໓. ອຸກ຺ກາສຕິກຕ຺ເຖຣອປທານໍ

໓໐. ‘‘ໂກສິໂກ ນາມ ຠຄວາ, ຈິຕ຺ຕກູເຏ ວສີ ຕທາ;

ຌາຍີ ຌານຣໂຕ ພຸທ຺ໂຘ, ວິເວກາຠິຣໂຕ ມຸນິ.

໓໑. ‘‘ອຊ຺ໂຌຄາເຫຕ຺ວາ [ອຊ຺ໂຌຄເຫຕ຺ວາ (ສີ. ສ຺ຍາ. ປີ.)] ຫິມວນ຺ຕໍ, ນາຣີຄຓປຸຣກ຺ຂໂຕ;

ອທ຺ທສໍ ໂກສິກໍ ພຸທ຺ຘໍ, ປຸຓ຺ຓມາເຍວ ຈນ຺ທິມໍ.

໓໒. ‘‘ອຸກ຺ກາສເຕ ຄເຫຕ຺ວານ, ປຣິວາເຣສຫໍ ຕທາ;

ສຕ຺ຕຣຕ຺ຕິນ຺ທິວໍ ຐຕ຺ວາ [ພຸທ຺ໂຘ (ສ຺ຍາ. ກ.)], ອຏ຺ຐເມນ ອຄຈ຺ຉຫໍ.

໓໓. ‘‘ວຸຏ຺ຐິຕໍ ໂກສິກໍ ພຸທ຺ຘໍ, ສຍມ຺ຠຸໍ ອປຣາຊິຕໍ;

ປສນ຺ນຈິຕ຺ໂຕ ວນ຺ທິຕ຺ວາ, ເອກໍ ຠິກ຺ຂໍ ອທາສຫໍ.

໓໔. ‘‘ເຕນ ກມ຺ເມນ ທ຺ວິປທິນ຺ທ, ໂລກເຊຏ຺ຐ ນຣາສຠ;

ອຸປ຺ປຊ຺ຊິໍ ຕຸສິເຕ ກາເຍ, ເອກຠິກ຺ຂາຍິທໍ ຜລໍ.

໓໕. ‘‘ທິວສຎ຺ເຈວ ຣຕ຺ຕິຎ຺ຈ, ອາໂລໂກ ໂຫຕິ ເມ ສທາ;

ສມນ຺ຕາ ໂຍຊນສຕໍ, ໂອຠາເສນ ຜຣາມຫໍ.

໓໖. ‘‘ປຎ຺ຈປຎ຺ຎາສກປ຺ປມ຺ຫິ, ຈກ຺ກວຕ຺ຕີ ອໂຫສຫໍ;

ຈາຕຸຣນ຺ໂຕ ວິຊິຕາວີ, ຊມ຺ພຸມຓ຺ຑສ຺ສ [ຊມ຺ພຸສຓ຺ຑສ຺ສ (ປີ.)] ອິສ຺ສໂຣ.

໓໗. ‘‘ຕທາ ເມ ນຄຣໍ ອາສິ, ອິທ຺ຘໍ ຜີຕໍ ສຸນິມ຺ມິຕໍ;

ຕິໍສໂຍຊນມາຍາມໍ, ວິຕ຺ຖາເຣນ ຈ ວີສຕິ.

໓໘. ‘‘ໂສຠຓໍ ນາມ ນຄຣໍ, ວິສ຺ສກມ຺ເມນ ມາປິຕໍ;

ທສສທ຺ທາວິວິຕ຺ຕໍ ຕໍ, ສມ຺ມຕາຬສມາຫິຕໍ.

໓໙. ‘‘ນ ຕມ຺ຫິ ນຄເຣ ອຕ຺ຖິ, ວລ຺ລິກຏ຺ຐຎ຺ຈ ມຕ຺ຕິກາ;

ສພ຺ພໂສຓ຺ຓມຍໍເຍວ, ໂຊຕເຕ ນິຈ຺ຈກາລິກໍ.

໔໐. ‘‘ຈຕຸປາກາຣປຣິກ຺ຂິຕ຺ຕໍ, ຕໂຍ ອາສຸໍ ມຓິມຍາ;

ເວມຊ຺ເຌ ຕາລປນ຺ຕີ ຈ, ວິສ຺ສກມ຺ເມນ ມາປິຕາ.

໔໑. ‘‘ທສສຫສ຺ສໂປກ຺ຂຣຎ຺ໂຎ, ປທຸມຸປ຺ປລຉາທິຕາ;

ປຸຓ຺ຑຣີເກຫິ [ປຸຓ຺ຑຣີກາທິ (ສ຺ຍາ.)] ສຎ຺ຉນ຺ນາ, ນານາຄນ຺ຘສມີຣິຕາ.

໔໒. ‘‘ຈຕຸນ຺ນວຸຕິໂຕ ກປ຺ເປ, ຍໍ ອຸກ຺ກໍ ຘາຣຍິໍ ອຫໍ;

ທຸຄ຺ຄຕິໍ ນາຠິຊານາມິ, ອຸກ຺ກຘາຣສ຺ສິທໍ ຜລໍ.

໔໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸກ຺ກາສຕິໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ອຸກ຺ກາສຕິກຕ຺ເຖຣສ຺ສາປທານໍ ຕຕິຍໍ.