໗. ປຸລິນຸປ຺ປາທກຕ຺ເຖຣອປທານໍ

໑໑໑. ‘‘ປພ຺ພເຕ ຫິມວນ຺ຕມ຺ຫິ, ເທວໂລ ນາມ ຕາປໂສ;

ຕຕ຺ຖ ເມ ຈງ຺ກໂມ ອາສິ, ອມນຸສ຺ເສຫິ ມາປິໂຕ.

໑໑໒. ‘‘ຊຏາຠາເຣນ [ຊຏາຠາຣສ຺ສ (ສ຺ຍາ. ກ.)] ຠຣິໂຕ, ກມຓ຺ຑລຸຘໂຣ ສທາ;

ອຸຕ຺ຕມຕ຺ຖໍ ຄເວສນ຺ໂຕ, ວິປິນາ ນິກ຺ຂມິໍ ຕທາ.

໑໑໓. ‘‘ຈຸລ຺ລາສີຕິສຫສ຺ສານິ, ສິສ຺ສາ ມຍ຺ຫໍ ອຸປຏ຺ຐຫຸໍ;

ສກກມ຺ມາຠິປສຸຕາ, ວສນ຺ຕິ ວິປິເນ ຕທາ.

໑໑໔. ‘‘ອສ຺ສມາ ອຠິນິກ຺ຂມ຺ມ, ອກໍ ປຸລິນເຈຕິຍໍ;

ນານາປຸປ຺ຜໍ ສມາເນຕ຺ວາ, ຕໍ ເຈຕິຍມປູຊຍິໍ.

໑໑໕. ‘‘ຕຕ຺ຖ ຈິຕ຺ຕໍ ປສາເທຕ຺ວາ, ອສ຺ສມໍ ປວິສາມຫໍ;

ສພ຺ເພ ສິສ຺ສາ ສມາຄນ຺ຕ຺ວາ, ເອຕມຕ຺ຖໍ ປຸຈ຺ຉິໍສຸ ມໍ [ເອຕມຕ຺ຖມປຸຈ຺ຉຸ ມໍ (ສີ.), ເອຕມຕ຺ຕໍ ອປຸຈ຺ຉິໍສຸ (ສ຺ຍາ. ກ.)].

໑໑໖. ‘‘‘ປຸລິເນນ ກໂຕ ຖູໂປ [ກໂຕ ຖູເປ (ສີ.)], ຍໍ ຕ຺ວໍ ເທວ [ເທວໍ (ສີ. ປີ.)] ມສ຺ສຕິ;

ມຍມ຺ປິ ຎາຕຸມິຈ຺ຉາມ, ປຸຏ຺ໂຐ ອາຈິກ຺ຂ ໂນ ຕຸວໍ’.

໑໑໗. ‘‘‘ນິທ຺ທິຏ຺ຐາ ນຸ [ນິທ຺ທິຏ຺ຐາ ໂນ (ສີ. ປີ.), ທິຏ຺ຐາໂນ ໂວ (ສ຺ຍາ.)] ມນ຺ຕປເທ, ຈກ຺ຂຸມນ຺ໂຕ ມຫາຍສາ;

ເຕ ໂຂ ອຫໍ ນມສ຺ສາມິ, ພຸທ຺ຘເສຏ຺ເຐ ມຫາຍເສ’.

໑໑໘. ‘‘‘ກີທິສາ ເຕ ມຫາວີຣາ, ສພ຺ພຎ຺ຎູ ໂລກນາຍກາ;

ກຖໍວຓ຺ຓາ ກຖໍສີລາ, ກີທິສາ ເຕ ມຫາຍສາ’.

໑໑໙. ‘‘‘ພາຕ຺ຕິໍສລກ຺ຂຓາ ພຸທ຺ຘາ, ຈຕ຺ຕາລີສທິຊາປິ ຈ;

ເນຕ຺ຕາ ໂຄປຂຸມາ ເຕສໍ, ຊິຎ຺ຊຸກາ ຜລສນ຺ນິຠາ.

໑໒໐. ‘‘‘ຄຈ຺ຉມານາ ຈ ເຕ ພຸທ຺ຘາ, ຍຸຄມຕ຺ຕຎ຺ຈ ເປກ຺ຂເຣ;

ນ ເຕສໍ ຊາຓຸ ນທຕິ, ສນ຺ຘິສທ຺ໂທ ນ ສຸຍ຺ຍຕິ.

໑໒໑. ‘‘‘ຄຈ຺ຉມານາ ຈ ສຸຄຕາ, ອຸທ຺ຘຣນ຺ຕາວ ຄຈ຺ຉເຣ;

ປຐມໍ ທກ຺ຂິຓໍ ປາທໍ, ພຸທ຺ຘານໍ ເອສ ຘມ຺ມຕາ.

໑໒໒. ‘‘‘ອສມ຺ຠີຕາ ຈ ເຕ ພຸທ຺ຘາ, ມິຄຣາຊາວ ເກສຣີ;

ເນວຸກ຺ກໍເສນ຺ຕິ ອຕ຺ຕານໍ, ໂນ ຈ ວມ຺ເຠນ຺ຕິ ປາຓິນໍ.

໑໒໓. ‘‘‘ມານາວມານໂຕ ມຸຕ຺ຕາ, ສມາ ສພ຺ເພສຸ ປາຓິສຸ;

ອນຕ຺ຕຸກ຺ກໍສກາ ພຸທ຺ຘາ, ພຸທ຺ຘານໍ ເອສ ຘມ຺ມຕາ.

໑໒໔. ‘‘‘ອຸປ຺ປຊ຺ຊນ຺ຕາ ຈ ສມ຺ພຸທ຺ຘາ, ອາໂລກໍ ທສ຺ສຍນ຺ຕິ ເຕ;

ຉປ຺ປກາຣໍ ປກມ຺ເປນ຺ຕິ, ເກວລໍ ວສຸຘໍ ອິມໍ.

໑໒໕. ‘‘‘ປສ຺ສນ຺ຕິ ນິຣຍຎ຺ເຈເຕ, ນິພ຺ພາຕິ ນິຣໂຍ ຕທາ;

ປວສ຺ສຕິ ມຫາເມໂຆ, ພຸທ຺ຘານໍ ເອສ ຘມ຺ມຕາ.

໑໒໖. ‘‘‘ອີທິສາ ເຕ ມຫານາຄາ, ອຕຸລາ ຈ [ເຕ (ສ຺ຍາ. ກ.)] ມຫາຍສາ;

ວຓ຺ຓໂຕ ອນຕິກ຺ກນ຺ຕາ, ອປ຺ປເມຍ຺ຍາ ຕຖາຄຕາ’.

໑໒໗. ‘‘‘ອນຸໂມທິໍສຸ ເມ ວາກ຺ຍໍ, ສພ຺ເພ ສິສ຺ສາ ສຄາຣວາ;

ຕຖາ ຈ ປຏິປຊ຺ຊິໍສຸ, ຍຖາສຕ຺ຕິ ຍຖາພລໍ’.

໑໒໘. ‘‘ປຏິປູເຊນ຺ຕິ ປຸລິນໍ, ສກກມ຺ມາຠິລາສິໂນ;

ສທ຺ທຫນ຺ຕາ ມມ ວາກ຺ຍໍ, ພຸທ຺ຘສກ຺ກຕມານສາ [ພຸທ຺ຘຕ຺ຕຄຕມານສາ (ສີ. ສ຺ຍາ. ປີ.)].

໑໒໙. ‘‘ຕທາ ຈວິຕ຺ວາ ຕຸສິຕາ, ເທວປຸຕ຺ໂຕ ມຫາຍໂສ;

ອຸປ຺ປຊ຺ຊິ ມາຕຸກຸຈ຺ຉິມ຺ຫິ, ທສສຫສ຺ສິ ກມ຺ປຖ.

໑໓໐. ‘‘ອສ຺ສມສ຺ສາວິທູຣມ຺ຫິ, ຈງ຺ກມມ຺ຫິ ຐິໂຕ ອຫໍ;

ສພ຺ເພ ສິສ຺ສາ ສມາຄນ຺ຕ຺ວາ, ອາຄຈ຺ຉຸໍ ມມ ສນ຺ຕິເກ.

໑໓໑. ‘‘ອຸສໂຠວ ມຫີ ນທຕິ, ມິຄຣາຊາວ ກູຊຕິ;

ສຸສຸມາໂຣວ [ສຸໍສຸມາໂຣວ (ສີ. ສ຺ຍາ. ປີ.)] ສຬຕິ, ກິໍ ວິປາໂກ ຠວິສ຺ສຕິ.

໑໓໒. ‘‘ຍໍ ປກິຕ຺ເຕມິ ສມ຺ພຸທ຺ຘໍ, ສິກຕາຖູປສນ຺ຕິເກ;

ໂສ ທານິ ຠຄວາ ສຕ຺ຖາ, ມາຕຸກຸຈ຺ຉິມຸປາຄມິ.

໑໓໓. ‘‘ເຕສໍ ຘມ຺ມກຖໍ ວຕ຺ວາ, ກິຕ຺ຕຍິຕ຺ວາ ມຫາມຸນິໍ;

ອຸຍ຺ໂຍເຊຕ຺ວາ ສເກ ສິສ຺ເສ, ປລ຺ລງ຺ກມາຠຸຊິໍ ອຫໍ.

໑໓໔. ‘‘ພລຎ຺ຈ ວຕ ເມ ຂີຓໍ, ພ຺ຍາຘິນາ [ພ຺ຍາຘິໂຕ (ສີ. ສ຺ຍາ. ປີ. ກ.)] ປຣເມນ ຕໍ;

ພຸທ຺ຘເສຏ຺ຐໍ ສຣິຕ຺ວານ, ຕຕ຺ຖ ກາລງ຺ກໂຕ [ກາລກໂຕ (ສີ. ປີ.)] ອຫໍ.

໑໓໕. ‘‘ສພ຺ເພ ສິສ຺ສາ ສມາຄນ຺ຕ຺ວາ, ອກໍສຸ ຈິຕກໍ ຕທາ;

ກເຬວຣຎ຺ຈ ເມ ຄຍ຺ຫ, ຈິຕກໍ ອຠິໂຣປຍຸໍ.

໑໓໖. ‘‘ຈິຕກໍ ປຣິວາເຣຕ຺ວາ, ສີເສ ກຕ຺ວານ ອຎ຺ຊລິໍ;

ໂສກສລ຺ລປເຣຕາ ເຕ, ວິກ຺ກນ຺ທິໍສຸ ສມາຄຕາ.

໑໓໗. ‘‘ເຕສໍ ລາລປ຺ປມານານໍ, ອຄມໍ ຈິຕກໍ ຕທາ;

‘ອຫໍ ອາຈຣິໂຍ ຕຸມ຺ຫໍ, ມາ ໂສຈິຕ຺ຖ ສຸເມຘສາ.

໑໓໘. ‘‘‘ສທຕ຺ເຖ ວາຍເມຍ຺ຍາຖ, ຣຕ຺ຕິນ຺ທິວມຕນ຺ທິຕາ;

ມາ ໂວ ປມຕ຺ຕາ ອຫຸຕ຺ຖ [ອຫຸວຕ຺ຖ (ສີ.)], ຂໂຓ ໂວ ປຏິປາທິໂຕ’.

໑໓໙. ‘‘ສເກ ສິສ຺ເສນຸສາສິຕ຺ວາ, ເທວໂລກໍ ປຸນາຄມິໍ;

ອຏ຺ຐາຣສ ຈ ກປ຺ປານິ, ເທວໂລເກ ຣມາມຫໍ.

໑໔໐. ‘‘ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ອເນກສຕກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

໑໔໑. ‘‘ອວເສເສສຸ ກປ຺ເປສຸ, ໂວກິຓ຺ໂຓ [ໂວກິຓ຺ຓໍ (ສີ. ສ຺ຍາ. ກ.)] ສໍສຣິໍ ອຫໍ;

ທຸຄ຺ຄຕິໍ ນາຠິຊານາມິ, ອຸປ຺ປາທສ຺ສ ອິທໍ ຜລໍ [ປຸລິນປູຊາຍິທໍ ຜລໍ (ສີ.)].

໑໔໒. ‘‘ຍຖາ ໂກມຸທິເກ ມາເສ, ພຫູ ປຸປ຺ຜນ຺ຕິ ປາທປາ;

ຕເຖວາຫມ຺ປິ ສມເຍ, ປຸປ຺ຜິໂຕມ຺ຫິ ມເຫສິນາ.

໑໔໓. ‘‘ວີຣິຍໍ ເມ ຘຸຣໂຘຣຍ຺ຫໍ, ໂຍຄກ຺ເຂມາຘິວາຫນໍ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໑໔໔. ‘‘ສຕສຫສ຺ສິໂຕ ກປ຺ເປ, ຍໍ ພຸທ຺ຘມຠິກິຕ຺ຕຍິໍ;

ທຸຄ຺ຄຕິໍ ນາຠິຊານາມິ, ກິຕ຺ຕນາຍ ອິທໍ ຜລໍ.

໑໔໕. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໔໖. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໔໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຸລິນຸປ຺ປາທໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ປຸລິນຸປ຺ປາທກຕ຺ເຖຣສ຺ສາປທານໍ ສຕ຺ຕມໍ.