໒. ໂສຓໂກຬິວິສຕ຺ເຖຣອປທານໍ

໒໕. ‘‘ອໂນມທສ຺ສິສ຺ສ ມຸນິໂນ, ໂລກເຊຏ຺ຐສ຺ສ ຕາທິໂນ;

ສຸຘາຍ ເລປນໍ ກຕ຺ວາ, ຈງ຺ກມໍ ກາຣຍິໍ ອຫໍ.

໒໖. ‘‘ນານາວເຓຫິ ປຸປ຺ເຜຫິ, ຈງ຺ກມໍ ສນ຺ຖຣິໍ ອຫໍ;

ອາກາເສ ວິຕານໍ ກຕ຺ວາ, ໂຠຊຍິໍ ພຸທ຺ຘມຸຕ຺ຕມໍ.

໒໗. ‘‘ອຎ຺ຊລິໍ ປຄ຺ຄເຫຕ຺ວານ, ອຠິວາເທຕ຺ວານ ສຸພ຺ພຕໍ [ປຸປ຺ຜກໍ (ກ.)];

ທີຆສາລໍ ຠຄວໂຕ, ນິຍ຺ຍາເທສິມຫໍ ຕທາ.

໒໘. ‘‘ມມ ສງ຺ກປ຺ປມຎ຺ຎາຍ, ສຕ຺ຖາ ໂລເກ ອນຸຕ຺ຕໂຣ;

ປຏິຄ຺ຄເຫສິ ຠຄວາ, ອນຸກມ຺ປາຍ ຈກ຺ຂຸມາ.

໒໙. ‘‘ປຏິຄ຺ຄເຫຕ຺ວານ ສມ຺ພຸທ຺ໂຘ, ທກ຺ຂິເຓຍ຺ໂຍ ສເທວເກ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໓໐. ‘‘‘ໂຍ ໂສ ຫຏ຺ເຐນ ຈິຕ຺ເຕນ, ທີຆສາລໍ ອທາສິ [ອກາສິ (ສີ.)] ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໑. ‘‘‘ອິມສ຺ສ ມຈ຺ຈຸກາລມ຺ຫິ, ປຸຎ຺ຎກມ຺ມສມງ຺ຄິໂນ;

ສຫສ຺ສຍຸຕ຺ຕສ຺ສຣໂຖ, ອຸປຏ຺ຐິສ຺ສຕິ ຕາວເທ.

໓໒. ‘‘‘ເຕນ ຍາເນນຍໍ ໂປໂສ, ເທວໂລກໍ ຄມິສ຺ສຕິ;

ອນຸໂມທິສ຺ສເຣ ເທວາ, ສມ຺ປຕ຺ເຕ ກຸສລພ຺ຠເວ [ກຸສເລ ຠເວ (ສີ. ສ຺ຍາ.)].

໓໓. ‘‘‘ມຫາຣຫໍ ພ຺ຍມ຺ຫໍ ເສຏ຺ຐໍ, ຣຕນມຕ຺ຕິກເລປນໍ;

ກູຏາຄາຣວຣູເປຕໍ, ພ຺ຍມ຺ຫໍ ອຊ຺ຌາວສິສ຺ສຕິ.

໓໔. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ປຎ຺ຈວີສຕິ ກປ຺ປານິ, ເທວຣາຊາ ຠວິສ຺ສຕິ.

໓໕. ‘‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ຍໂສຘຣສນາມາ [ຍເສຘຣາ ສມານາ (ສີ.)] ເຕ, ສພ຺ເພປິ ເອກນາມກາ.

໓໖. ‘‘‘ທ຺ເວ ສມ຺ປຕ຺ຕີ ອນຸໂຠຕ຺ວາ, ວຑ຺ເຒຕ຺ວາ [ຈິນິຕ຺ວາ (ສ຺ຍາ.)] ປຸຎ຺ຎສຎ຺ຈຍໍ;

ອຏ຺ຐວີສຕິກປ຺ປມ຺ຫິ, ຈກ຺ກວຕ຺ຕີ ຠວິສ຺ສຕິ.

໓໗. ‘‘‘ຕຕ຺ຣາປິ ພ຺ຍມ຺ຫໍ ປວຣໍ, ວິສ຺ສກມ຺ເມນ ມາປິຕໍ;

ທສສທ຺ທາວິວິຕ຺ຕໍ ຕໍ, ປຸຣມຊ຺ຌາວສິສ຺ສຕິ.

໓໘. ‘‘‘ອປຣິເມຍ຺ເຍ ອິໂຕ ກປ຺ເປ, ຠູມິປາໂລ ມຫິທ຺ຘິໂກ;

ໂອກ຺ກາໂກ ນາມ ນາເມນ, ຣາຊາ ຣຏ຺ເຐ ຠວິສ຺ສຕິ.

໓໙. ‘‘‘ໂສຬສິຕ຺ຖິສຫສ຺ສານໍ, ສພ຺ພາສໍ ປວຣາ ຈ ສາ [ປວຣາວ ຍາ (ສ຺ຍາ.), ປວຣາ ປິຍາ (?)];

ອຠິຊາຕາ ຂຕ຺ຕິຍານີ, ນວ ປຸຕ຺ເຕ ຊເນສ຺ສຕິ.

໔໐. ‘‘‘ນວ ປຸຕ຺ເຕ ຊເນຕ຺ວານ, ຂຕ຺ຕິຍານີ ມຣິສ຺ສຕິ;

ຕຣຸຓີ ຈ ປິຍາ ກຎ຺ຎາ, ມເຫສິຕ຺ຕໍ ກຣິສ຺ສຕິ.

໔໑. ‘‘‘ໂອກ຺ກາກໍ ໂຕສຍິຕ຺ວານ, ວຣໍ ກຎ຺ຎາ ລຠິສ຺ສຕິ;

ວຣໍ ລທ຺ຘານ ສາ ກຎ຺ຎາ, ປຸຕ຺ເຕ ປພ຺ພາຊຍິສ຺ສຕິ.

໔໒. ‘‘‘ປພ຺ພາຊິຕາ ຈ ເຕ ສພ຺ເພ, ຄມິສ຺ສນ຺ຕິ ນຄຸຕ຺ຕມໍ;

ຊາຕິເຠທຠຍາ ສພ຺ເພ, ຠຄິນີຫິ ວສິສ຺ສເຣ [ສໍວສິສ຺ສເຣ (ສີ.)].

໔໓. ‘‘‘ເອກາ ຈ ກຎ຺ຎາ ພ຺ຍາຘີຫິ, ຠວິສ຺ສຕິ ປຣິກ຺ຂຕາ [ປຸຣກ຺ຂຕາ (ສ຺ຍາ. ກ.)];

ມາ ໂນ ຊາຕິ ປຠິຊ຺ຊີຕິ, ນິຂຓິສ຺ສນ຺ຕິ ຂຕ຺ຕິຍາ.

໔໔. ‘‘‘ຂຕ຺ຕິໂຍ ນີຫຣິຕ຺ວານ, ຕາຍ ສທ຺ຘິໍ ວສິສ຺ສຕິ;

ຠວິສ຺ສຕິ ຕທາ ເຠໂທ, ໂອກ຺ກາກກຸລສມ຺ຠໂວ.

໔໕. ‘‘‘ເຕສໍ ປຊາ ຠວິສ຺ສນ຺ຕິ, ໂກຬິຍາ ນາມ ຊາຕິຍາ;

ຕຕ຺ຖ ມານຸສກໍ ໂຠຄໍ, ອນຸໂຠສ຺ສຕິນປ຺ປກໍ.

໔໖. ‘‘‘ຕມ຺ຫາ ກາຍາ ຈວິຕ຺ວານ, ເທວໂລກໍ ຄມິສ຺ສຕິ;

ຕຕ຺ຣາປິ ປວຣໍ ພ຺ຍມ຺ຫໍ, ລຠິສ຺ສຕິ ມໂນຣມໍ.

໔໗. ‘‘‘ເທວໂລກາ ຈວິຕ຺ວານ, ສຸກ຺ກມູເລນ ໂຈທິໂຕ;

ອາຄນ຺ຕ຺ວານ ມນຸສ຺ສຕ຺ຕໍ, ໂສໂຓ ນາມ ຠວິສ຺ສຕິ.

໔໘. ‘‘‘ອາຣທ຺ຘວີຣິໂຍ ປຫິຕຕ຺ໂຕ, ປທຫໍ ສຕ຺ຖຸ ສາສເນ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໔໙. ‘‘‘ອນນ຺ຕທສ຺ສີ ຠຄວາ, ໂຄຕໂມ ສກ຺ຍປຸງ຺ຄໂວ;

ວິເສສຎ຺ຎູ ມຫາວີໂຣ, ອຄ຺ຄຏ຺ຐາເນ ຐເປສ຺ສຕິ’.

໕໐. ‘‘ວຸຏ຺ຐມ຺ຫິ ເທເວ ຈຕຸຣງ຺ຄຸລມ຺ຫິ, ຕິເຓ ອນິເລຣິຕອງ຺ຄຓມ຺ຫິ;

ຐຕ຺ວານ ໂຍຄສ຺ສ ປຍຸຕ຺ຕຕາທິໂນ, ຕໂຕຕ຺ຕຣິໍ ປາຣມຕາ ນ ວິຊ຺ຊຕິ.

໕໑. ‘‘ອຸຕ຺ຕເມ ທມເຖ ທນ຺ໂຕ, ຈິຕ຺ຕໍ ເມ ສຸປຓີຫິຕໍ;

ຠາໂຣ ເມ ໂອຫິໂຕ ສພ຺ໂພ, ນິພ຺ພຸໂຕມ຺ຫິ ອນາສໂວ.

໕໒. ‘‘ອງ຺ຄີຣໂສ ມຫານາໂຄ, ອຠິຊາໂຕວ ເກສຣີ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສິ ມໍ.

໕໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂສໂຓ ໂກຬິວິໂສ [ໂກຬິຍເວສ຺ໂສ (ສີ. ສ຺ຍາ.), ໂກຏິກຓ຺ໂຓ (ກ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ໂສຓໂກຬິວິສຕ຺ເຖຣສ຺ສາປທານໍ ທຸຕິຍໍ.