໑໐. ນທີໂສຕສຸຕ຺ຕໍ

໑໐໙. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເສຍ຺ຍຖາປິ, ຠິກ຺ຂເວ, ປຸຣິໂສ ນທິຍາ ໂສເຕນ ໂອວຸຍ຺ເຫຍ຺ຍ ປິຍຣູປສາຕຣູເປນ. ຕເມນໍ ຈກ຺ຂຸມາ ປຸຣິໂສ ຕີເຣ ຐິໂຕ ທິສ຺ວາ ເອວໍ ວເທຍ຺ຍ – ‘ກິຎ຺ຈາປິ ໂຂ ຕ຺ວໍ, ອມ຺ໂຠ ປຸຣິສ, ນທິຍາ ໂສເຕນ ໂອວຸຍ຺ຫສິ ປິຍຣູປສາຕຣູເປນ, ອຕ຺ຖິ ເຈຕ຺ຖ ເຫຏ຺ຐາ ຣຫໂທ ສອູມິ ສາວຏ຺ໂຏ ສຄໂຫ ສຣກ຺ຂໂສ ຍໍ ຕ຺ວໍ, ອມ຺ໂຠ ປຸຣິສ, ຣຫທໍ ປາປຸຓິຕ຺ວາ ມຣຓໍ ວາ ນິຄຈ຺ຉສິ ມຣຓມຕ຺ຕໍ ວາ ທຸກ຺ຂ’ນ຺ຕິ. ອຖ ໂຂ ໂສ, ຠິກ຺ຂເວ, ປຸຣິໂສ ຕສ຺ສ ປຸຣິສສ຺ສ ສທ຺ທໍ ສຸຕ຺ວາ ຫຕ຺ເຖຫິ ຈ ປາເທຫິ ຈ ປຏິໂສຕໍ ວາຍເມຍ຺ຍ.

‘‘ອຸປມາ ໂຂ ເມ ອຍໍ, ຠິກ຺ຂເວ, ກຕາ ອຕ຺ຖສ຺ສ ວິຎ຺ຎາປນາຍ. ອຍໍ ເຈຕ຺ຖ [ອຍໍ ເຈເວຕ຺ຖ (ສ຺ຍາ.)] ອຕ຺ໂຖ – ‘ນທິຍາ ໂສໂຕ’ຕິ ໂຂ, ຠິກ຺ຂເວ, ຕຓ຺ຫາເຍຕໍ ອຘິວຈນໍ.

‘‘‘ປິຍຣູປໍ ສາຕຣູປ’ນ຺ຕິ ໂຂ, ຠິກ຺ຂເວ, ຉນ຺ເນຕໍ ອຊ຺ຌຕ຺ຕິການໍ ອາຍຕນານໍ ອຘິວຈນໍ.

‘‘‘ເຫຏ຺ຐາ ຣຫໂທ’ຕິ ໂຂ, ຠິກ຺ຂເວ, ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ອຘິວຈນໍ;

‘‘‘ອູມິຠຍ’ນ຺ຕິ ໂຂ [ສຎີມີຕິ ໂຂ (ພຫູສຸ)], ຠິກ຺ຂເວ, ໂກຘຸປາຍາສສ຺ເສຕໍ ອຘິວຈນໍ;

‘‘‘ອາວຏ຺ຏ’ນ຺ຕິ ໂຂ [ສາວຏ຺ໂຏຕິ ໂຂ (ພຫູສຸ)], ຠິກ຺ຂເວ, ປຎ຺ຈນ຺ເນຕໍ ກາມຄຸຓານໍ ອຘິວຈນໍ;

‘‘‘ຄຫຣກ຺ຂໂສ’ຕິ ໂຂ [ສຄໂຫ ສຣກ຺ຂໂສຕິ ໂຂ (ພຫູສຸ)], ຠິກ຺ຂເວ, ມາຕຸຄາມສ຺ເສຕໍ ອຘິວຈນໍ;

‘‘‘ປຏິໂສໂຕ’ຕິ ໂຂ, ຠິກ຺ຂເວ, ເນກ຺ຂມ຺ມສ຺ເສຕໍ ອຘິວຈນໍ;

‘‘‘ຫຕ຺ເຖຫິ ຈ ປາເທຫິ ຈ ວາຍາໂມ’ຕິ ໂຂ, ຠິກ຺ຂເວ, ວີຣິຍາຣມ຺ຠສ຺ເສຕໍ ອຘິວຈນໍ;

‘‘‘ຈກ຺ຂຸມາ ປຸຣິໂສ ຕີເຣ ຐິໂຕຕິ ໂຂ, ຠິກ຺ຂເວ, ຕຖາຄຕສ຺ເສຕໍ ອຘິວຈນໍ ອຣຫໂຕ ສມ຺ມາສມ຺ພຸທ຺ຘສ຺ສາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ສຫາປິ ທຸກ຺ເຂນ ຊເຫຍ຺ຍ ກາເມ, ໂຍຄກ຺ເຂມໍ ອາຍຕິໍ ປຕ຺ຖຍາໂນ;

ສມ຺ມປ຺ປຊາໂນ ສຸວິມຸຕ຺ຕຈິຕ຺ໂຕ, ວິມຸຕ຺ຕິຍາ ຜສ຺ສເຍ ຕຕ຺ຖ ຕຕ຺ຖ;

ສ ເວທຄູ ວູສິຕພ຺ຣຫ຺ມຈຣິໂຍ, ໂລກນ຺ຕຄູ ປາຣຄໂຕຕິ ວຸຈ຺ຈຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ທສມໍ.