໘. ຫຣີຕກທາຍກຕ຺ເຖຣອປທານໍ

໖໐. ‘‘ຫຣີຕກໍ ອາມລກໍ, ອມ຺ພຊມ຺ພຸວິຠີຕກໍ;

ໂກລໍ ຠລ຺ລາຕກໍ ພິລ຺ລໍ, ສຍເມວ ຫຣາມຫໍ.

໖໑. ‘‘ທິສ຺ວານ ປພ຺ຠາຣຄຕໍ, ຌາຍິໍ ຌານຣຕໍ ມຸນິໍ;

ອາພາເຘນ ອາປີເຬນ຺ຕໍ, ອທຸຕີຍໍ ມຫາມຸນິໍ.

໖໒. ‘‘ຫຣີຕກໍ ຄເຫຕ຺ວານ, ສຍມ຺ຠຸສ຺ສ ອທາສຫໍ;

ຂາທມຕ຺ຕມ຺ຫິ ເຠສຊ຺ເຊ, ພ຺ຍາຘິ ປສ຺ສມ຺ຠິ [ປສ຺ສທ຺ຘິ (ກ.)] ຕາວເທ.

໖໓. ‘‘ປຫີນທຣໂຖ ພຸທ຺ໂຘ, ອນຸໂມທມກາສິ ເມ;

‘ເຠສຊ຺ຊທາເນນິມິນາ, ພ຺ຍາຘິວູປສເມນ ຈ.

໖໔. ‘‘‘ເທວຠູໂຕ ມນຸສ຺ໂສ ວາ, ຊາໂຕ ວາ ອຎ຺ຎຊາຕິຍາ;

ສພ຺ພຕ຺ຖ ສຸຂິໂຕ ໂຫຕຸ, ມາ ຈ ເຕ ພ຺ຍາຘິມາຄມາ’.

໖໕. ‘‘ອິທໍ ວຕ຺ວານ ສມ຺ພຸທ຺ໂຘ, ສຍມ຺ຠູ ອປຣາຊິໂຕ;

ນຠໍ ອພ຺ຠຸຄ຺ຄມີ ຘີໂຣ, ຫໍສຣາຊາວ ອມ຺ພເຣ.

໖໖. ‘‘ຍໂຕ ຫຣີຕກໍ ທິນ຺ນໍ, ສຍມ຺ຠຸສ຺ສ ມເຫສິໂນ;

ອິມໍ ຊາຕິໍ ອຸປາທາຍ, ພ຺ຍາຘິ ເມ ນຸປປຊ຺ຊຖ.

໖໗. ‘‘ອຍໍ ປຈ຺ຉິມໂກ ມຍ຺ຫໍ, ຈຣິໂມ ວຕ຺ຕເຕ ຠໂວ;

ຕິສ຺ໂສ ວິຊ຺ຊາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ.

໖໘. ‘‘ຈຕຸນ຺ນວຸຕິໂຕ ກປ຺ເປ, ເຠສຊ຺ຊມທທິໍ ຕທາ;

ທຸຄ຺ຄຕິໍ ນາຠິຊານາມິ, ເຠສຊ຺ຊສ຺ສ ອິທໍ ຜລໍ.

໖໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຫຣີຕກທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຫຣີຕກທາຍກຕ຺ເຖຣສ຺ສາປທານໍ ອຏ຺ຐມໍ.