໘. ຈງ຺ກມນທາຍກຕ຺ເຖຣອປທານໍ

໙໓. ‘‘ອຕ຺ຖທສ຺ສິສ຺ສ ມຸນິໂນ, ໂລກເຊຏ຺ຐສ຺ສ ຕາທິໂນ;

ອິຏ຺ຐກາຫິ ຈິນິຕ຺ວານ, ຈງ຺ກມໍ ກາຣຍິໍ ອຫໍ.

໙໔. ‘‘ອຸຈ຺ຈໂຕ ປຎ຺ຈຣຕນໍ, ຈງ຺ກມໍ ສາຘຸມາປິຕໍ;

ອາຍາມໂຕ ຫຕ຺ຖສຕໍ, ຠາວນີຍ຺ຍໍ ມໂນຣມໍ.

໙໕. ‘‘ປຏິຄ຺ຄເຫສິ ຠຄວາ, ອຕ຺ຖທສ຺ສີ ນຣຸຕ຺ຕໂມ;

ຫຕ຺ເຖນ ປຸລິນໍ ຄຍ຺ຫ, ອິມາ ຄາຖາ ອຠາສຖ.

໙໖. ‘‘‘ອິມິນາ ປຸລິນທາເນນ, ຈງ຺ກມໍ ສຸກເຕນ ຈ;

ສຕ຺ຕຣຕນສມ຺ປນ຺ນໍ, ປຸລິນໍ ອນຸໂຠສ຺ສຕິ.

໙໗. ‘‘‘ຕີຓິ ກປ຺ປານິ ເທເວສຸ, ເທວຣຊ຺ຊໍ ກຣິສ຺ສຕິ;

ອນຸໂຠສ຺ສຕິ ສມ຺ປຕ຺ຕິໍ, ອຈ຺ຉຣາຫິ ປຸຣກ຺ຂໂຕ.

໙໘. ‘‘‘ມນຸສ຺ສໂລກມາຄນ຺ຕ຺ວາ, ຣາຊາ ຣຏ຺ເຐ ຠວິສ຺ສຕິ;

ຕິກ຺ຂຕ຺ຕຸໍ ຈກ຺ກວຕ຺ຕີ ຈ, ມຫິຍາ ໂສ ຠວິສ຺ສຕິ’.

໙໙. ‘‘ອຏ຺ຐາຣເສ ກປ຺ປສເຕ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຈງ຺ກມສ຺ສ ອິທໍ ຜລໍ.

໑໐໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຈງ຺ກມນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຈງ຺ກມນທາຍກຕ຺ເຖຣສ຺ສາປທານໍ ອຏ຺ຐມໍ.