຈຕີຕິ.

ໂລສກຊາຕກໍ ປຐມໍ.

໔໒. ໂຍ ອຕ຺ຖກາມສ຺ສ ຫິຕານຸກມ຺ປິໂນ, ໂອວຊ຺ຊມາໂນ ນ ກໂຣຕິ ສາສນໍ;

ກໂປຕກສ຺ສ ວຈນໍ ອກຕ຺ວາ, ອມິຕ຺ຕຫຕ຺ຖຕ຺ຖຄໂຕວ ເສຕີຕິ.

ກໂປຕຊາຕກໍ ທຸຕິຍໍ.

໔໓. ໂຍ ອຕ຺ຖກາມສ຺ສ ຫິຕານຸກມ຺ປິໂນ, ໂອວຊ຺ຊມາໂນ ນ ກໂຣຕິ ສາສນໍ;

ເອວໍ ໂສ ນິຫໂຕ ເສຕິ, ເວຬຸກສ຺ສ ຍຖາ ປິຕາຕິ.

ເວຬຸກຊາຕກໍ ຕຕິຍໍ.

໔໔. ເສຍ຺ໂຍ ອມິຕ຺ໂຕ ມຕິຍາ ອຸເປໂຕ, ນ ຕ຺ເວວ ມິຕ຺ໂຕ ມຕິວິປ຺ປຫີໂນ;

ມກສໍ ວຘິສ຺ສນ຺ຕິ ຫິ ເອຬມູໂຄ, ປຸຕ຺ໂຕ ປິຕຸ ອພ຺ຠິທາ ອຸຕ຺ຕມງ຺ຄນ຺ຕິ.

ມກສຊາຕກໍ ຈຕຸຕ຺ຖໍ.

໔໕. ເສຍ຺ໂຍ ອມິຕ຺ໂຕ ເມຘາວີ, ຍຎ຺ເຈ ພາລານຸກມ຺ປໂກ;

ປສ຺ສ ໂຣຫິຓິກໍ ຊມ຺ມິໍ, ມາຕຣໍ ຫນ຺ຕ຺ວານ ໂສຈຕີຕິ.

ໂຣຫິຓິຊາຕກໍ ປຎ຺ຈມໍ.

໔໖. ນ ເວ ອນຕ຺ຖກຸສເລນ, ອຕ຺ຖຈຣິຍາ ສຸຂາວຫາ;

ຫາເປຕິ ອຕ຺ຖໍ ທຸມ຺ເມໂຘ, ກປິ ອາຣາມິໂກ ຍຖາຕິ.

ອາຣາມທູສກຊາຕກໍ ຉຏ຺ຐໍ.

໔໗. ນ ເວ ອນຕ຺ຖກຸສເລນ, ອຕ຺ຖຈຣິຍາ ສຸຂາວຫາ;

ຫາເປຕິ ອຕ຺ຖໍ ທຸມ຺ເມໂຘ, ໂກຓ຺ຑຎ຺ໂຎ ວາຣຸຓິໍ ຍຖາຕິ.

ວາຣຸຓິທູສກຊາຕກໍ ສຕ຺ຕມໍ.

໔໘. ອນຸປາເຍນ ໂຍ ອຕ຺ຖໍ, ອິຈ຺ຉຕິ ໂສ ວິຫຎ຺ຎຕິ;

ເຈຕາ ຫນິໍສຸ ເວທພ຺ພໍ [ເວທພ຺ຠໍ (ສີ. ປີ.)], ສພ຺ເພ ເຕ ພ຺ຍສນມຊ຺ຌຄູຕິ.

ເວທພ຺ພ [ເວທພ຺ຠ (ສີ. ປີ.)] ຊາຕກໍ ອຏ຺ຐມໍ.

໔໙. ນກ຺ຂຕ຺ຕໍ ປຏິມາເນນ຺ຕໍ, ອຕ຺ໂຖ ພາລໍ ອຸປຈ຺ຈຄາ;

ອຕ຺ໂຖ ອຕ຺ຖສ຺ສ ນກ຺ຂຕ຺ຕໍ, ກິໍ ກຣິສ຺ສນ຺ຕິ ຕາຣກາຕິ.

ນກ຺ຂຕ຺ຕຊາຕກໍ ນວມໍ.

໕໐. ທຸມ຺ເມຘານໍ ສຫສ຺ເສນ, ຍຎ຺ໂຎ ເມ ອຸປຍາຈິໂຕ;

ອິທານິ ໂຂຫໍ ຍຊິສ຺ສາມິ, ພຫຸ [ພຫູ (ສີ. ປີ.), ພຫຸໍ (ກ.)] ອຘມ຺ມິໂກ ຊໂນຕິ.

ທຸມ຺ເມຘຊາຕກໍ ທສມໍ.

ອຕ຺ຖກາມວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ອຖ ມິຕ຺ຕກ ມາຕຸ ກໂປຕວໂຣ, ຕຖາ ເວຬູກ ເອຬມູໂຄ ໂຣຫິຓີ;

ກປິ ວາຣຸຓິ ເຈຕຈຣາ ຈ ປຸນ, ຕຖາ ຕາຣກ ຍຎ຺ຎວເຣນ ທສາຕິ.

ປຐໂມ ປຓ຺ຓາສໂກ.