໑໐. ຈຸນ຺ທຕ຺ເຖຣອປທານໍ

໑໒໕. ‘‘ສິທ຺ຘຕ຺ຖສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ອຄ຺ຆິຍໍ ກາຣຍິຕ຺ວານ, ຊາຕິປຸປ຺ເຜຫິ ຉາທຍິໍ.

໑໒໖. ‘‘ນິຏ຺ຐາເປຕ຺ວານ ຕໍ ປຸປ຺ຜໍ, ພຸທ຺ຘສ຺ສ ອຸປນາມຍິໍ;

ປຸປ຺ຜາວເສສໍ ປຄ຺ຄຍ຺ຫ, ພຸທ຺ຘສ຺ສ ອຠິໂຣປຍິໍ.

໑໒໗. ‘‘ກຎ຺ຈນຄ຺ຆິຍສງ຺ກາສໍ, ພຸທ຺ຘໍ ໂລກຄ຺ຄນາຍກໍ;

ປສນ຺ນຈິຕ຺ໂຕ ສຸມໂນ, ປຸປ຺ຜຄ຺ຆິຍມຸປານຍິໍ.

໑໒໘. ‘‘ວິຕິຓ຺ຓກງ຺ໂຂ ສມ຺ພຸທ຺ໂຘ, ຕິຓ຺ໂຓເຆຫິ ປຸຣກ຺ຂໂຕ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໑໒໙. ‘‘‘ທິພ຺ພຄນ຺ຘໍ ປວາຍນ຺ຕໍ, ໂຍ ເມ ປຸປ຺ຜຄ຺ຆິຍໍ ອທາ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໑໓໐. ‘‘‘ອິໂຕ ຈຸໂຕ ອຍໍ ໂປໂສ, ເທວສງ຺ຆປຸຣກ຺ຂໂຕ;

ຊາຕິປຸປ຺ເຜຫິ ປຣິກິຓ຺ໂຓ, ເທວໂລກໍ ຄມິສ຺ສຕິ.

໑໓໑. ‘‘‘ອຸພ຺ພິທ຺ຘໍ ຠວນໍ ຕສ຺ສ, ໂສວຓ຺ຓຎ຺ຈ ມຓີມຍໍ;

ພ຺ຍມ຺ຫໍ ປາຕຸຠວິສ຺ສຕິ, ປຸຎ຺ຎກມ຺ມປ຺ປຠາວິຕໍ.

໑໓໒. ‘‘‘ຈຕຸສຕ຺ຕຕິກ຺ຂຕ຺ຕຸໍ ໂສ, ເທວຣຊ຺ຊໍ ກຣິສ຺ສຕິ;

ອນຸໂຠສ຺ສຕິ ສມ຺ປຕ຺ຕິໍ, ອຈ຺ຉຣາຫິ ປຸຣກ຺ຂໂຕ.

໑໓໓. ‘‘‘ປຖພ຺ຍາ ຣຊ຺ຊໍ ຕິສຕໍ, ວສຸຘໍ ອາວສິສ຺ສຕິ;

ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ.

໑໓໔. ‘‘‘ທຸຊ຺ຊໂຍ ນາມ ນາເມນ, ເຫສ຺ສຕິ ມນຸຊາຘິໂປ;

ອນຸໂຠຕ຺ວານ ຕໍ ປຸຎ຺ຎໍ, ສກກມ຺ມໍ ອປສ຺ສິໂຕ [ສກກມ຺ມູປສໍຫິໂຕ (ສ຺ຍາ.)].

໑໓໕. ‘‘‘ວິນິປາຕໍ ອຄນ຺ຕ຺ວານ, ມນຸສ຺ສຕ຺ຕໍ ຄມິສ຺ສຕິ;

ຫິຣຎ຺ຎໍ ຕສ຺ສ [ຫິຣຎ຺ຎສ຺ສ ຈ (ສີ. ກ.)] ນິຈິຕໍ, ໂກຏິສຕມນປ຺ປກໍ.

໑໓໖. ‘‘‘ນິພ຺ພຕ຺ຕິສ຺ສຕິ ໂຍນິມ຺ຫິ, ພ຺ຣາຫ຺ມເຓ ໂສ ຠວິສ຺ສຕິ;

ວງ຺ຄນ຺ຕສ຺ສ ສຸໂຕ ຘີມາ, ສາຣິຍາ ໂອຣໂສ ປິໂຍ.

໑໓໗. ‘‘‘ໂສ ຈ ປຈ຺ຉາ ປພ຺ພຊິຕ຺ວາ, ອງ຺ຄີຣສສ຺ສ ສາສເນ;

ຈູຬຈຸນ຺ໂທຕິ [ຈູລຈຸນ຺ໂທຕິ (ສີ.)] ນາເມນ, ເຫສ຺ສຕິ ສຕ຺ຖຸ ສາວໂກ.

໑໓໘. ‘‘‘ສາມເຓໂຣວ ໂສ ສນ຺ໂຕ, ຂີຓາສໂວ ຠວິສ຺ສຕິ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໑໓໙. ‘‘ອຸປຏ຺ຐຫິໍ ມຫາວີຣໍ, ອຎ຺ເຎ ຈ ເປສເລ ພຫູ;

ຠາຕຣໍ ເມ ຈຸປຏ຺ຐາສິໍ, ອຸຕ຺ຕມຕ຺ຖສ຺ສ ປຕ຺ຕິຍາ.

໑໔໐. ‘‘ຠາຕຣໍ ເມ ອຸປຏ຺ຐິຕ຺ວາ, ຘາຕຸໍ ປຕ຺ຕມ຺ຫິ ໂອຫິຍ [ໂອປິຍ (ສີ.), ໂອຈິຍ (ສ຺ຍາ.)];

ສມ຺ພຸທ຺ຘໍ ອຸປນາເມສິໍ, ໂລກເຊຏ຺ຐໍ ນຣາສຠໍ.

໑໔໑. ‘‘ອຸໂຠ ຫຕ຺ເຖຫິ ປຄ຺ຄຍ຺ຫ, ພຸທ຺ໂຘ ໂລເກ ສເທວເກ;

ສນ຺ທສ຺ສຍນ຺ໂຕ ຕໍ ຘາຕຸໍ, ກິຕ຺ຕຍິ ອຄ຺ຄສາວກໍ.

໑໔໒. ‘‘ຈິຕ຺ຕຎ຺ຈ ສຸວິມຸຕ຺ຕໍ ເມ, ສທ຺ຘາ ມຍ຺ຫໍ ປຕິຏ຺ຐິຕາ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໑໔໓. ‘‘ປຏິສມ຺ຠິທານຸປ຺ປຕ຺ຕາ, ວິໂມກ຺ຂາປິ ຈ ຜສ຺ສິຕາ [ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ (ສ຺ຍາ.)];

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຈຸນ຺ໂທ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຈຸນ຺ທຕ຺ເຖຣສ຺ສາປທານໍ ທສມໍ.

ອຸປາລິວຄ຺ໂຄ ປຎ຺ຈໂມ.