໑໐. ມຈ຺ຉຣາຊຈຣິຍາ

໘໓. ‘‘ປຸນາປຣໍ ຍທາ ໂຫມິ, ມຈ຺ຉຣາຊາ ມຫາສເຣ;

ອຸຓ຺ເຫ ສູຣິຍສນ຺ຕາເປ, ສເຣ ອຸທກ ຂີຍຖ.

໘໔. ‘‘ຕໂຕ ກາກາ ຈ ຄິຊ຺ຌາ ຈ, ກງ຺ກາ [ພກາ (ສີ.)] ກຸລລເສນກາ;

ຠກ຺ຂຍນ຺ຕິ ທິວາຣຕ຺ຕິໍ, ມຈ຺ເຉ ອຸປນິສີທິຍ.

໘໕. ‘‘ເອວໍ ຈິນ຺ເຕສຫໍ ຕຕ຺ຖ, ສຫ ຎາຕີຫິ ປີຬິໂຕ;

‘ເກນ ນຸ ໂຂ ອຸປາເຍນ, ຎາຕີ ທຸກ຺ຂາ ປໂມຈເຍ’.

໘໖. ‘‘ວິຈິນ຺ຕຍິຕ຺ວາ ຘມ຺ມຕ຺ຖໍ, ສຈ຺ຈໍ ອທ຺ທສ ປສ຺ສຍໍ;

ສຈ຺ເຈ ຐຕ຺ວາ ປໂມເຈສິໍ, ຎາຕີນໍ ຕໍ ອຕິກ຺ຂຍໍ.

໘໗. ‘‘ອນຸສ຺ສຣິຕ຺ວາ ສຕໍ ຘມ຺ມໍ, ປຣມຕ຺ຖໍ ວິຈິນ຺ຕຍໍ;

ອກາສິ ສຈ຺ຈກິຣິຍໍ, ຍໍ ໂລເກ ຘຸວສສ຺ສຕໍ.

໘໘. ‘‘‘ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ;

ນາຠິຊານາມິ ສຎ຺ຈິຈ຺ຈ, ເອກປາຓມ຺ປິ ຫິໍສິຕໍ.

໘໙. ‘‘‘ເອເຕນ ສຈ຺ຈວຊ຺ເຊນ, ປຊ຺ຊຸນ຺ໂນ ອຠິວສ຺ສຕຸ;

ອຠິຕ຺ຖນຍ ປຊ຺ຊຸນ຺ນ, ນິຘິໍ ກາກສ຺ສ ນາສຍ;

ກາກໍ ໂສກາຍ ຣນ຺ເຘຫິ, ມຈ຺ເຉ ໂສກາ ປໂມຈຍ’.

໙໐. ‘‘ສຫກເຕ ສຈ຺ຈວເຣ, ປຊ຺ຊຸນ຺ໂນ ອຠິຄຊ຺ຊິຍ;

ຖລໍ ນິນ຺ນຎ຺ຈ ປູເຣນ຺ໂຕ, ຂເຓນ ອຠິວສ຺ສຖ.

໙໑. ‘‘ເອວຣູປໍ ສຈ຺ຈວຣໍ, ກຕ຺ວາ ວີຣິຍມຸຕ຺ຕມໍ;

ວສ຺ສາເປສິໍ ມຫາເມຆໍ, ສຈ຺ຈເຕຊພລສ຺ສິໂຕ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

ມຈ຺ຉຣາຊຈຣິຍໍ ທສມໍ.