໑. ມຫາກຈ຺ຈາຍນຕ຺ເຖຣອປທານໍ

໑. ‘‘ປທຸມຸຕ຺ຕໂຣ ນາມ ຊິໂນ, ອເນໂຊ ອຊິຕໍ ຊໂຍ;

ສຕສຫສ຺ເສ ກປ຺ປານໍ, ອິໂຕ ອຸປ຺ປຊ຺ຊິ ນາຍໂກ.

໒. ‘‘ວີໂຣ ກມລປຕ຺ຕກ຺ໂຂ, ສສງ຺ກວິມລານໂນ;

ກນກາຈລສງ຺ກາໂສ [ກຎ຺ຈນຕຈສງ຺ກາໂສ (ສ຺ຍາ.)], ຣວິທິຕ຺ຕິສມປ຺ປໂຠ.

໓. ‘‘ສຕ຺ຕເນຕ຺ຕມໂນຫາຣີ, ວຣລກ຺ຂຓຠູສິໂຕ;

ສພ຺ພວາກ຺ຍປຖາຕີໂຕ, ມນຸຊາມຣສກ຺ກໂຕ.

໔. ‘‘ສມ຺ພຸທ຺ໂຘ ໂພຘຍໍ ສຕ຺ເຕ, ວາຄີໂສ ມຘຸຣສ຺ສໂຣ;

ກຣຸຓານິພນ຺ຘສນ຺ຕາໂນ, ປຣິສາສຸ ວິສາຣໂທ.

໕. ‘‘ເທເສຕິ ມຘຸຣໍ ຘມ຺ມໍ, ຈຕຸສຈ຺ຈູປສໍຫິຕໍ;

ນິມຸຄ຺ເຄ ໂມຫປງ຺ກມ຺ຫິ, ສມຸທ຺ຘຣຕິ ປາຓິເນ.

໖. ‘‘ຕທາ ເອກຈໂຣ ຫຸຕ຺ວາ, ຕາປໂສ ຫິມວາລໂຍ;

ນຠສາ ມານຸສໍ ໂລກໍ, ຄຈ຺ຉນ຺ໂຕ ຊິນມທ຺ທສໍ.

໗. ‘‘ອຸເປຈ຺ຈ ສນ຺ຕິກໍ ຕສ຺ສ, ອສ຺ໂສສິໍ ຘມ຺ມເທສນໍ;

ວຓ຺ຓຍນ຺ຕສ຺ສ ວີຣສ຺ສ, ສາວກສ຺ສ ມຫາຄຸຓໍ.

໘. ‘‘ສງ຺ຂິຕ຺ເຕນ ມຍາ ວຸຕ຺ຕໍ, ວິຕ຺ຖາເຣນ ປກາສຍໍ;

ປຣິສໍ ມຎ຺ຈ ໂຕເສຕິ, ຍຖາ ກຈ຺ຈາຍໂນ ອຍໍ.

໙. ‘‘‘ນາຫໍ ເອວມິເຘກຈ຺ຈໍ [ເອວໍວິຘໍ ກຎ຺ຈິ (ສີ. ປີ.)], ອຎ຺ຎໍ ປສ຺ສາມິ ສາວກໍ;

ຕສ຺ມາຕທຄ຺ເຄ [ຕສ຺ເມຕທຄ຺ເຄ (ສີ.)] ເອສຄ຺ໂຄ, ເອວໍ ຘາເຣຖ ຠິກ຺ຂໂວ’.

໑໐. ‘‘ຕທາຫໍ ວິມ຺ຫິໂຕ ຫຸຕ຺ວາ, ສຸຕ຺ວາ ວາກ຺ຍໍ ມໂນຣມໍ;

ຫິມວນ຺ຕໍ ຄມິຕ຺ວານ, ອາຫິຕ຺ວາ [ອາຫຕ຺ວາ (ສີ. ປີ.)] ປຸປ຺ຜສຎ຺ຈຍໍ.

໑໑. ‘‘ປູເຊຕ຺ວາ ໂລກສຣຓໍ, ຕໍ ຐານມຠິປຕ຺ຖຍິໍ;

ຕທາ ມມາສຍໍ ຎຕ຺ວາ, ພ຺ຍາກາສິ ສ ຣຓຎ຺ຊໂຫ.

໑໒. ‘‘‘ປສ຺ສເຖຕໍ ອິສິວຣໍ, ນິທ຺ຘນ຺ຕກນກຕ຺ຕຈໍ;

ອຸທ຺ຘຄ຺ຄໂລມໍ ປີຓໍສໍ, ອຈລໍ ປຎ຺ຊລິໍ ຐິຕໍ.

໑໓. ‘‘‘ຫາສໍ ສຸປຸຓ຺ຓນຍນໍ, ພຸທ຺ຘວຓ຺ຓຄຕາສຍໍ;

ຘມ຺ມຊໍ ອຸຄ຺ຄຫທຍໍ [ຘມ຺ມໍວ ວິຄ຺ຄຫວຣໍ (ສີ.), ຘມ຺ມປຏິຄ຺ຄຫວຣໍ (ປີ.)], ອມຕາສິຕ຺ຕສນ຺ນິຠໍ’.

໑໔. ‘‘ກຈ຺ຈານສ຺ສ ຄຸຓໍ ສຸຕ຺ວາ, ຕໍ ຐານໍ ປຕ຺ຖຍໍ ຐິໂຕ;

ອນາຄຕມ຺ຫິ ອທ຺ຘາເນ, ໂຄຕມສ຺ສ ມຫາມຸເນ.

໑໕. ‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ກຈ຺ຈາໂນ ນາມ ນາເມນ, ເຫສ຺ສຕິ ສຕ຺ຖຸ ສາວໂກ.

໑໖. ‘‘ພຫຸສ຺ສຸໂຕ ມຫາຎາຓີ, ອຘິປ຺ປາຍວິທູ ມຸເນ;

ປາປຸຓິສ຺ສຕິ ຕໍ ຐານໍ, ຍຖາຍໍ ພ຺ຍາກໂຕ ມຍາ.

໑໗. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໑໘. ‘‘ທຸເວ ຠເວ ສໍສຣາມິ, ເທວຕ຺ເຕ ອຖ ມານຸເສ;

ອຎ຺ຎໍ ຄຕິໍ ນ ຄຈ຺ຉາມິ, ພຸທ຺ຘປູຊາຍິທໍ ຜລໍ.

໑໙. ‘‘ທຸເວ ກຸເລ ປຊາຍາມິ, ຂຕ຺ຕິເຍ ອຖ ພ຺ຣາຫ຺ມເຓ;

ນີເຈ ກຸເລ ນ ຊາຍາມິ, ພຸທ຺ຘປູຊາຍິທໍ ຜລໍ.

໒໐. ‘‘ປຈ຺ຉິເມ ຈ ຠເວ ທານິ, ຊາໂຕ ອຸຊ຺ເຊນິຍໍ ປຸເຣ [ຊາໂຕ, ອຸຊ຺ເຊນິຍໍ ປຸເຣ ຣເມ (ສ຺ຍາ.)];

ປຊ຺ໂຊຕສ຺ສ ຈ ຈຓ຺ຑສ຺ສ, ປຸໂຣຫິຕທິຊາຘິໂນ [ປຸໂຣຫິຕທິຊາຕິໂນ (ສີ. ປີ.)].

໒໑. ‘‘ປຸຕ຺ໂຕ ຕິຣິຏິວຈ຺ຉສ຺ສ [ຕິຣິຏວຈ຺ຉສ຺ສ (ສີ.), ຕິປິຕິວຈ຺ຉສ຺ສ (ສ຺ຍາ.)], ນິປຸໂຓ ເວທປາຣຄູ;

ມາຕາ ຈ ຈນ຺ທິມາ ນາມ, ກຈ຺ຈາໂນຫໍ ວຣຕ຺ຕໂຈ.

໒໒. ‘‘ວີມໍສນຕ຺ຖໍ ພຸທ຺ຘສ຺ສ, ຠູມິປາເລນ ເປສິໂຕ;

ທິສ຺ວາ ໂມກ຺ຂປຸຣທ຺ວາຣໍ, ນາຍກໍ ຄຸຓສຎ຺ຈຍໍ.

໒໓. ‘‘ສຸຕ຺ວາ ຈ ວິມລໍ ວາກ຺ຍໍ, ຄຕິປງ຺ກວິໂສສນໍ;

ປາປຸຓິໍ ອມຕໍ ສນ຺ຕໍ, ເສເສຫິ ສຫ ສຕ຺ຕຫິ.

໒໔. ‘‘ອຘິປ຺ປາຍວິທູ ຊາໂຕ, ສຸຄຕສ຺ສ ມຫາມເຕ;

ຐປິໂຕ ເອຕທຄ຺ເຄ ຈ, ສຸສມິທ຺ຘມໂນຣໂຖ.

໒໕. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໒໖. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ; ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໒໗. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຫາກຈ຺ຈາຍໂນ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ມຫາກຈ຺ຈາຍນຕ຺ເຖຣສ຺ສາປທານໍ ປຐມໍ.