໖. ຆຕມຓ຺ຑທາຍກຕ຺ເຖຣອປທານໍ

໔໑. ‘‘ສຸຈິນ຺ຕິຕໍ ຠຄວນ຺ຕໍ, ໂລກເຊຏ຺ຐໍ ນຣາສຠໍ;

ອຸປວິຏ຺ຐໍ ມຫາຣຎ຺ຎໍ, ວາຕາພາເຘນ ປີຬິຕໍ.

໔໒. ‘‘ທິສ຺ວາ ຈິຕ຺ຕໍ ປສາເທຕ຺ວາ, ຆຕມຓ຺ຑມຸປານຍິໍ;

ກຕຕ຺ຕາ ອາຈິຕຕ຺ຕາ [ອຸປຈິຕຕ຺ຕາ (ສ຺ຍາ. ກ.)] ຈ, ຄງ຺ຄາ ຠາຄີຣຖີ ອຍໍ.

໔໓. ‘‘ມຫາສມຸທ຺ທາ ຈຕ຺ຕາໂຣ, ຆຕໍ ສມ຺ປຊ຺ຊເຣ ມມ;

ອຍຎ຺ຈ ປຖວີ ໂຆຣາ, ອປ຺ປມາຓາ ອສງ຺ຂິຍາ.

໔໔. ‘‘ມມ ສງ຺ກປ຺ປມຎ຺ຎາຍ, ຠວເຕ ມຘຸສກ຺ກຣາ [ມຘຸສກ຺ຂຣາ (ສ຺ຍາ. ກ.)];

ຈາຕຸທ຺ທີປາ ອິເມ ຣຸກ຺ຂາ, ປາທປາ ຘຣຓີຣຸຫາ.

໔໕. ‘‘ມມ ສງ຺ກປ຺ປມຎ຺ຎາຍ, ກປ຺ປຣຸກ຺ຂາ ຠວນ຺ຕິ ເຕ;

ປຎ຺ຎາສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ.

໔໖. ‘‘ເອກປຎ຺ຎາສກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໔໗. ‘‘ຈຕຸນ຺ນວຸຕິໂຕ [ຉນວຸເຕ ອິໂຕ (ສີ.)] ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຆຕມຓ຺ຑສ຺ສິທໍ ຜລໍ.

໔໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຆຕມຓ຺ຑທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຆຕມຓ຺ຑທາຍກຕ຺ເຖຣສ຺ສາປທານໍ ຉຏ຺ຐໍ.