໗. ປຎ຺ຈທີປກຕ຺ເຖຣອປທານໍ

໕໐. ‘‘ປທຸມຸຕ຺ຕຣພຸທ຺ຘສ຺ສ, ສພ຺ພຠູຕານຸກມ຺ປິໂນ;

ສທ຺ທຫິຕ຺ວານ [ສຸສຓ຺ຐຫິຕ຺ວາ (ສີ.)] ສທ຺ຘມ຺ເມ, ອຸຊຸທິຏ຺ຐິ ອໂຫສຫໍ.

໕໑. ‘‘ປທີປທານໍ ປາທາສິໍ, ປຣິວາເຣຕ຺ວານ ໂພຘິຍໍ;

ສທ຺ທຫນ຺ໂຕ ປທີປານິ, ອກຣິໍ ຕາວເທ ອຫໍ.

໕໒. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ອາກາເສ ອຸກ຺ກໍ ຘາເຣນ຺ຕິ, ທີປທານສ຺ສິທໍ ຜລໍ.

໕໓. ‘‘ຕິໂຣກຸຏ຺ຏໍ ຕິໂຣເສລໍ, ສມຕິຄ຺ຄຍ຺ຫ ປພ຺ພຕໍ;

ສມນ຺ຕາ ໂຍຊນສຕໍ, ທສ຺ສນໍ ອນຸໂຠມຫໍ.

໕໔. ‘‘ເຕນ ກມ຺ມາວເສເສນ, ປຕ຺ໂຕມ຺ຫິ ອາສວກ຺ຂຍໍ;

ຘາເຣມິ ອນ຺ຕິມໍ ເທຫໍ, ທ຺ວິປທິນ຺ທສ຺ສ ສາສເນ.

໕໕. ‘‘ຈຕຸຕ຺ຕິໍເສ ກປ຺ປສເຕ, ສຕຈກ຺ຂຸສນາມກາ;

ຣາຊາເຫສຸໍ ມຫາເຕຊາ, ຈກ຺ກວຕ຺ຕີ ມຫພ຺ພລາ.

໕໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຎ຺ຈທີປໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຎ຺ຈທີປກຕ຺ເຖຣສ຺ສາປທານໍ ສຕ຺ຕມໍ.