໒. ທຸຕິຍວຄ຺ໂຄ

໑. ໂມຫປຣິຎ຺ຎາສຸຕ຺ຕໍ

໑໑. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ໂມຫໍ, ຠິກ຺ຂເວ, ອນຠິຊານໍ ອປຣິຊານໍ ຕຕ຺ຖ ຈິຕ຺ຕໍ ອວິຣາຊຍໍ ອປ຺ປຊຫໍ ອຠພ຺ໂພ ທຸກ຺ຂກ຺ຂຍາຍ. ໂມຫຎ຺ຈ ໂຂ, ຠິກ຺ຂເວ, ອຠິຊານໍ ປຣິຊານໍ ຕຕ຺ຖ ຈິຕ຺ຕໍ ວິຣາຊຍໍ ປຊຫໍ ຠພ຺ໂພ ທຸກ຺ຂກ຺ຂຍາຍາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເຍນ ໂມເຫນ ມູຬ຺ຫາເສ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ;

ຕໍ ໂມຫໍ ສມ຺ມທຎ຺ຎາຍ, ປຊຫນ຺ຕິ ວິປສ຺ສິໂນ;

ປຫາຍ ນ ປຸນາຍນ຺ຕິ, ອິມໍ ໂລກໍ ກຸທາຈນ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ປຐມໍ.

໒. ໂກຘປຣິຎ຺ຎາສຸຕ຺ຕໍ

໑໒. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ໂກຘໍ, ຠິກ຺ຂເວ, ອນຠິຊານໍ ອປຣິຊານໍ ຕຕ຺ຖ ຈິຕ຺ຕໍ ອວິຣາຊຍໍ ອປ຺ປຊຫໍ ອຠພ຺ໂພ ທຸກ຺ຂກ຺ຂຍາຍ. ໂກຘຎ຺ຈ ໂຂ, ຠິກ຺ຂເວ, ອຠິຊານໍ ປຣິຊານໍ ຕຕ຺ຖ ຈິຕ຺ຕໍ ວິຣາຊຍໍ ປຊຫໍ ຠພ຺ໂພ ທຸກ຺ຂກ຺ຂຍາຍາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເຍນ ໂກເຘນ ກຸທ຺ຘາເສ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ;

ຕໍ ໂກຘໍ ສມ຺ມທຎ຺ຎາຍ, ປຊຫນ຺ຕິ ວິປສ຺ສິໂນ;

ປຫາຍ ນ ປຸນາຍນ຺ຕິ, ອິມໍ ໂລກໍ ກຸທາຈນ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ທຸຕິຍໍ.

໓.ມກ຺ຂປຣິຎ຺ຎາສຸຕ຺ຕໍ

໑໓. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ມກ຺ຂໍ, ຠິກ຺ຂເວ, ອນຠິຊານໍ ອປຣິຊານໍ ຕຕ຺ຖ ຈິຕ຺ຕໍ ອວິຣາຊຍໍ ອປ຺ປຊຫໍ ອຠພ຺ໂພ ທຸກ຺ຂກ຺ຂຍາຍ. ມກ຺ຂຎ຺ຈ ໂຂ, ຠິກ຺ຂເວ, ອຠິຊານໍ ປຣິຊານໍ ຕຕ຺ຖ ຈິຕ຺ຕໍ ວິຣາຊຍໍ ປຊຫໍ ຠພ຺ໂພ ທຸກ຺ຂກ຺ຂຍາຍາ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ເຍນ ມກ຺ເຂນ ມກ຺ຂາເສ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ;

ຕໍ ມກ຺ຂໍ ສມ຺ມທຎ຺ຎາຍ, ປຊຫນ຺ຕິ ວິປສ຺ສິໂນ;

ປຫາຍ ນ ປຸນາຍນ຺ຕິ, ອິມໍ ໂລກໍ ກຸທາຈນ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຕຕິຍໍ.

໔. ອວິຊ຺ຊານີວຣຓສຸຕ຺ຕໍ

໑໔. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ນາຫໍ, ຠິກ຺ຂເວ, ອຎ຺ຎໍ ເອກນີວຣຓມ຺ປິ ສມນຸປສ຺ສາມິ ເຍນ [ເຍເນວໍ (?)] ນີວຣເຓນ ນິວຸຕາ ປຊາ ທີຆຣຕ຺ຕໍ ສນ຺ຘາວນ຺ຕິ ສໍສຣນ຺ຕິ ຍຖຍິທໍ, ຠິກ຺ຂເວ, ອວິຊ຺ຊານີວຣຓໍ [ອວິຊ຺ຊານີວຣເຓນ (?)]. ອວິຊ຺ຊານີວຣເຓນ ຫິ, ຠິກ຺ຂເວ, ນິວຸຕາ ປຊາ ທີຆຣຕ຺ຕໍ ສນ຺ຘາວນ຺ຕິ ສໍສຣນ຺ຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ນຕ຺ຖຎ຺ໂຎ ເອກຘມ຺ໂມປິ, ເຍເນວໍ [ເຍເນວ (ສີ. ປີ. ກ.)] ນິວຸຕາ ປຊາ;

ສໍສຣນ຺ຕິ ອໂຫຣຕ຺ຕໍ, ຍຖາ ໂມເຫນ ອາວຸຕາ.

‘‘ເຍ ຈ ໂມຫໍ ປຫນ຺ຕ຺ວານ, ຕໂມຂນ຺ຘໍ [ຕໂມກ຺ຂນ຺ຘໍ (ສີ. ສ຺ຍາ. ປີ.)] ປທາລຍຸໍ;

ນ ເຕ ປຸນ ສໍສຣນ຺ຕິ, ເຫຕຸ ເຕສໍ ນ ວິຊ຺ຊຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຈຕຸຕ຺ຖໍ.

໕. ຕຓ຺ຫາສໍໂຍຊນສຸຕ຺ຕໍ

໑໕. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ນາຫໍ, ຠິກ຺ຂເວ, ອຎ຺ຎໍ ເອກສໍໂຍຊນມ຺ປິ ສມນຸປສ຺ສາມິ ເຍນ [ເຍເນວໍ (ສ຺ຍາ.)] ສໍໂຍຊເນນ ສໍຍຸຕ຺ຕາ ສຕ຺ຕາ ທີຆຣຕ຺ຕໍ ສນ຺ຘາວນ຺ຕິ ສໍສຣນ຺ຕິ ຍຖຍິທໍ, ຠິກ຺ຂເວ, ຕຓ຺ຫາສໍໂຍຊນໍ [ຕຓ຺ຫາສໍໂຍຊເນນ (?)]. ຕຓ຺ຫາສໍໂຍຊເນນ ຫິ, ຠິກ຺ຂເວ, ສໍຍຸຕ຺ຕາ ສຕ຺ຕາ ທີຆຣຕ຺ຕໍ ສນ຺ຘາວນ຺ຕິ ສໍສຣນ຺ຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ຕຓ຺ຫາທຸຕິໂຍ ປຸຣິໂສ, ທີຆມທ຺ຘານ ສໍສຣໍ;

ອິຕ຺ຖຠາວຎ຺ຎຖາຠາວໍ [ອິຕ຺ຖມ຺ຠາວຎ຺ຎຖາຠາວໍ (ສ຺ຍາ.)], ສໍສາຣໍ ນາຕິວຕ຺ຕຕິ.

‘‘ເອຕມາທີນວໍ [ເອວມາທີນວໍ (ສີ. ປີ. ກ.)] ຎຕ຺ວາ, ຕຓ຺ຫໍ [ຕຓ຺ຫາ (ສີ. ກ.)] ທຸກ຺ຂສ຺ສ ສມ຺ຠວໍ;

ວີຕຕຓ຺ໂຫ ອນາທາໂນ, ສໂຕ ຠິກ຺ຂຸ ປຣິພ຺ພເຊ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ປຎ຺ຈມໍ.

໖. ປຐມເສຂສຸຕ຺ຕໍ

໑໖. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເສຂສ຺ສ, ຠິກ຺ຂເວ, ຠິກ຺ຂຸໂນ ອປ຺ປຕ຺ຕມານສສ຺ສ ອນຸຕ຺ຕຣໍ ໂຍຄກ຺ເຂມໍ ປຕ຺ຖຍມານສ຺ສ ວິຫຣໂຕ ອຊ຺ຌຕ຺ຕິກໍ ອງ຺ຄນ຺ຕິ ກຣິຕ຺ວາ ນາຎ຺ຎໍ ເອກງ຺ຄມ຺ປິ ສມນຸປສ຺ສາມິ ຍໍ ເອວໍ ພຫູປກາຣໍ ຍຖຍິທໍ, ຠິກ຺ຂເວ, ໂຍນິໂສ ມນສິກາໂຣ. ໂຍນິໂສ, ຠິກ຺ຂເວ, ຠິກ຺ຂຸ ມນສິ ກໂຣນ຺ໂຕ ອກຸສລໍ ປຊຫຕິ, ກຸສລໍ ຠາເວຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ໂຍນິໂສ ມນສິກາໂຣ, ຘມ຺ໂມ ເສຂສ຺ສ ຠິກ຺ຂຸໂນ;

ນຕ຺ຖຎ຺ໂຎ ເອວໍ ພຫຸກາໂຣ, ອຸຕ຺ຕມຕ຺ຖສ຺ສ ປຕ຺ຕິຍາ;

ໂຍນິໂສ ປທຫໍ ຠິກ຺ຂຸ, ຂຍໍ ທຸກ຺ຂສ຺ສ ປາປຸເຓ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຉຏ຺ຐໍ.

໗. ທຸຕິຍເສຂສຸຕ຺ຕໍ

໑໗. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເສຂສ຺ສ, ຠິກ຺ຂເວ, ຠິກ຺ຂຸໂນ ອປ຺ປຕ຺ຕມານສສ຺ສ ອນຸຕ຺ຕຣໍ ໂຍຄກ຺ເຂມໍ ປຕ຺ຖຍມານສ຺ສ ວິຫຣໂຕ ພາຫິຣໍ ອງ຺ຄນ຺ຕິ ກຣິຕ຺ວາ ນາຎ຺ຎໍ ເອກງ຺ຄມ຺ປິ ສມນຸປສ຺ສາມິ ຍໍ ເອວໍ ພຫູປກາຣໍ ຍຖຍິທໍ, ຠິກ຺ຂເວ, ກລ຺ຍາຓມິຕ຺ຕຕາ. ກລ຺ຍາຓມິຕ຺ໂຕ, ຠິກ຺ຂເວ, ຠິກ຺ຂຸ ອກຸສລໍ ປຊຫຕິ, ກຸສລໍ ຠາເວຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ກລ຺ຍາຓມິຕ຺ໂຕ ໂຍ ຠິກ຺ຂຸ, ສປ຺ປຕິສ຺ໂສ ສຄາຣໂວ;

ກຣໍ ມິຕ຺ຕານໍ ວຈນໍ, ສມ຺ປຊາໂນ ປຕິສ຺ສໂຕ;

ປາປຸເຓ ອນຸປຸພ຺ເພນ, ສພ຺ພສໍໂຍຊນກ຺ຂຍ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ສຕ຺ຕມໍ.

໘. ສງ຺ຆເຠທສຸຕ຺ຕໍ

໑໘. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອກຘມ຺ໂມ, ຠິກ຺ຂເວ, ໂລເກ ອຸປ຺ປຊ຺ຊມາໂນ ອຸປ຺ປຊ຺ຊຕິ ພຫຸຊນາຫິຕາຍ ພຫຸຊນາສຸຂາຍ ພຫຸໂນ ຊນສ຺ສ ອນຕ຺ຖາຍ ອຫິຕາຍ ທຸກ຺ຂາຍ ເທວມນຸສ຺ສານໍ. ກຕໂມ ເອກຘມ຺ໂມ? ສງ຺ຆເຠໂທ. ສງ຺ເຆ ໂຂ ປນ, ຠິກ຺ຂເວ, ຠິນ຺ເນ ອຎ຺ຎມຎ຺ຎໍ ຠຓ຺ຑນານິ ເຈວ ໂຫນ຺ຕິ, ອຎ຺ຎມຎ຺ຎໍ ປຣິຠາສາ ຈ ໂຫນ຺ຕິ, ອຎ຺ຎມຎ຺ຎໍ ປຣິກ຺ເຂປາ ຈ ໂຫນ຺ຕິ, ອຎ຺ຎມຎ຺ຎໍ ປຣິຈ຺ຈຊນາ ຈ ໂຫນ຺ຕິ. ຕຕ຺ຖ ອປ຺ປສນ຺ນາ ເຈວ ນປ຺ປສີທນ຺ຕິ, ປສນ຺ນານຎ຺ຈ ເອກຈ຺ຈານໍ ອຎ຺ຎຖຕ຺ຕໍ ໂຫຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ອາປາຍິໂກ ເນຣຍິໂກ, ກປ຺ປຏ຺ໂຐ ສງ຺ຆເຠທໂກ;

ວຄ຺ຄາຣາໂມ ອຘມ຺ມຏ຺ໂຐ, ໂຍຄກ຺ເຂມາ ປຘໍສຕິ [ໂຍຄກ຺ເຂມໂຕ ຘໍສຕິ (ສ຺ຍາ. ປີ.), ໂຍຄກ຺ເຂມາ ວິມໍສຕິ (ສີ. ກ.)];

ສງ຺ຆໍ ສມຄ຺ຄໍ ເຠຕ຺ວານ [ຠິຕ຺ວານ (ສີ. ກ.), ຠິນ຺ທິຕ຺ວາ (ຈູຬວ. ໓໕໔; ອ. ນິ. ໑໐.໓໙)], ກປ຺ປໍ ນິຣຍມ຺ຫິ ປຈ຺ຈຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ອຏ຺ຐມໍ.

໙. ສງ຺ຆສາມຄ຺ຄີສຸຕ຺ຕໍ

໑໙. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ເອກຘມ຺ໂມ, ຠິກ຺ຂເວ, ໂລເກ ອຸປ຺ປຊ຺ຊມາໂນ ອຸປ຺ປຊ຺ຊຕິ ພຫຸຊນຫິຕາຍ ພຫຸຊນສຸຂາຍ ພຫຸໂນ ຊນສ຺ສ ອຕ຺ຖາຍ ຫິຕາຍ ສຸຂາຍ ເທວມນຸສ຺ສານໍ. ກຕໂມ ເອກຘມ຺ໂມ? ສງ຺ຆສາມຄ຺ຄີ. ສງ຺ເຆ ໂຂ ປນ, ຠິກ຺ຂເວ, ສມຄ຺ເຄ ນ ເຈວ ອຎ຺ຎມຎ຺ຎໍ ຠຓ຺ຑນານິ ໂຫນ຺ຕິ, ນ ຈ ອຎ຺ຎມຎ຺ຎໍ ປຣິຠາສາ ໂຫນ຺ຕິ, ນ ຈ ອຎ຺ຎມຎ຺ຎໍ ປຣິກ຺ເຂປາ ໂຫນ຺ຕິ, ນ ຈ ອຎ຺ຎມຎ຺ຎໍ ປຣິຈ຺ຈຊນາ ໂຫນ຺ຕິ. ຕຕ຺ຖ ອປ຺ປສນ຺ນາ ເຈວ ປສີທນ຺ຕິ, ປສນ຺ນານຎ຺ຈ ຠິຍ຺ໂຍຠາໂວ ໂຫຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ສຸຂາ ສງ຺ຆສ຺ສ ສາມຄ຺ຄີ, ສມຄ຺ຄານຎ຺ຈນຸຄ຺ຄໂຫ;

ສມຄ຺ຄຣໂຕ ຘມ຺ມຏ຺ໂຐ, ໂຍຄກ຺ເຂມາ ນ ຘໍສຕິ;

ສງ຺ຆໍ ສມຄ຺ຄໍ ກຕ຺ວານ, ກປ຺ປໍ ສຄ຺ຄມ຺ຫິ ໂມທຕີ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ນວມໍ.

໑໐. ປທຸຏ຺ຐຈິຕ຺ຕສຸຕ຺ຕໍ

໒໐. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ອິຘາຫໍ, ຠິກ຺ຂເວ, ເອກຈ຺ຈໍ ປຸຄ຺ຄລໍ ປທຸຏ຺ຐຈິຕ຺ຕໍ ເອວໍ ເຈຕສາ ເຈໂຕ ປຣິຈ຺ຈ ປຊານາມິ – ‘ອິມມ຺ຫິ ຈາຍໍ ສມເຍ ປຸຄ຺ຄໂລ ກາລງ຺ກເຣຍ຺ຍ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ’. ຕໍ ກິສ຺ສ ເຫຕຸ? ຈິຕ຺ຕໍ ຫິສ຺ສ, ຠິກ຺ຂເວ, ປທຸຏ຺ຐໍ. ເຈໂຕປໂທສເຫຕຸ ໂຂ ປນ, ຠິກ຺ຂເວ, ເອວມິເຘກຈ຺ເຈ ສຕ຺ຕາ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊນ຺ຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ປທຸຏ຺ຐຈິຕ຺ຕໍ ຎຕ຺ວານ, ເອກຈ຺ຈໍ ອິຘ ປຸຄ຺ຄລໍ;

ເອຕມຕ຺ຖຎ຺ຈ ພ຺ຍາກາສິ, ພຸທ຺ໂຘ ຠິກ຺ຂູນ ສນ຺ຕິເກ.

‘‘ອິມມ຺ຫິ ຈາຍໍ ສມເຍ, ກາລໍ ກຍິຣາຖ ປຸຄ຺ຄໂລ;

ນິຣຍໍ ອຸປປຊ຺ເຊຍ຺ຍ, ຈິຕ຺ຕໍ ຫິສ຺ສ ປທູສິຕໍ.

‘‘ຍຖາ ຫຣິຕ຺ວາ ນິກ຺ຂິເປຍ຺ຍ, ເອວເມວ ຕຖາວິໂຘ;

ເຈໂຕປໂທສເຫຕຸ ຫິ, ສຕ຺ຕາ ຄຈ຺ຉນ຺ຕິ ທຸຄ຺ຄຕິ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ທສມໍ.

ທຸຕິໂຍ ວຄ຺ໂຄ ນິຏ຺ຐິໂຕ.

ຕສ຺ສຸທ຺ທານໍ –

ໂມໂຫ ໂກໂຘ ອຖ ມກ຺ໂຂ, ວິຊ຺ຊາ ຕຓ຺ຫາ ເສຂທຸເວ ຈ;

ເຠໂທ ສາມຄ຺ຄິປຸຄ຺ຄໂລ [ໂມຫໂກຘ ອຖ ມກ຺ຂາຄໂຕ, ມູຫາ ກາມເສກ຺ຂທຸເວ; ເຠທສາມຄ຺ຄປຸຄ຺ຄໂລ ຈ (ສີ. ກ.) ໂມຫໂກຘາ ອຖ ມກ຺ໂຂ ໂມຫກາມາ ເສກ຺ຂາ ທຸເວ; ເຠທໂມທາ ປຸຄ຺ຄໂລ ຈ (ສ຺ຍາ. ປີ.)], ວຄ຺ຄມາຫຸ ທຸຕິຍນ຺ຕິ ວຸຈ຺ຈຕີຕິ.