໒. ເອກປຕ຺ຕທາຍກຕ຺ເຖຣອປທານໍ

໓໙. ‘‘ນຄເຣ ຫໍສວຕິຍາ, ກຸມ຺ຠກາໂຣ ອໂຫສຫໍ;

ອທ຺ທສໍ ວິຣຊໍ ພຸທ຺ຘໍ, ໂອຆຕິຓ຺ຓມນາສວໍ.

໔໐. ‘‘ສຸກຕໍ ມຕ຺ຕິກາປຕ຺ຕໍ, ພຸທ຺ຘເສຏ຺ຐສ຺ສທາສຫໍ;

ປຕ຺ຕໍ ທຕ຺ວາ ຠຄວໂຕ, ອຸຊຸຠູຕສ຺ສ ຕາທິໂນ.

໔໑. ‘‘ຠເວ ນິພ຺ພຕ຺ຕມາໂນຫໍ, ໂສຓ຺ຓຖາເລ ລຠາມຫໍ;

ຣູປິມເຍ ຈ ໂສວຓ຺ເຓ, ຕຏ຺ຏິເກ ຈ ມຓີມເຍ.

໔໒. ‘‘ປາຕິໂຍ ປຣິຠຸຎ຺ຊາມິ, ປຸຎ຺ຎກມ຺ມສ຺ສິທໍ ຜລໍ;

ຍສານຎ຺ຈ ຘນານຎ຺ຈ [ຍສສາວ ຊນານຎ຺ຈ (ສ຺ຍາ.)], ອຄ຺ຄຠູໂຕ [ປຕ຺ຕຠູໂຕ (ສີ. ປີ.)] ຈ ໂຫມຫໍ.

໔໓. ‘‘ຍຖາປິ ຠທ຺ທເກ ເຂຕ຺ເຕ, ພີຊໍ ອປ຺ປມ຺ປິ ໂຣປິຕໍ;

ສມ຺ມາຘາຣໍ ປວຈ຺ຉນ຺ເຕ, ຜລໍ ໂຕເສຕິ ກສ຺ສກໍ.

໔໔. ‘‘ຕເຖວິທໍ ປຕ຺ຕທານໍ, ພຸທ຺ຘເຂຕ຺ຕມ຺ຫິ ໂຣປິຕໍ;

ປີຕິຘາເຣ ປວສ຺ສນ຺ເຕ, ຜລໍ ມໍ ໂຕສຍິສ຺ສຕິ.

໔໕. ‘‘ຍາວຕາ ເຂຕ຺ຕາ ວິຊ຺ຊນ຺ຕິ, ສງ຺ຆາປິ ຈ ຄຓາປິ ຈ;

ພຸທ຺ຘເຂຕ຺ຕສໂມ ນຕ຺ຖິ, ສຸຂໂທ ສພ຺ພປາຓິນໍ.

໔໖. ‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ເອກປຕ຺ຕໍ ທທິຕ຺ວານ, ປຕ຺ໂຕມ຺ຫິ ອຈລໍ ປທໍ.

໔໗. ‘‘ເອກນວຸຕິໂຕ ກປ຺ເປ, ຍໍ ປຕ຺ຕມທທິໍ ຕທາ;

ທຸຄ຺ຄຕິໍ ນາຠິຊານາມິ, ປຕ຺ຕທານສ຺ສິທໍ ຜລໍ.

໔໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກປຕ຺ຕທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ເອກປຕ຺ຕທາຍກຕ຺ເຖຣສ຺ສາປທານໍ ທຸຕິຍໍ.