໑໐. ອສນໂພຘິຍຕ຺ເຖຣອປທານໍ

໗໘. ‘‘ຊາຕິຍາ ສຕ຺ຕວສ຺ໂສຫໍ, ອທ຺ທສໍ ໂລກນາຍກໍ;

ປສນ຺ນຈິຕ຺ໂຕ ສຸມໂນ, ອຸປຄຈ຺ຉິໍ ນຣຸຕ຺ຕມໍ.

໗໙. ‘‘ຕິສ຺ສສ຺ສາຫໍ ຠຄວໂຕ, ໂລກເຊຏ຺ຐສ຺ສ ຕາທິໂນ;

ຫຏ຺ໂຐ ຫຏ຺ເຐນ ຈິຕ຺ເຕນ, ໂຣປຍິໍ ໂພຘິມຸຕ຺ຕມໍ.

໘໐. ‘‘ອສໂນ ນາມເຘຍ຺ເຍນ, ຘຣຓີຣຸຫປາທໂປ;

ປຎ຺ຈວສ຺ເສ ປຣິຈຣິໍ, ອສນໍ ໂພຘິມຸຕ຺ຕມໍ.

໘໑. ‘‘ປຸປ຺ຜິຕໍ ປາທປໍ ທິສ຺ວາ, ອພ຺ຠຸຕໍ ໂລມຫໍສນໍ;

ສກໍ ກມ຺ມໍ ປກິຕ຺ເຕນ຺ໂຕ, ພຸທ຺ຘເສຏ຺ຐໍ ອຸປາຄມິໍ.

໘໒. ‘‘ຕິສ຺ໂສ ຕທາ ໂສ ສມ຺ພຸທ຺ໂຘ, ສຍມ຺ຠູ ອຄ຺ຄປຸຄ຺ຄໂລ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໘໓. ‘‘‘ເຍນາຍໍ ໂຣປິຕາ ໂພຘິ, ພຸທ຺ຘປູຊາ ຈ ສກ຺ກຕາ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໘໔. ‘‘‘ຕິໍສກປ຺ປານິ ເທເວສຸ, ເທວຣຊ຺ຊໍ ກຣິສ຺ສຕິ;

ຈຕຸສຏ຺ຐິ ຈກ຺ຂຕ຺ຕຸໍ ໂສ, ຈກ຺ກວຕ຺ຕີ ຠວິສ຺ສຕິ.

໘໕. ‘‘‘ຕຸສິຕາ ຫິ ຈວິຕ຺ວານ, ສຸກ຺ກມູເລນ ໂຈທິໂຕ;

ທ຺ເວ ສມ຺ປຕ຺ຕີ ອນຸໂຠຕ຺ວາ, ມນຸສ຺ສຕ຺ເຕ ຣມິສ຺ສຕິ.

໘໖. ‘‘‘ປຘານປຫິຕຕ຺ໂຕ ໂສ, ອຸປສນ຺ໂຕ ນິຣູປຘິ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໘໗. ‘‘ວິເວກມນຸຍຸຕ຺ໂຕຫໍ, ອຸປສນ຺ໂຕ ນິຣູປຘິ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໘໘. ‘‘ທ຺ເວນວຸເຕ ອິໂຕ ກປ຺ເປ, ໂພຘິໍ ໂຣເປສຫໍ ຕທາ;

ທຸຄ຺ຄຕິໍ ນາຠິຊານາມິ, ໂພຘິໂຣປສ຺ສິທໍ ຜລໍ.

໘໙. ‘‘ຈຕຸສຕ຺ຕຕິໂຕ ກປ຺ເປ, ທຓ຺ຑເສໂນຕິ ວິສ຺ສຸໂຕ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ຕທາ ອຫຸໍ.

໙໐. ‘‘ເຕສຕ຺ຕຕິມ຺ຫິໂຕ ກປ຺ເປ, ສຕ຺ຕາເຫສຸໍ ມຫີປຕີ;

ສມນ຺ຕເນມິນາເມນ, ຣາຊາໂນ ຈກ຺ກວຕ຺ຕິໂນ.

໙໑. ‘‘ປຓ຺ຓວີສຕິໂຕ ກປ຺ເປ, ປຸຓ຺ຓໂກ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໙໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອສນໂພຘິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອສນໂພຘິຍຕ຺ເຖຣສ຺ສາປທານໍ ທສມໍ.

ພີຊນິວຄ຺ໂຄ ຉຏ຺ໂຐ.