໙. ສພ຺ພຜລທາຍກຕ຺ເຖຣອປທານໍ

໕໑. ‘‘ວຣຸໂຓ ນາມ ນາເມນ, ພ຺ຣາຫ຺ມໂຓ ມນ຺ຕປາຣຄູ;

ຉຑ຺ເຑຕ຺ວາ ທສປຸຕ຺ຕານິ, ວນມຊ຺ໂຌຄຫິໍ ຕທາ.

໕໒. ‘‘ອສ຺ສມໍ ສຸກຕໍ ກຕ຺ວາ, ສຸວິຠຕ຺ຕໍ ມໂນຣມໍ;

ປຓ຺ຓສາລໍ ກຣິຕ຺ວານ, ວສາມິ ວິປິເນ ອຫໍ.

໕໓. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ມມ ອສ຺ສມໍ.

໕໔. ‘‘ຍາວຕາ ວນສຓ຺ຑມ຺ຫິ, ໂອຠາໂສ ວິປຸໂລ ອຫຸ;

ພຸທ຺ຘສ຺ສ ອານຸຠາເວນ, ປຊ຺ຊລີ ວິປິນໍ ຕທາ.

໕໕. ‘‘ທິສ຺ວານ ຕໍ ປາຏິຫີຣໍ, ພຸທ຺ຘເສຏ຺ຐສ຺ສ ຕາທິໂນ;

ປຕ຺ຕປຸຏໍ ຄເຫຕ຺ວານ, ຜເລນ ປູຊຍິໍ ອຫໍ.

໕໖. ‘‘ອຸປຄນ຺ຕ຺ວານ ສມ຺ພຸທ຺ຘໍ, ສຫຂາຣິມທາສຫໍ;

ອນຸກມ຺ປາຍ ເມ ພຸທ຺ໂຘ, ອິທໍ ວຈນມພ຺ຣວິ.

໕໗. ‘ຂາຣິຠາຣໍ ຄເຫຕ຺ວານ, ປຈ຺ຉໂຕ ເອຫິ ເມ ຕຸວໍ;

ປຣິຠຸຕ຺ເຕ ຈ ສງ຺ຆມ຺ຫິ, ປຸຎ຺ຎໍ ຕວ ຠວິສ຺ສຕິ’.

໕໘. ‘‘ປຸຏກນ຺ຕໍ ຄເຫຕ຺ວານ, ຠິກ຺ຂຸສງ຺ຆສ຺ສທາສຫໍ;

ຕຕ຺ຖ ຈິຕ຺ຕໍ ປສາເທຕ຺ວາ, ຕຸສິຕໍ ອຸປປຊ຺ຊຫໍ.

໕໙. ‘‘ຕຕ຺ຖ ທິພ຺ເພຫິ ນຈ຺ເຈຫິ, ຄີເຕຫິ ວາທິເຕຫິ ຈ;

ປຸຎ຺ຎກມ຺ເມນ ສໍຍຸຕ຺ຕໍ, ອນຸໂຠມິ ສທາ ສຸຂໍ.

໖໐. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ໂຠເຄ ເມ ອູນຕາ ນຕ຺ຖິ, ຜລທານສ຺ສິທໍ ຜລໍ.

໖໑. ‘‘ຍາວຕາ ຈຕຸໂຣ ທີປາ, ສສມຸທ຺ທາ ສປພ຺ພຕາ;

ຜລໍ ພຸທ຺ຘສ຺ສ ທຕ຺ວານ, ອິສ຺ສຣໍ ກາຣຍາມຫໍ.

໖໒. ‘‘ຍາວຕາ ເມ ປກ຺ຂິຄຓາ, ອາກາເສ ອຸປ຺ປຕນ຺ຕິ ເຈ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

໖໓. ‘‘ຍາວຕາ ວນສຓ຺ຑມ຺ຫິ, ຍກ຺ຂາ ຠູຕາ ຈ ຣກ຺ຂສາ;

ກຸມ຺ຠຓ຺ຑາ ຄຣຸຬາ ຈາປິ, ປາຣິຈຣິຍໍ ອຸເປນ຺ຕິ ເມ.

໖໔. ‘‘ກຸມ຺ຠາ ໂສຓາ ມຘຸກາຣາ, ຑໍສາ ຈ ມກສາ ອຸໂຠ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

໖໕. ‘‘ສຸປຓ຺ຓາ ນາມ ສກຸຓາ, ປກ຺ຂິຊາຕາ ມຫພ຺ພລາ;

ເຕປິ ມໍ ສຣຓໍ ຍນ຺ຕິ, ຜລທານສ຺ສິທໍ ຜລໍ.

໖໖. ‘‘ເຍປິ ທີຆາຍຸກາ ນາຄາ, ອິທ຺ຘິມນ຺ໂຕ ມຫາຍສາ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

໖໗. ‘‘ສີຫາ ພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

໖໘. ‘‘ໂອສຘີຕິຓວາສີ ຈ, ເຍ ຈ ອາກາສວາສິໂນ;

ສພ຺ເພ ມໍ ສຣຓໍ ຍນ຺ຕິ, ຜລທານສ຺ສິທໍ ຜລໍ.

໖໙. ‘‘ສຸທຸທ຺ທສໍ ສຸນິປຸຓໍ, ຄມ຺ຠີຣໍ ສຸປ຺ປກາສິຕໍ;

ຜສ຺ສຍິຕ຺ວາ [ຜຸສຍິຕ຺ວາ (ກ.)] ວິຫຣາມິ, ຜລທານສ຺ສິທໍ ຜລໍ.

໗໐. ‘‘ວິໂມກ຺ເຂ ອຏ຺ຐ ຜຸສິຕ຺ວາ, ວິຫຣາມິ ອນາສໂວ;

ອາຕາປີ ນິປໂກ ຈາຫໍ, ຜລທານສ຺ສິທໍ ຜລໍ.

໗໑. ‘‘ເຍ ຜລຏ຺ຐາ ພຸທ຺ຘປຸຕ຺ຕາ, ຂີຓໂທສາ ມຫາຍສາ;

ອຫມຎ຺ຎຕໂຣ ເຕສໍ, ຜລທານສ຺ສິທໍ ຜລໍ.

໗໒. ‘‘ອຠິຎ຺ຎາປາຣມິໍ ຄນ຺ຕ຺ວາ, ສຸກ຺ກມູເລນ ໂຈທິໂຕ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໗໓. ‘‘ເຕວິຊ຺ຊາ ອິທ຺ຘິປຕ຺ຕາ ຈ, ພຸທ຺ຘປຸຕ຺ຕາ ມຫາຍສາ;

ທິພ຺ພໂສຕສມາປນ຺ນາ, ເຕສໍ ອຎ຺ຎຕໂຣ ອຫໍ.

໗໔. ‘‘ສຕສຫສ຺ສິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

໗໕. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໖. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສພ຺ພຜລທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ສພ຺ພຜລທາຍກຕ຺ເຖຣສ຺ສາປທານໍ ນວມໍ.