໑໐. ໂພຘິຆຣທາຍກຕ຺ເຖຣອປທານໍ

໖໙. ‘‘ສິທ຺ຘຕ຺ຖສ຺ສ ຠຄວໂຕ, ທ຺ວິປທິນ຺ທສ຺ສ ຕາທິໂນ;

ປສນ຺ນຈິຕ຺ໂຕ ສຸມໂນ, ໂພຘິຆຣມກາຣຍິໍ.

໗໐. ‘‘ຕຸສິຕໍ ອຸປປນ຺ໂນມ຺ຫິ, ວສາມິ ຣຕເນ ຆເຣ;

ນ ເມ ສີຕໍ ວາ ອຸຓ຺ຫໍ ວາ, ວາໂຕ ຄຕ຺ເຕ ນ ສມ຺ຜຸເສ.

໗໑. ‘‘ປຎ຺ຈສຏ຺ຐິມ຺ຫິໂຕ ກປ຺ເປ, ຈກ຺ກວຕ຺ຕີ ອໂຫສຫໍ;

ກາສິກໍ ນາມ ນຄຣໍ, ວິສ຺ສກມ຺ເມນ [ວິສຸກມ຺ເມນ (ສ຺ຍາ. ກ.)] ມາປິຕໍ.

໗໒. ‘‘ທສໂຍຊນອາຍາມໍ, ອຏ຺ຐໂຍຊນວິຕ຺ຖຕໍ;

ນ ຕມ຺ຫິ ນຄເຣ ອຕ຺ຖິ, ກຏ຺ຐໍ ວລ຺ລີ ຈ ມຕ຺ຕິກາ.

໗໓. ‘‘ຕິຣິຍໍ ໂຍຊນໍ ອາສິ, ອທ຺ຘໂຍຊນວິຕ຺ຖຕໍ;

ມງ຺ຄໂລ ນາມ ປາສາໂທ, ວິສ຺ສກມ຺ເມນ ມາປິໂຕ.

໗໔. ‘‘ຈຸລ຺ລາສີຕິສຫສ຺ສານິ, ຖມ຺ຠາ ໂສຓ຺ຓມຍາ ອຫຸໍ;

ມຓິມຍາ ຈ ນິຍ຺ຍູຫາ, ຉທນໍ ຣູປິຍໍ ອຫຸ.

໗໕. ‘‘ສພ຺ພໂສຓ຺ຓມຍໍ ຆຣໍ, ວິສ຺ສກມ຺ເມນ ມາປິຕໍ;

ອຊ຺ຌາວຸຕ຺ຖໍ ມຍາ ເອຕໍ, ຆຣທານສ຺ສິທໍ ຜລໍ.

໗໖. ‘‘ເຕ ສພ຺ເພ ອນຸໂຠຕ຺ວານ, ເທວມານຸສເກ ຠເວ;

ອຊ຺ຌປຕ຺ໂຕມ຺ຫິ ນິພ຺ພານໍ, ສນ຺ຕິປທມນຸຕ຺ຕຣໍ.

໗໗. ‘‘ຕິໍສກປ຺ປສຫສ຺ສມ຺ຫິ, ໂພຘິຆຣມກາຣຍິໍ;

ທຸຄ຺ຄຕິໍ ນາຠິຊານາມິ, ຆຣທານສ຺ສິທໍ ຜລໍ.

໗໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໘໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂພຘິຆຣທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ໂພຘິຆຣທາຍກຕ຺ເຖຣສ຺ສາປທານໍ ທສມໍ.

ວິຠີຕກວຄ຺ໂຄ ປຎ຺ຈຈຕ຺ຕາລີສໂມ.