໕. ສີລສມ຺ປນ຺ນສຸຕ຺ຕໍ

໑໐໔. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເຍ ເຕ, ຠິກ຺ຂເວ, ຠິກ຺ຂູ ສີລສມ຺ປນ຺ນາ ສມາຘິສມ຺ປນ຺ນາ ປຎ຺ຎາສມ຺ປນ຺ນາ ວິມຸຕ຺ຕິສມ຺ປນ຺ນາ ວິມຸຕ຺ຕິຎາຓທສ຺ສນສມ຺ປນ຺ນາ ໂອວາທກາ ວິຎ຺ຎາປກາ ສນ຺ທສ຺ສກາ ສມາທປກາ ສມຸຕ຺ເຕຊກາ ສມ຺ປຫໍສກາ ອລໍສມກ຺ຂາຕາໂຣ ສທ຺ຘມ຺ມສ຺ສ ທສ຺ສນມ຺ປຫໍ, ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ; ສວນມ຺ປຫໍ, ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ; ອຸປສງ຺ກມນມ຺ປຫໍ, ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ; ປຍິຣຸປາສນມ຺ປຫໍ, ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ; ອນຸສ຺ສຣຓມ຺ປຫໍ, ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ; ອນຸປພ຺ພຊ຺ຊມ຺ປຫໍ [ອນຸສ຺ສຕິມ຺ປຫໍ (ສ຺ຍາ.)], ຠິກ຺ຂເວ, ເຕສໍ ຠິກ຺ຂູນໍ ພຫູປກາຣໍ ວທາມິ. ຕໍ ກິສ຺ສ ເຫຕຸ? ຕຖາຣູເປ, ຠິກ຺ຂເວ, ຠິກ຺ຂູ ເສວໂຕ ຠຊໂຕ ປຍິຣຸປາສໂຕ ອປຣິປູໂຣປິ ສີລກ຺ຂນ຺ໂຘ ຠາວນາປາຣິປູຣິໍ ຄຈ຺ຉຕິ, ອປຣິປູໂຣປິ ສມາຘິກ຺ຂນ຺ໂຘ ຠາວນາປາຣິປູຣິໍ ຄຈ຺ຉຕິ, ອປຣິປູໂຣປິ ປຎ຺ຎາກ຺ຂນ຺ໂຘ ຠາວນາປາຣິປູຣິໍ ຄຈ຺ຉຕິ, ອປຣິປູໂຣປິ ວິມຸຕ຺ຕິກ຺ຂນ຺ໂຘ ຠາວນາປາຣິປູຣິໍ ຄຈ຺ຉຕິ, ອປຣິປູໂຣປິ ວິມຸຕ຺ຕິຎາຓທສ຺ສນກ຺ຂນ຺ໂຘ ຠາວນາປາຣິປູຣິໍ ຄຈ຺ຉຕິ. ເອວຣູປາ ຈ ເຕ, ຠິກ຺ຂເວ, ຠິກ຺ຂູ ສຕ຺ຖາໂຣຕິປິ ວຸຈ຺ຈນ຺ຕິ, ສຕ຺ຖວາຫາຕິປິ ວຸຈ຺ຈນ຺ຕິ, ຣຓຎ຺ຊຫາຕິປິ ວຸຈ຺ຈນ຺ຕິ, ຕໂມນຸທາຕິປິ ວຸຈ຺ຈນ຺ຕິ, ອາໂລກກຣາຕິປິ ວຸຈ຺ຈນ຺ຕິ, ໂອຠາສກຣາຕິປິ ວຸຈ຺ຈນ຺ຕິ, ປຊ຺ໂຊຕກຣາຕິປິ ວຸຈ຺ຈນ຺ຕິ, ອຸກ຺ກາຘາຣາຕິປິ ວຸຈ຺ຈນ຺ຕິ, ປຠງ຺ກຣາຕິປິ ວຸຈ຺ຈນ຺ຕິ, ອຣິຍາຕິປິ ວຸຈ຺ຈນ຺ຕິ, ຈກ຺ຂຸມນ຺ໂຕຕິປິ ວຸຈ຺ຈນ຺ຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ປາໂມຊ຺ຊກຣຓໍ ຐານໍ [… ກຣຓຐານໍ (ສີ. ສ຺ຍາ.)], ເອຕໍ ໂຫຕິ ວິຊານຕໍ;

ຍທິທໍ ຠາວິຕຕ຺ຕານໍ, ອຣິຍານໍ ຘມ຺ມຊີວິນໍ.

‘‘ເຕ ໂຊຕຍນ຺ຕິ ສທ຺ຘມ຺ມໍ, ຠາສຍນ຺ຕິ ປຠງ຺ກຣາ;

ອາໂລກກຣຓາ ຘີຣາ, ຈກ຺ຂຸມນ຺ໂຕ ຣຓຎ຺ຊຫາ.

‘‘ເຍສໍ ເວ ສາສນໍ ສຸຕ຺ວາ, ສມ຺ມທຎ຺ຎາຍ ປຓ຺ຑິຕາ;

ຊາຕິກ຺ຂຍມຠິຎ຺ຎາຍ, ນາຄຈ຺ຉນ຺ຕິ ປຸນພ຺ຠວ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ປຎ຺ຈມໍ.