໓. ຕຕິຍວຄ຺ໂຄ

໑. ປສນ຺ນຈິຕ຺ຕສຸຕ຺ຕໍ

໒໑. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ອິຘາຫໍ, ຠິກ຺ຂເວ, ເອກຈ຺ຈໍ ປຸຄ຺ຄລໍ ປສນ຺ນຈິຕ຺ຕໍ ເອວໍ ເຈຕສາ ເຈໂຕ ປຣິຈ຺ຈ ປຊານາມິ – ‘ອິມມ຺ຫິ ຈາຍໍ ສມເຍ ປຸຄ຺ຄໂລ ກາລໍ ກເຣຍ຺ຍ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’. ຕໍ ກິສ຺ສ ເຫຕຸ? ຈິຕ຺ຕໍ ຫິສ຺ສ, ຠິກ຺ຂເວ, ປສນ຺ນໍ. ເຈໂຕປສາທເຫຕຸ ໂຂ ປນ, ຠິກ຺ຂເວ, ເອວມິເຘກຈ຺ເຈ ສຕ຺ຕາ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊນ຺ຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ປສນ຺ນຈິຕ຺ຕໍ ຎຕ຺ວານ, ເອກຈ຺ຈໍ ອິຘ ປຸຄ຺ຄລໍ;

ເອຕມຕ຺ຖຎ຺ຈ ພ຺ຍາກາສິ, ພຸທ຺ໂຘ ຠິກ຺ຂູນ ສນ຺ຕິເກ.

‘‘ອິມມ຺ຫິ ຈາຍໍ ສມເຍ, ກາລໍ ກຍິຣາຖ ປຸຄ຺ຄໂລ;

ສຸຄຕິໍ ອຸປປຊ຺ເຊຍ຺ຍ, ຈິຕ຺ຕໍ ຫິສ຺ສ ປສາທິຕໍ.

‘‘ຍຖາ ຫຣິຕ຺ວາ ນິກ຺ຂິເປຍ຺ຍ, ເອວເມວ ຕຖາວິໂຘ;

ເຈໂຕປສາທເຫຕຸ ຫິ, ສຕ຺ຕາ ຄຈ຺ຉນ຺ຕິ ສຸຄ຺ຄຕິ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ປຐມໍ.

໒. ເມຕ຺ຕສຸຕ຺ຕໍ

໒໒. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ມາ, ຠິກ຺ຂເວ, ປຸຎ຺ຎານໍ ຠາຍິຕ຺ຖ. ສຸຂສ຺ເສຕໍ, ຠິກ຺ຂເວ, ອຘິວຈນໍ ອິຏ຺ຐສ຺ສ ກນ຺ຕສ຺ສ ປິຍສ຺ສ ມນາປສ຺ສ ຍທິທໍ ປຸຎ຺ຎານິ [ປຸຎ຺ຎານນ຺ຕິ, (ອ. ນິ. ໗.໖໒)]. ອຠິຊານາມິ ໂຂ ປນາຫໍ, ຠິກ຺ຂເວ, ທີຆຣຕ຺ຕໍ ກຕານໍ ປຸຎ຺ຎານໍ ອິຏ຺ຐໍ ກນ຺ຕໍ ປິຍໍ ມນາປໍ ວິປາກໍ ປຈ຺ຈນຸຠູຕໍ. ສຕ຺ຕ ວສ຺ສານິ ເມຕ຺ຕຈິຕ຺ຕໍ ຠາເວຕ຺ວາ ສຕ຺ຕ ສໍວຏ຺ຏວິວຏ຺ຏກປ຺ເປ ນຍິມໍ ໂລກໍ ປຸນຣາຄມາສິໍ. ສໍວຏ຺ຏມາເນ ສຸທໍ, ຠິກ຺ຂເວ, ກປ຺ເປ ອາຠສ຺ສຣູປໂຄ ໂຫມິ; ວິວຏ຺ຏມາເນ ກປ຺ເປ ສຸຎ຺ຎໍ ພ຺ຣຫ຺ມວິມານໍ ອຸປປຊ຺ຊາມິ.

‘‘ຕຕ຺ຣ ສຸທໍ, ຠິກ຺ຂເວ, ພ຺ຣຫ຺ມາ ໂຫມິ ມຫາພ຺ຣຫ຺ມາ ອຠິຠູ ອນຠິຠູໂຕ ອຎ຺ຎທຕ຺ຖຸທໂສ ວສວຕ຺ຕີ. ຉຕ຺ຕິໍສກ຺ຂຕ຺ຕຸໍ ໂຂ ປນາຫໍ, ຠິກ຺ຂເວ, ສກ຺ໂກ ອໂຫສິໍ ເທວານມິນ຺ໂທ; ອເນກສຕກ຺ຂຕ຺ຕຸໍ ຣາຊາ ອໂຫສິໍ ຈກ຺ກວຕ຺ຕີ ຘມ຺ມິໂກ ຘມ຺ມຣາຊາ ຈາຕຸຣນ຺ໂຕ ວິຊິຕາວີ ຊນປທຕ຺ຖາວຣິຍປ຺ປຕ຺ໂຕ ສຕ຺ຕຣຕນສມນ຺ນາຄໂຕ. ໂກ ປນ ວາໂທ ປເທສຣຊ຺ຊສ຺ສ!

‘‘ຕສ຺ສ ມຍ຺ຫໍ, ຠິກ຺ຂເວ, ເອຕທໂຫສິ – ‘ກິສ຺ສ ນຸ ໂຂ ເມ ອິທໍ ກມ຺ມສ຺ສ ຜລໍ, ກິສ຺ສ ກມ຺ມສ຺ສ ວິປາໂກ, ເຍນາຫໍ ເອຕຣຫິ ເອວໍມຫິທ຺ຘິໂກ ເອວໍມຫານຸຠາໂວ’ຕິ? ຕສ຺ສ ມຍ຺ຫໍ, ຠິກ຺ຂເວ, ເອຕທໂຫສິ – ‘ຕິຓ຺ຓໍ ໂຂ ເມ ອິທໍ ກມ຺ມານໍ ຜລໍ, ຕິຓ຺ຓໍ ກມ຺ມານໍ ວິປາໂກ, ເຍນາຫໍ ເອຕຣຫິ ເອວໍມຫິທ຺ຘິໂກ ເອວໍມຫານຸຠາໂວຕິ, ເສຍ຺ຍຖິທໍ [ເສຍ຺ຍຖີທໍ (ສີ. ສ຺ຍາ. ກໍ. ປີ.)] – ທານສ຺ສ, ທມສ຺ສ, ສຎ຺ຎມສ຺ສາ’’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ປຸຎ຺ຎເມວ ໂສ ສິກ຺ເຂຍ຺ຍ, ອາຍຕຄ຺ຄໍ ສຸຂຸທ຺ຣຍໍ;

ທານຎ຺ຈ ສມຈຣິຍຎ຺ຈ, ເມຕ຺ຕຈິຕ຺ຕຎ຺ຈ ຠາວເຍ.

‘‘ເອເຕ ຘມ຺ເມ ຠາວຍິຕ຺ວາ, ຕໂຍ ສຸຂສມຸທ຺ທເຍ [ສຸຂສມຸທ຺ຣເຍ (ສີ. ອຏ຺ຐ.)];

ອພ຺ຍາປຊ຺ຌໍ [ອພ຺ຍາປຊ຺ຊໍ (ສ຺ຍາ. ກ.), ອພ຺ຍາພຊ຺ຌໍ (?)] ສຸຂໍ ໂລກໍ, ປຓ຺ຑິໂຕ ອຸປປຊ຺ຊຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ທຸຕິຍໍ.

໓. ອຸຠຍຕ຺ຖສຸຕ຺ຕໍ

໒໓. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອກຘມ຺ໂມ, ຠິກ຺ຂເວ, ຠາວິໂຕ ພຫຸລີກໂຕ ອຸໂຠ ອຕ຺ເຖ ສມຘິຄຍ຺ຫ ຕິຏ຺ຐຕິ – ທິຏ຺ຐຘມ຺ມິກຎ຺ເຈວ ອຕ຺ຖໍ ສມ຺ປຣາຍິກຎ຺ຈ. ກຕໂມ ເອກຘມ຺ໂມ? ອປ຺ປມາໂທ ກຸສເລສຸ ຘມ຺ເມສຸ. ອຍໍ ໂຂ, ຠິກ຺ຂເວ, ເອກຘມ຺ໂມ ຠາວິໂຕ ພຫຸລີກໂຕ ອຸໂຠ ອຕ຺ເຖ ສມຘິຄຍ຺ຫ ຕິຏ຺ຐຕິ – ທິຏ຺ຐຘມ຺ມິກຎ຺ເຈວ ອຕ຺ຖໍ ສມ຺ປຣາຍິກຎ຺ຈາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ອປ຺ປມາທໍ ປສໍສນ຺ຕິ, ປຸຎ຺ຎກິຣິຍາສຸ ປຓ຺ຑິຕາ;

ອປ຺ປມຕ຺ໂຕ ອຸໂຠ ອຕ຺ເຖ, ອຘິຄຓ຺ຫາຕິ ປຓ຺ຑິໂຕ.

‘‘ທິຏ຺ເຐ ຘມ຺ເມ ຈ ໂຍ ອຕ຺ໂຖ, ໂຍ ຈຕ຺ໂຖ ສມ຺ປຣາຍິໂກ;

ອຕ຺ຖາຠິສມຍາ ຘີໂຣ, ປຓ຺ຑິໂຕຕິ ປວຸຈ຺ຈຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຕຕິຍໍ.

໔. ອຏ຺ຐິປຸຎ຺ຊສຸຕ຺ຕໍ

໒໔. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອກປຸຄ຺ຄລສ຺ສ, ຠິກ຺ຂເວ, ກປ຺ປໍ ສນ຺ຘາວໂຕ ສໍສຣໂຕ ສິຍາ ເອວໍ ມຫາ ອຏ຺ຐິກງ຺ກໂລ ອຏ຺ຐິປຸຎ຺ໂຊ ອຏ຺ຐິຣາສິ ຍຖາຍໍ ເວປຸລ຺ໂລ ປພ຺ພໂຕः ສເຈ ສໍຫາຣໂກ ອສ຺ສ, ສມ຺ຠຕຎ຺ຈ ນ ວິນສ຺ເສຍ຺ຍາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເອກສ຺ເສເກນ ກປ຺ເປນ, ປຸຄ຺ຄລສ຺ສຏ຺ຐິສຎ຺ຈໂຍ;

ສິຍາ ປພ຺ພຕສໂມ ຣາສິ, ອິຕິ ວຸຕ຺ຕໍ ມເຫສິນາ.

‘‘ໂສ ໂຂ ປນາຍໍ ອກ຺ຂາໂຕ, ເວປຸລ຺ໂລ ປພ຺ພໂຕ ມຫາ;

ອຸຕ຺ຕໂຣ ຄິຊ຺ຌກູຏສ຺ສ, ມຄຘານໍ ຄິຣິພ຺ພເຊ.

‘‘ຍໂຕ ຈ ອຣິຍສຈ຺ຈານິ, ສມ຺ມປ຺ປຎ຺ຎາຍ ປສ຺ສຕິ;

ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍຎ຺ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

‘‘ສ ສຕ຺ຕກ຺ຂຕ຺ຕຸໍ ປຣມໍ, ສນ຺ຘາວິຕ຺ວານ ປຸຄ຺ຄໂລ;

ທຸກ຺ຂສ຺ສນ຺ຕກໂຣ ໂຫຕິ, ສພ຺ພສໍໂຍຊນກ຺ຂຍາ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຈຕຸຕ຺ຖໍ.

໕. ມຸສາວາທສຸຕ຺ຕໍ

໒໕. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອກຘມ຺ມໍ ອຕີຕສ຺ສ, ຠິກ຺ຂເວ, ປຸຣິສປຸຄ຺ຄລສ຺ສ ນາຫໍ ຕສ຺ສ ກິຎ຺ຈິ ປາປກມ຺ມໍ ອກຣຓີຍນ຺ຕິ ວທາມິ. ກຕມໍ ເອກຘມ຺ມໍ? ຍທິທໍ [ຍຖຍິທໍ (ສີ. ສ຺ຍາ. ກ.), ຍຖາຍິທໍ (ປີ.)] ຠິກ຺ຂເວ, ສມ຺ປຊານມຸສາວາໂທ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເອກຘມ຺ມໍ ອຕີຕສ຺ສ, ມຸສາວາທິສ຺ສ ຊນ຺ຕຸໂນ;

ວິຕິຓ຺ຓປຣໂລກສ຺ສ, ນຕ຺ຖິ ປາປໍ ອກາຣິຍ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ປຎ຺ຈມໍ.

໖. ທານສຸຕ຺ຕໍ

໒໖. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອວຎ຺ເຈ, ຠິກ຺ຂເວ, ສຕ຺ຕາ ຊາເນຍ຺ຍຸໍ ທານສໍວິຠາຄສ຺ສ ວິປາກໍ ຍຖາຫໍ ຊານາມິ, ນ ອທຕ຺ວາ ຠຸຎ຺ເຊຍ຺ຍຸໍ, ນ ຈ ເນສໍ ມຈ຺ເຉຣມລໍ ຈິຕ຺ຕໍ ປຣິຍາທາຍ ຕິຏ຺ເຐຍ຺ຍ. ໂຍປິ ເນສໍ ອສ຺ສ ຈຣິໂມ ອາໂລໂປ ຈຣິມໍ ກພຬໍ, ຕໂຕປິ ນ ອສໍວິຠຊິຕ຺ວາ ຠຸຎ຺ເຊຍ຺ຍຸໍ, ສເຈ ເນສໍ ປຏິຄ຺ຄາຫກາ ອສ຺ສຸ. ຍສ຺ມາ ຈ ໂຂ, ຠິກ຺ຂເວ, ສຕ຺ຕາ ນ ເອວໍ ຊານນ຺ຕິ ທານສໍວິຠາຄສ຺ສ ວິປາກໍ ຍຖາຫໍ ຊານາມິ, ຕສ຺ມາ ອທຕ຺ວາ ຠຸຎ຺ຊນ຺ຕິ, ມຈ຺ເຉຣມລຎ຺ຈ ເນສໍ ຈິຕ຺ຕໍ ປຣິຍາທາຍ ຕິຏ຺ຐຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເອວໍ ເຈ ສຕ຺ຕາ ຊາເນຍ຺ຍຸໍ, ຍຖາວຸຕ຺ຕໍ ມເຫສິນາ;

ວິປາກໍ ສໍວິຠາຄສ຺ສ, ຍຖາ ໂຫຕິ ມຫປ຺ຜລໍ.

‘‘ວິເນຍ຺ຍ ມຈ຺ເຉຣມລໍ, ວິປ຺ປສນ຺ເນນ ເຈຕສາ;

ທຊ຺ຊຸໍ ກາເລນ ອຣິເຍສຸ, ຍຕ຺ຖ ທິນ຺ນໍ ມຫປ຺ຜລໍ.

‘‘ອນ຺ນຎ຺ຈ ທຕ຺ວາ [ທຕ຺ວານ (ສ຺ຍາ.)] ພຫຸໂນ, ທກ຺ຂິເຓຍ຺ເຍສຸ ທກ຺ຂິຓໍ;

ອິໂຕ ຈຸຕາ ມນຸສ຺ສຕ຺ຕາ, ສຄ຺ຄໍ ຄຈ຺ຉນ຺ຕິ ທາຍກາ.

‘‘ເຕ ຈ ສຄ຺ຄຄຕາ [ສຄ຺ຄໍ ຄຕາ (ສີ. ປີ. ກ.)] ຕຕ຺ຖ, ໂມທນ຺ຕິ ກາມກາມິໂນ;

ວິປາກໍ ສໍວິຠາຄສ຺ສ, ອນຸໂຠນ຺ຕິ ອມຈ຺ຉຣາ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຉຏ຺ຐໍ.

໗. ເມຕ຺ຕາຠາວນາສຸຕ຺ຕໍ

໒໗. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ຍານິ ການິຈິ, ຠິກ຺ຂເວ, ໂອປຘິການິ ປຸຎ຺ຎກິຣິຍວຕ຺ຖູນິ ສພ຺ພານິ ຕານິ ເມຕ຺ຕາຍ ເຈໂຕວິມຸຕ຺ຕິຍາ ກລໍ ນາຄ຺ຆນ຺ຕິ ໂສຬສິໍ. ເມຕ຺ຕາເຍວ ຕານິ ເຈໂຕວິມຸຕ຺ຕິ ອຘິຄ຺ຄເຫຕ຺ວາ ຠາສເຕ ຈ ຕປເຕ ຈ ວິໂຣຈຕິ ຈ.

‘‘ເສຍ຺ຍຖາປິ, ຠິກ຺ຂເວ, ຍາ ກາຈິ ຕາຣກຣູປານໍ ປຠາ ສພ຺ພາ ຕາ ຈນ຺ທິຍາ ປຠາຍ ກລໍ ນາຄ຺ຆນ຺ຕິ ໂສຬສິໍ, ຈນ຺ທປຠາເຍວ ຕາ ອຘິຄ຺ຄເຫຕ຺ວາ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວ ໂຂ, ຠິກ຺ຂເວ, ຍານິ ການິຈິ ໂອປຘິການິ ປຸຎ຺ຎກິຣິຍວຕ຺ຖູນິ ສພ຺ພານິ ຕານິ ເມຕ຺ຕາຍ ເຈໂຕວິມຸຕ຺ຕິຍາ ກລໍ ນາຄ຺ຆນ຺ຕິ ໂສຬສິໍ, ເມຕ຺ຕາເຍວ ຕານິ ເຈໂຕວິມຸຕ຺ຕິ ອຘິຄ຺ຄເຫຕ຺ວາ ຠາສເຕ ຈ ຕປເຕ ຈ ວິໂຣຈຕິ ຈ.

‘‘ເສຍ຺ຍຖາປິ, ຠິກ຺ຂເວ, ວສ຺ສານໍ ປຈ຺ຉິເມ ມາເສ ສຣທສມເຍ ວິທ຺ເຘ ວິຄຕວລາຫເກ ເທເວ [ນເຠ (ສີ.)] ອາທິຈ຺ໂຈ ນຠໍ ອພ຺ຠຸສ຺ສກ຺ກມາໂນ [ອພ຺ຠຸຄ຺ຄມມາໂນ (ກ. ອຏ຺ຐ.)] ສພ຺ພໍ ອາກາສຄຕໍ [ອາກາສໍ (ສ຺ຍາ.)] ຕມຄຕໍ ອຠິວິຫຈ຺ຈ [ອຠິຫຈ຺ຈ (ສ຺ຍາ.)] ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວ ໂຂ, ຠິກ຺ຂເວ, ຍານິ ການິຈິ ໂອປຘິການິ ປຸຎ຺ຎກິຣິຍວຕ຺ຖູນິ ສພ຺ພານິ ຕານິ ເມຕ຺ຕາຍ ເຈໂຕວິມຸຕ຺ຕິຍາ ກລໍ ນາຄ຺ຆນ຺ຕິ ໂສຬສິໍ, ເມຕ຺ຕາເຍວ ຕານິ ເຈໂຕວິມຸຕ຺ຕິ ອຘິຄ຺ຄເຫຕ຺ວາ ຠາສເຕ ຈ ຕປເຕ ຈ ວິໂຣຈຕິ ຈ.

‘‘ເສຍ຺ຍຖາປິ, ຠິກ຺ຂເວ, ຣຕ຺ຕິຍາ ປຈ຺ຈູສສມຍໍ ໂອສຘິຕາຣກາ ຠາສເຕ ຈ ຕປເຕ ຈ ວິໂຣຈຕິ ຈ; ເອວເມວ ໂຂ, ຠິກ຺ຂເວ, ຍານິ ການິຈິ ໂອປຘິການິ ປຸຎ຺ຎກິຣິຍວຕ຺ຖູນິ ສພ຺ພານິ ຕານິ ເມຕ຺ຕາຍ ເຈໂຕວິມຸຕ຺ຕິຍາ ກລໍ ນາຄ຺ຆນ຺ຕິ ໂສຬສິໍ, ເມຕ຺ຕາເຍວ ຕານິ ເຈໂຕວິມຸຕ຺ຕິ ອຘິຄ຺ຄເຫຕ຺ວາ ຠາສເຕ ຈ ຕປເຕ ຈ ວິໂຣຈຕິ ຈາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ໂຍ ຈ ເມຕ຺ຕໍ ຠາວຍຕິ, ອປ຺ປມາຓໍ ປຏິສ຺ສໂຕ;

ຕນູ [ຕນຸ (ສີ.)] ສໍໂຍຊນາ ໂຫນ຺ຕິ, ປສ຺ສໂຕ ອຸປຘິກ຺ຂຍໍ.

‘‘ເອກມ຺ປິ ເຈ ປາຓມທຸຏ຺ຐຈິຕ຺ໂຕ, ເມຕ຺ຕາຍຕິ ກຸສໂລ ເຕນ ໂຫຕິ;

ສພ຺ເພ ຈ ປາເຓ ມນສານຸກມ຺ປໍ, ປຫູຕມຣິໂຍ ປກໂຣຕິ ປຸຎ຺ຎໍ.

‘‘ເຍ [ໂຍ (ສີ.)] ສຕ຺ຕສຓ຺ຑໍ ປຖວິໍ ວິຊິຕ຺ວາ, ຣາຊິສໂຍ [ຣາຊີສໂຍ (ສີ.)] ຍຊມານານຸປຣິຍຄາ;

ອສ຺ສເມຘໍ ປຸຣິສເມຘໍ, ສມ຺ມາປາສໍ ວາຊເປຍ຺ຍໍ ນິຣຄ຺ຄຬໍ.

‘‘ເມຕ຺ຕສ຺ສ ຈິຕ຺ຕສ຺ສ ສຸຠາວິຕສ຺ສ, ກລມ຺ປິ ເຕ ນານຸຠວນ຺ຕິ ໂສຬສິໍ;

ຈນ຺ທປ຺ປຠາ ຕາຣຄຓາວ ສພ຺ເພ.

‘‘ໂຍ ນ ຫນ຺ຕິ ນ ຆາເຕຕິ, ນ ຊິນາຕິ ນ ຊາປເຍ;

ເມຕ຺ຕໍໂສ ສພ຺ພຠູເຕສຸ, ເວຣໍ ຕສ຺ສ ນ ເກນຈີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ສຕ຺ຕມໍ.

ຕຕິໂຍ ວຄ຺ໂຄ ນິຏ຺ຐິໂຕ.

ຕສ຺ສຸທ຺ທານໍ –

ຈິຕ຺ຕໍ ເມຕ຺ຕໍ [ຌາຍີ (ສີ. ສ຺ຍາ.), ຌາຍິ (ປີ. ກ.)] ອຸໂຠ ອຕ຺ເຖ, ປຸຎ຺ຊໍ ເວປຸລ຺ລປພ຺ພຕໍ;

ສມ຺ປຊານມຸສາວາໂທ, ທານຎ຺ຈ ເມຕ຺ຕຠາວນາ [ເມຕ຺ຕຠາວຎ຺ຈ (ສີ. ສ຺ຍາ. ປີ.), ເມຕ຺ຕວາຈຎ຺ຈ (ກ.)].

ສຕ຺ຕິມານິ ຈ [ສຕ຺ຕິມານິຘ (ສີ. ກ.)] ສຸຕ຺ຕານິ, ປຸຣິມານິ ຈ ວີສຕິ;

ເອກຘມ຺ເມສຸ ສຸຕ຺ຕນ຺ຕາ, ສຕ຺ຕວີສຕິສງ຺ຄຫາຕິ.

ເອກກນິປາໂຕ ນິຏ຺ຐິໂຕ.