໘. ໂພຘິສມ຺ມຊ຺ຊກຕ຺ເຖຣອປທານໍ

໔໘. ‘‘ອຫໍ ປຸເຣ ໂພຘິປຕ຺ຕໍ, ອຸຊ຺ຌິຕໍ ເຈຕິຍງ຺ຄເຓ;

ຕໍ ຄເຫຕ຺ວານ ຉຑ຺ເຑສິໍ, ອລຠິໍ ວີສຕີຄຸເຓ.

໔໙. ‘‘ຕສ຺ສ ກມ຺ມສ຺ສ ເຕເຊນ, ສໍສຣນ຺ໂຕ ຠວາຠເວ;

ທຸເວ ຠເວ ສໍສຣາມິ, ເທວຕ຺ເຕ ຈາປິ ມານຸເສ.

໕໐. ‘‘ເທວໂລກາ ຈວິຕ຺ວານ, ອາຄນ຺ຕ຺ວາ ມານຸສໍ ຠວໍ;

ທຸເວ ກຸເລ ປຊາຍາມິ, ຂຕ຺ຕິເຍ ຈາປິ ພ຺ຣາຫ຺ມເຓ.

໕໑. ‘‘ອງ຺ຄປຈ຺ຈງ຺ຄສມ຺ປນ຺ໂນ, ອາໂຣຫປຣິຓາຫວາ;

ອຠິຣູໂປ ສຸຈິ ໂຫມິ, ສມ຺ປຸຓ຺ຓງ຺ໂຄ ອນູນໂກ.

໕໒. ‘‘ເທວໂລເກ ມນຸສ຺ເສ ວາ, ຊາໂຕ ວາ ຍຕ຺ຖ ກຕ຺ຖຈິ;

ຠເວ ສຸວຓ຺ຓວຓ຺ໂຓ ຈ, ອຸຕ຺ຕຕ຺ຕກນກູປໂມ.

໕໓. ‘‘ມຸທຸກາ ມທ຺ທວາ ສ຺ນິທ຺ຘາ [ມຸທຸ ມທ຺ທວາ ສິນິທ຺ຘາ (ສ຺ຍາ.)], ສຸຂຸມາ ສຸກຸມາຣິກາ;

ຉວິ ເມ ສພ຺ພທາ ໂຫຕິ, ໂພຘິປຕ຺ເຕ ສຸຉຑ຺ຑິເຕ [ສຸຉຑ຺ຑິເນ (ສີ.)].

໕໔. ‘‘ຍໂຕ ກຸໂຕຈິ ຄຕີສຸ, ສຣີເຣ ສມຸທາຄເຕ;

ນ ລິມ຺ປຕິ ຣໂຊຊລ຺ລໍ, ວິປາໂກ ປຕ຺ຕຉຑ຺ຑິເຕ.

໕໕. ‘‘ອຸຓ຺ເຫ ວາຕາຕເປ ຕສ຺ສ, ອຄ຺ຄິຕາເປນ ວາ ປນ;

ຄຕ຺ເຕ ເສທາ ນ ມຸຈ຺ຈນ຺ຕິ, ວິປາໂກ ປຕ຺ຕຉຑ຺ຑິເຕ.

໕໖. ‘‘ກຸຏ຺ຐໍ ຄຓ຺ໂຑ ກິລາໂສ ຈ, ຕິລກາ ປິຬກາ ຕຖາ;

ນ ໂຫນ຺ຕິ ກາເຍ ທທ຺ທຸ ຈ, ວິປາໂກ ປຕ຺ຕຉຑ຺ຑິເຕ.

໕໗. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ໂຣຄາ ນ ໂຫນ຺ຕິ ກາຍສ຺ມິໍ, ວິປາໂກ ປຕ຺ຕຉຑ຺ຑິເຕ.

໕໘. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ນ ໂຫຕິ ຈິຕ຺ຕຊາ ປີຬາ, ວິປາໂກ ປຕ຺ຕຉຑ຺ຑິເຕ.

໕໙. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ອມິຕ຺ຕາ ນ ຠວນ຺ຕສ຺ສ, ວິປາໂກ ປຕ຺ຕຉຑ຺ຑິເຕ.

໖໐. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ອນູນໂຠໂຄ ຠວຕິ, ວິປາໂກ ປຕ຺ຕຉຑ຺ຑິເຕ.

໖໑. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ອຄ຺ຄິຣາຊູຫິ ໂຈເຣຫິ, ນ ໂຫຕິ ອຸທເກ ຠຍໍ.

໖໒. ‘‘ອປຣມ຺ປິ ຄຸຓໍ ຕສ຺ສ, ນິພ຺ພຕ຺ຕຕິ ຠວາຠເວ;

ທາສິທາສາ ອນຸຈຣາ, ໂຫນ຺ຕິ ຈິຕ຺ຕານຸວຕ຺ຕກາ.

໖໓. ‘‘ຍມ຺ຫິ ອາຍຸປ຺ປມາຓມ຺ຫິ, ຊາຍເຕ ມານຸເສ ຠເວ;

ຕໂຕ ນ ຫາຍເຕ ອາຍຸ, ຕິຏ຺ຐເຕ ຍາວຕາຍຸກໍ.

໖໔. ‘‘ອພ຺ຠນ຺ຕຣາ ຈ ພາຫິຣາ [ພຫິຈຣາ (ສີ. ປີ. ກ.)], ເນຄມາ ຈ ສຣຏ຺ຐກາ;

ນຸຍຸຕ຺ຕາ ໂຫນ຺ຕິ ສພ຺ເພປິ, ວຸທ຺ຘິກາມາ ສຸຂິຈ຺ຉກາ.

໖໕. ‘‘ໂຠຄວາ ຍສວາ ໂຫມິ, ສິຣິມາ ຎາຕິປກ຺ຂວາ;

ອເປຕຠຍສນ຺ຕາໂສ, ຠເວຫໍ ສພ຺ພໂຕ ຠເວ.

໖໖. ‘‘ເທວາ ມນຸສ຺ສາ ອສຸຣາ, ຄນ຺ຘພ຺ພາ ຍກ຺ຂຣກ຺ຂສາ;

ສພ຺ເພ ເຕ ປຣິຣກ຺ຂນ຺ຕິ, ຠເວ ສໍສຣໂຕ ສທາ.

໖໗. ‘‘ເທວໂລເກ ມນຸສ຺ເສ ຈ, ອນຸໂຠຕ຺ວາ ອຸໂຠ ຍເສ;

ອວສາເນ ຈ ນິພ຺ພານໍ, ສິວໍ ປຕ຺ໂຕ ອນຸຕ຺ຕຣໍ.

໖໘. ‘‘ສມ຺ພຸທ຺ຘມຸທ຺ທິສິຕ຺ວານ, ໂພຘິໍ ວາ ຕສ຺ສ ສຕ຺ຖຸໂນ;

ໂຍ ປຸຎ຺ຎໍ ປສເວ ໂປໂສ, ຕສ຺ສ ກິໍ ນາມ ທຸລ຺ລຠໍ.

໖໙. ‘‘ມຄ຺ເຄ ຜເລ ອາຄເມ ຈ, ຌານາຠິຎ຺ຎາຄຸເຓສຸ ຈ;

ອຎ຺ເຎສໍ ອຘິໂກ ຫຸຕ຺ວາ, ນິພ຺ພາຍາມິ ອນາສໂວ.

໗໐. ‘‘ປຸເຣຫໍ ໂພຘິຍາ ປຕ຺ຕໍ, ຉຑ຺ເຑຕ຺ວາ ຫຏ຺ຐມານໂສ;

ອິເມຫິ ວີສຕງ຺ເຄຫິ, ສມງ຺ຄີ ໂຫມິ ສພ຺ພທາ.

໗໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂພຘິສມ຺ມຊ຺ຊໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ໂພຘິສມ຺ມຊ຺ຊກຕ຺ເຖຣສ຺ສາປທານໍ ອຏ຺ຐມໍ.