໔. ຄນ຺ໂຘທກິຍຕ຺ເຖຣອປທານໍ

໒໕. ‘‘ປທຸມຸຕ຺ຕຣພຸທ຺ຘສ຺ສ, ມຫາໂພຘິມໂຫ ອຫຸ;

ວິຈິຕ຺ຕໍ ຆຏມາທາຍ, ຄນ຺ໂຘທກມທາສຫໍ.

໒໖. ‘‘ນ຺ຫານກາເລ ຈ ໂພຘິຍາ, ມຫາເມໂຆ ປວສ຺ສຖ;

ນິນ຺ນາໂທ ຈ ມຫາ ອາສິ, ອສນິຍາ ຜລນ຺ຕິຍາ.

໒໗. ‘‘ເຕເນວາສນິເວເຄນ, ຕຕ຺ຖ ກາລງ຺ກໂຕ [ກາລກໂຕ (ສີ. ສ຺ຍາ.)] ອຫໍ [ອຫຸໍ (ສີ.)];

ເທວໂລເກ ຐິໂຕ ສນ຺ໂຕ, ອິມາ ຄາຖາ ອຠາສຫໍ.

໒໘. ‘‘‘ອໂຫ ພຸທ຺ໂຘ ອໂຫ ຘມ຺ໂມ, ອໂຫ ໂນ ສຕ຺ຖຸສມ຺ປທາ;

ກເຬວຣໍ [ກເລພຣໍ (ສີ.)] ເມ ປຕິຕໍ, ເທວໂລເກ ຣມາມຫໍ.

໒໙. ‘‘‘ອຸພ຺ພິທ຺ຘໍ ຠວນໍ ມຍ຺ຫໍ, ສຕຠູມໍ ສມຸຄ຺ຄຕໍ;

ກຎ຺ຎາສຕສຫສ຺ສານິ, ປຣິວາເຣນ຺ຕິ ມໍ ສທາ.

໓໐. ‘‘‘ອາພາຘາ ເມ ນ ວິຊ຺ຊນ຺ຕິ, ໂສໂກ ມຍ຺ຫໍ ນ ວິຊ຺ຊຕິ;

ປຣິຬາຫໍ ນ ປສ຺ສາມິ, ປຸຎ຺ຎກມ຺ມສ຺ສິທໍ ຜລໍ.

໓໑. ‘‘‘ອຏ຺ຐວີເສ ກປ຺ປສເຕ, ຣາຊາ ສໍວສິໂຕ ອຫຸໍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ’.

໓໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຄນ຺ໂຘທກິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຄນ຺ໂຘທກິຍຕ຺ເຖຣສ຺ສາປທານໍ ຈຕຸຕ຺ຖໍ.