໗. ເອກຉຕ຺ຕິຍຕ຺ເຖຣອປທານໍ

໓໗. ‘‘ອງ຺ຄາຣຊາຕາ ປຖວີ, ກຸກ຺ກຸຬານຸຄຕາ ມຫີ;

ປທຸມຸຕ຺ຕໂຣ ຠຄວາ, ອພ຺ໂຠກາສມ຺ຫິ ຈງ຺ກມິ.

໓໘. ‘‘ປຓ຺ຑຣໍ ຉຕ຺ຕມາທາຍ, ອທ຺ຘານໍ ປຏິປຊ຺ຊຫໍ;

ຕຕ຺ຖ ທິສ຺ວານ ສມ຺ພຸທ຺ຘໍ, ວິຕ຺ຕິ ເມ ອຸປປຊ຺ຊຖ.

໓໙. ‘‘ມຣີຈິໂຍຕ຺ຖຏາ [ມຣິຈິໂມຜຸນາ (ສ຺ຍາ.), ມຣີຈິໂວຜຸຏາ (ປີ.)] ຠູມິ, ອງ຺ຄາຣາວ ມຫີ ອຍໍ;

ອຸປຫນ຺ຕິ [ອຸປວາຍນ຺ຕິ (ສີ. ປີ.)] ມຫາວາຕາ, ສຣີຣສ຺ສາສຸເຂປນາ [ສຣີຣກາຍຸເຂປນາ (ສ຺ຍາ.)].

໔໐. ‘‘ສີຕໍ ອຸຓ຺ຫໍ ວິຫນນ຺ຕໍ [ວິຫນຕິ (ສ຺ຍາ. ກ.)], ວາຕາຕປນິວາຣຓໍ;

ປຏິຄ຺ຄຓ຺ຫ ອິມໍ ຉຕ຺ຕໍ, ຜສ຺ສຍິສ຺ສາມິ [ປສ຺ສຍິສ຺ສາມິ (ກ.)] ນິພ຺ພຸຕິໍ.

໔໑. ‘‘ອນຸກມ຺ປໂກ ກາຣຸຓິໂກ, ປທຸມຸຕ຺ຕໂຣ ມຫາຍໂສ;

ມມ ສງ຺ກປ຺ປມຎ຺ຎາຍ, ປຏິຄ຺ຄຓ຺ຫິ ຕທາ ຊິໂນ.

໔໒. ‘‘ຕິໍສກປ຺ປານິ ເທວິນ຺ໂທ, ເທວຣຊ຺ຊມກາຣຍິໍ;

ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໔໓. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ອນຸໂຠມິ ສກໍ ກມ຺ມໍ, ປຸພ຺ເພ ສຸກຕມຕ຺ຕໂນ.

໔໔. ‘‘ອຍໍ ເມ ປຈ຺ຉິມາ ຊາຕິ, ຈຣິໂມ ວຕ຺ຕເຕ ຠໂວ;

ອຊ຺ຊາປິ ເສຕຈ຺ຉຕ຺ຕໍ ເມ, ສພ຺ພກາລໍ ຘຣີຍຕິ.

໔໕. ‘‘ສຕສຫສ຺ສິໂຕ ກປ຺ເປ, ຍໍ ຉຕ຺ຕມທທິໍ ຕທາ;

ທຸຄ຺ຄຕິໍ ນາຠິຊານາມິ, ຉຕ຺ຕທານສ຺ສິທໍ ຜລໍ.

໔໖. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໗. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກຉຕ຺ຕິໂຍ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ເອກຉຕ຺ຕິຍຕ຺ເຖຣສ຺ສາປທານໍ ສຕ຺ຕມໍ.