໑໓. ສຸເມຘພຸທ຺ຘວໍໂສ

໑. ປທຸມຸຕ຺ຕຣສ຺ສ ອປເຣນ, ສຸເມໂຘ ນາມ ນາຍໂກ;

ທຸຣາສໂທ ອຸຄ຺ຄເຕໂຊ, ສພ຺ພໂລກຸຕ຺ຕໂມ ມຸນິ.

໒. ປສນ຺ນເນຕ຺ໂຕ ສຸມຸໂຂ, ພ຺ຣຫາ ອຸຊຸ ປຕາປວາ;

ຫິເຕສີ ສພ຺ພສຕ຺ຕານໍ, ພຫູ ໂມເຈສິ ພນ຺ຘນາ.

໓. ຍທາ ພຸທ຺ໂຘ ປາປຸຓິຕ຺ວາ, ເກວລໍ ໂພຘິມຸຕ຺ຕມໍ;

ສຸທສ຺ສນມ຺ຫິ ນຄເຣ, ຘມ຺ມຈກ຺ກໍ ປວຕ຺ຕຍິ.

໔. ຕສ຺ສາປິ ອຠິສມຍາ ຕີຓິ, ອເຫສຸໍ ຘມ຺ມເທສເນ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໕. ປຸນາປຣໍ ກຸມ຺ຠກຓ຺ຓໍ, ຍກ຺ຂໍ ໂສ ທມຍີ ຊິໂນ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໖. ປຸນາປຣໍ ອມິຕຍໂສ, ຈຕຸສຈ຺ຈໍ ປກາສຍິ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໗. ສນ຺ນິປາຕາ ຕໂຍ ອາສຸໍ, ສຸເມຘສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ສຸທສ຺ສນໍ ນາມ ນຄຣໍ, ອຸປຄຎ຺ຉິ ຊິໂນ ຍທາ;

ຕທາ ຂີຓາສວາ ຠິກ຺ຂູ, ສມິໍສຸ ສຕໂກຏິໂຍ.

໙. ປຸນາປຣໍ ເທວກູເຏ, ຠິກ຺ຂູນໍ ກຖິນຕ຺ຖເຕ;

ຕທາ ນວຸຕິໂກຏີນໍ, ທຸຕິໂຍ ອາສິ ສມາຄໂມ.

໑໐. ປຸນາປຣໍ ທສພໂລ, ຍທາ ຈຣຕິ ຈາຣິກໍ;

ຕທາ ອສີຕິໂກຏີນໍ, ຕຕິໂຍ ອາສິ ສມາຄໂມ.

໑໑. ອຫໍ ເຕນ ສມເຍນ, ອຸຕ຺ຕໂຣ ນາມ ມາຓໂວ;

ອສີຕິໂກຏິໂຍ ມຍ຺ຫໍ, ຆເຣ ສນ຺ນິຈິຕໍ ຘນໍ.

໑໒. ເກວລໍ ສພ຺ພໍ ທຕ຺ວານ, ສສງ຺ເຆ ໂລກນາຍເກ;

ສຣຓໍ ຕສ຺ສຸປຄຎ຺ຉິໍ, ປພ຺ພຊ຺ຊຎ຺ຈາຠິໂຣຈຍິໍ.

໑໓. ໂສປິ ມໍ ພຸທ຺ໂຘ ພ຺ຍາກາສິ, ກໂຣນ຺ໂຕ ອນຸໂມທນໍ;

‘‘ຕິໍສກປ຺ປສຫສ຺ສມ຺ຫິ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໕. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໖. ສຸຕ຺ຕນ຺ຕໍ ວິນຍຎ຺ຈາປິ, ນວງ຺ຄໍ ສຕ຺ຖຸສາສນໍ;

ສພ຺ພໍ ປຣິຍາປຸຓິຕ຺ວານ, ໂສຠຍິໍ ຊິນສາສນໍ.

໑໗. ຕຕ຺ຖປ຺ປມຕ຺ໂຕ ວິຫຣນ຺ໂຕ, ນິສຊ຺ຊຏ຺ຐານຈງ຺ກເມ;

ອຠິຎ຺ຎາສຸ ປາຣມິໍ ຄນ຺ຕ຺ວາ, ພ຺ຣຫ຺ມໂລກມຄຎ຺ຉຫໍ.

໑໘. ສຸທສ຺ສນໍ ນາມ ນຄຣໍ, ສຸທຕ຺ໂຕ ນາມ ຂຕ຺ຕິໂຍ;

ສຸທຕ຺ຕາ ນາມ ຊນິກາ, ສຸເມຘສ຺ສ ມເຫສິໂນ.

໑໙. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ສຸຈນ຺ທກຎ຺ຈນສິຣິວຑ຺ຒາ, ຕໂຍ ປາສາທມຸຕ຺ຕມາ.

໒໐. ຕິໂສຬສສຫສ຺ສານິ, ນາຣິໂຍ ສມລງ຺ກຕາ;

ສຸມນາ ນາມ ສາ ນາຣີ, ປຸນພ຺ພສຸ ນາມ ອຕ຺ຣໂຊ.

໒໑. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ອນູນກໍ ອຑ຺ຒມາສໍ, ປຘານໍ ປທຫີ ຊິໂນ.

໒໒. ພ຺ຣຫ຺ມຸນາ ຍາຈິໂຕ ສນ຺ໂຕ, ສຸເມໂຘ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ສຸທສ຺ສນຸຍ຺ຍານມຸຕ຺ຕເມ.

໒໓. ສຣໂຓ ສພ຺ພກາໂມ ຈ, ອເຫສຸໍ ອຄ຺ຄສາວກາ;

ສາຄໂຣ ນາມຸປຏ຺ຐາໂກ, ສຸເມຘສ຺ສ ມເຫສິໂນ.

໒໔. ຣາມາ ເຈວ ສຸຣາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫານີໂປຕິ ວຸຈ຺ຈຕິ.

໒໕. ອຸຣຸເວລາ ຍສວາ ຈ, ອເຫສຸໍ ອຄ຺ຄຸປຏ຺ຐກາ;

ຍໂສຘຣາ ສິຣິມາ ຈ [ຍສາ ນາມ ສິຣິມາ ຈ (ສ຺ຍາ. ກໍ.)], ອເຫສຸໍ ອຄ຺ຄຸປຏ຺ຐິກາ.

໒໖. ອຏ຺ຐາສີຕິຣຕນານິ, ອຈ຺ຈຸຄ຺ຄໂຕ ມຫາມຸນິ;

ໂອຠາເສຕິ ທິສາ ສພ຺ພາ, ຈນ຺ໂທ ຕາຣຄເຓ ຍຖາ.

໒໗. ຈກ຺ກວຕ຺ຕິມຓີ ນາມ, ຍຖາ ຕປຕິ ໂຍຊນໍ;

ຕເຖວ ຕສ຺ສ ຣຕນໍ, ສມນ຺ຕາ ຜຣຕິ ໂຍຊນໍ.

໒໘. ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໙. ເຕວິຊ຺ຊຉຬຠິຎ຺ເຎຫິ, ພລປ຺ປຕ຺ເຕຫິ ຕາທິຫິ;

ສມາກຸລມິທໍ ອາສິ, ອຣຫນ຺ເຕຫິ ສາຘຸຫິ.

໓໐. ເຕປິ ສພ຺ເພ ອມິຕຍສາ, ວິປ຺ປມຸຕ຺ຕາ ນິຣູປຘີ;

ຎາຓາໂລກໍ ທສ຺ສຍິຕ຺ວາ, ນິພ຺ພຸຕາ ເຕ ມຫາຍສາ.

໓໑. ສຸເມໂຘ ຊິນວໂຣ ພຸທ຺ໂຘ, ເມຘາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ສຸເມຘສ຺ສ ຠຄວໂຕ ວໍໂສ ເອກາທສໂມ.