໙. ຘມ຺ມຣຸຈິຍຕ຺ເຖຣອປທານໍ

໑໖໔. ‘‘ຍທາ ທີປງ຺ກໂຣ ພຸທ຺ໂຘ, ສຸເມຘໍ ພ຺ຍາກຣີ ຊິໂນ;

‘ອປຣິເມຍ຺ເຍ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໖໕. ‘‘‘ອິມສ຺ສ ຊນິກາ ມາຕາ, ມາຍາ ນາມ ຠວິສ຺ສຕິ;

ປິຕາ ສຸທ຺ໂຘທໂນ ນາມ, ອຍໍ ເຫສ຺ສຕິ ໂຄຕໂມ.

໑໖໖. ‘‘‘ປຘານໍ ປທຫິຕ຺ວານ, ກຕ຺ວາ ທຸກ຺ກຣກາຣິກໍ;

ອສ຺ສຕ຺ຖມູເລ ສມ຺ພຸທ຺ໂຘ, ພຸຊ຺ຌິສ຺ສຕິ ມຫາຍໂສ.

໑໖໗. ‘‘‘ອຸປຕິສ຺ໂສ ໂກລິໂຕ ຈ, ອຄ຺ຄາ ເຫສ຺ສນ຺ຕິ ສາວກາ;

ອານນ຺ໂທ ນາມ ນາເມນ [ອານນ຺ໂທ ນາມຸປຏ຺ຐາໂກ (ສ຺ຍາ.)], ອຸປຏ຺ຐິສ຺ສຕິມໍ ຊິນໍ.

໑໖໘. ‘‘‘ເຂມາ ອຸປ຺ປລວຓ຺ຓາ ຈ, ອຄ຺ຄາ ເຫສ຺ສນ຺ຕິ ສາວິກາ;

ຈິຕ຺ໂຕ ອາຬວໂກ ເຈວ, ອຄ຺ຄາ ເຫສ຺ສນ຺ຕຸປາສກາ.

໑໖໙. ‘‘‘ຂຸຊ຺ຊຸຕ຺ຕຣາ ນນ຺ທມາຕາ, ອຄ຺ຄາ ເຫສ຺ສນ຺ຕຸປາສິກາ;

ໂພຘິ ອິມສ຺ສ ວີຣສ຺ສ, ອສ຺ສຕ຺ໂຖຕິ ປວຸຈ຺ຈຕິ’.

໑໗໐. ‘‘ອິທໍ ສຸຕ຺ວານ ວຈນໍ, ອສມສ຺ສ ມເຫສິໂນ;

ອາໂມທິຕາ ນຣມຣູ, ນມສ຺ສນ຺ຕິ ກຕຎ຺ຊລີ.

໑໗໑. ‘‘ຕທາຫໍ ມາຓໂວ ອາສິໍ, ເມໂຆ ນາມ ສຸສິກ຺ຂິໂຕ;

ສຸຕ຺ວາ ພ຺ຍາກຣຓໍ ເສຏ຺ຐໍ, ສຸເມຘສ຺ສ ມຫາມຸເນ.

໑໗໒. ‘‘ສໍວິສຏ຺ໂຐ ຠວິຕ຺ວານ, ສຸເມເຘ ກຣຸຓາສເຍ [ກຣຸຓາລເຍ (ສ຺ຍາ.)];

ປພ຺ພຊນ຺ຕຎ຺ຈ ຕໍ ວີຣໍ, ສຫາວ ອນຸປພ຺ພຊິໍ.

໑໗໓. ‘‘ສໍວຸໂຕ ປາຕິໂມກ຺ຂສ຺ມິໍ, ອິນ຺ທ຺ຣິເຍສຸ ຈ ປຎ຺ຈສຸ;

ສຸທ຺ຘາຊີໂວ ສໂຕ ວີໂຣ, ຊິນສາສນກາຣໂກ.

໑໗໔. ‘‘ເອວໍ ວິຫຣມາໂນຫໍ, ປາປມິຕ຺ເຕນ ເກນຈິ;

ນິໂຍຊິໂຕ ອນາຈາເຣ, ສຸມຄ຺ຄາ ປຣິຘໍສິໂຕ.

໑໗໕. ‘‘ວິຕກ຺ກວສິໂກ ຫຸຕ຺ວາ, ສາສນໂຕ ອປກ຺ກມິໍ;

ປຈ຺ຉາ ເຕນ ກຸມິຕ຺ເຕນ, ປຍຸຕ຺ໂຕ ມາຕຸຆາຕນໍ.

໑໗໖. ‘‘ອກຣິໍ ອານນ຺ຕຣິຍໍ [ອກຣິໍ ນນ຺ຕຣິຍຎ຺ຈ (ສ຺ຍາ. ກ.)], ຆາຕຍິໍ ທຸຏ຺ຐມານໂສ;

ຕໂຕ ຈຸໂຕ ມຫາວີຈິໍ, ອຸປປນ຺ໂນ ສຸທາຣຸຓໍ.

໑໗໗. ‘‘ວິນິປາຕຄໂຕ ສນ຺ໂຕ, ສໍສຣິໍ ທຸກ຺ຂິໂຕ ຈິຣໍ;

ນ ປຸໂນ ອທ຺ທສໍ ວີຣໍ, ສຸເມຘໍ ນຣປຸງ຺ຄວໍ.

໑໗໘. ‘‘ອສ຺ມິໍ ກປ຺ເປ ສມຸທ຺ທມ຺ຫິ, ມຈ຺ໂຉ ອາສິໍ ຕິມິງ຺ຄໂລ;

ທິສ຺ວາຫໍ ສາຄເຣ ນາວໍ, ໂຄຈຣຕ຺ຖມຸປາຄມິໍ.

໑໗໙. ‘‘ທິສ຺ວາ ມໍ ວາຓິຊາ ຠີຕາ, ພຸທ຺ຘເສຏ຺ຐມນຸສ຺ສຣຸໍ;

ໂຄຕໂມຕິ ມຫາໂຆສໍ, ສຸຕ຺ວາ ເຕຫິ ອຸທີຣິຕໍ.

໑໘໐. ‘‘ປຸພ຺ພສຎ຺ຎໍ ສຣິຕ຺ວານ, ຕໂຕ ກາລງ຺ກໂຕ ອຫໍ;

ສາວຕ຺ຖິຍໍ ກຸເລ ອິທ຺ເຘ, ຊາໂຕ ພ຺ຣາຫ຺ມຓຊາຕິຍໍ.

໑໘໑. ‘‘ອາສິໍ ຘມ຺ມຣຸຈິ ນາມ, ສພ຺ພປາປຊິຄຸຈ຺ຉໂກ;

ທິສ຺ວາຫໍ ໂລກປຊ຺ໂຊຕໍ, ຊາຕິຍາ ສຕ຺ຕວສ຺ສິໂກ.

໑໘໒. ‘‘ມຫາເຊຕວນໍ ຄນ຺ຕ຺ວາ, ປພ຺ພຊິໍ ອນຄາຣິຍໍ;

ອຸເປມິ ພຸທ຺ຘໍ ຕິກ຺ຂຕ຺ຕຸໍ, ຣຕ຺ຕິຍາ ທິວສສ຺ສ ຈ.

໑໘໓. ‘‘ຕທາ ທິສ຺ວາ ມຸນິ ອາຫ, ຈິຣໍ ຘມ຺ມຣຸຈີຕິ ມໍ;

ຕໂຕຫໍ ອວຈໍ ພຸທ຺ຘໍ, ປຸພ຺ພກມ຺ມປຠາວິຕໍ.

໑໘໔. ‘‘ສຸຈິຣໍ ສຕປຸຎ຺ຎລກ຺ຂຓໍ, ປຕິປຸພ຺ເພນ ວິສຸທ຺ຘປຈ຺ຈຍໍ;

ອຫມຊ຺ຊສຸເປກ຺ຂນໍ ວຕ, ຕວ ປສ຺ສາມິ ນິຣຸປມໍ ວິຄ຺ຄຫໍ [ນິຣູປມຄ຺ຄຫໍ (ສີ.)].

໑໘໕. ‘‘ສຸຈິຣໍ ວິຫຕຕ຺ຕໂມ ມຍາ, ສຸຈິຣກ຺ເຂນ ນທີ ວິໂສສິຕາ;

ສຸຈິຣໍ ອມລໍ ວິໂສຘິຕໍ, ນຍນໍ ຎາຓມຍໍ ມຫາມຸເນ.

໑໘໖. ‘‘ຈິຣກາລສມງ຺ຄິໂຕ [ຈິຣກາລໍ ສມາຄໂຕ (ປີ.)] ຕຍາ, ອວິນຏ຺ໂຐ ປຸນຣນ຺ຕຣໍ ຈິຣໍ;

ປຸນຣຊ຺ຊສມາຄໂຕ ຕຍາ, ນ ຫິ ນສ຺ສນ຺ຕິ ກຕານິ ໂຄຕມ.

໑໘໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໘໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໘໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຘມ຺ມຣຸຈິໂຍ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຘມ຺ມຣຸຈິຍຕ຺ເຖຣສ຺ສາປທານໍ ນວມໍ.