໒. ເອກທຸສ຺ສທາຍກຕ຺ເຖຣອປທານໍ

໑໕. ‘‘ນຄເຣ ຫໍສວຕິຍາ, ອໂຫສິໍ ຕິຓຫາຣໂກ;

ຕິຓຫາເຣນ ຊີວາມິ, ເຕນ ໂປເສມິ ທາຣເກ.

໑໖. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຕມນ຺ຘກາຣໍ ນາເສຕ຺ວາ, ອຸປ຺ປຊ຺ຊິ ໂລກນາຍໂກ.

໑໗. ‘‘ສເກ ຆເຣ ນິສີທິຕ຺ວາ, ເອວໍ ຈິນ຺ເຕສິ ຕາວເທ;

‘ພຸທ຺ໂຘ ໂລເກ ສມຸປ຺ປນ຺ໂນ, ເທຍ຺ຍຘມ຺ໂມ ນ ວິຊ຺ຊຕິ.

໑໘. ‘‘‘ອິທໍ ເມ ສາຏກໍ ເອກໍ, ນຕ຺ຖິ ເມ ໂກຈິ ທາຍໂກ;

ທຸກ຺ໂຂ ນິຣຍສມ຺ຜສ຺ໂສ, ໂຣປຍິສ຺ສາມິ ທກ຺ຂິຓໍ’.

໑໙. ‘‘ເອວາຫໍ ຈິນ຺ຕຍິຕ຺ວານ, ສກໍ ຈິຕ຺ຕໍ ປສາທຍິໍ;

ເອກໍ ທຸສ຺ສໍ ຄເຫຕ຺ວານ, ພຸທ຺ຘເສຏ຺ຐສ຺ສທາສຫໍ.

໒໐. ‘‘ເອກໍ ທຸສ຺ສໍ ທທິຕ຺ວານ, ອຸກ຺ກຸຏ຺ຐິໍ ສມ຺ປວຕ຺ຕຍິໍ;

‘ຍທິ ພຸທ຺ໂຘ ຕຸວໍ ວີຣ, ຕາເຣຫິ ມໍ ມຫາມຸນິ’.

໒໑. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ທານໍ ປກິຕ຺ເຕນ຺ໂຕ, ອກາ ເມ ອນຸໂມທນໍ.

໒໒. ‘‘‘ອິມິນາ ເອກທຸສ຺ເສນ, ເຈຕນາປຓິຘີຫິ ຈ;

ກປ຺ປສຕສຫສ຺ສານິ, ວິນິປາຕໍ ນ ຄຈ຺ຉສິ.

໒໓. ‘‘‘ຉຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສສິ;

ເຕຕ຺ຕິໍສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ [ຈກ຺ກວຕ຺ຕິ (ສ຺ຍາ.)] ຠວິສ຺ສສິ.

໒໔. ‘‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ [ອສງ຺ກຍໍ (ສ຺ຍາ. ກ.) ເອວມຸປຣິປິ];

ເທວໂລເກ ມນຸສ຺ເສ ວາ, ສໍສຣນ຺ໂຕ ຕຸວໍ ຠເວ.

໒໕. ‘‘‘ຣູປວາ ຄຸຓສມ຺ປນ຺ໂນ, ອນວກ຺ກນ຺ຕເທຫວາ [ອນຸວຕ຺ຕນ຺ຕ… (ສ຺ຍາ)];

ອກ຺ໂຂຠໍ ອມິຕໍ ທຸສ຺ສໍ, ລຠິສ຺ສສິ ຍທິຈ຺ຉກໍ’.

໒໖. ‘‘ອິທໍ ວຕ຺ວານ ສມ຺ພຸທ຺ໂຘ, ຊລຊຸຕ຺ຕມນາມໂກ;

ນຠໍ ອພ຺ຠຸຄ຺ຄມີ ວີໂຣ [ຘີໂຣ (ສີ. ສ຺ຍາ.)], ຫໍສຣາຊາວ ອມ຺ພເຣ.

໒໗. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ໂຠເຄ ເມ ອູນຕາ ນຕ຺ຖິ, ເອກທຸສ຺ສສ຺ສິທໍ ຜລໍ.

໒໘. ‘‘ປທຸທ຺ຘາເຣ ປທຸທ຺ຘາເຣ, ທຸສ຺ສໍ ນິພ຺ພຕ຺ຕເຕ ມມໍ;

ເຫຏ຺ຐາ ທຸສ຺ສມ຺ຫິ ຕິຏ຺ຐາມິ, ອຸປຣິຈ຺ຉທນໍ ມມ.

໒໙. ‘‘ຈກ຺ກວາຬໍ ອຸປາທາຍ, ສການນໍ ສປພ຺ພຕໍ;

ອິຈ຺ຉມາໂນ ຈຫໍ ອຊ຺ຊ, ທຸສ຺ເສຫຈ຺ຉາທເຍຍ຺ຍ ຕໍ.

໓໐. ‘‘ເຕເນວ ເອກທຸສ຺ເສນ, ສໍສຣນ຺ໂຕ ຠວາຠເວ;

ສຸວຓ຺ຓວຓ຺ໂຓ ຫຸຕ຺ວານ, ສໍສຣາມິ ຠວາຠເວ.

໓໑. ‘‘ວິປາກໍ ວິເອກທຸສ຺ສສ຺ສ, ນາຊ຺ຌຄໍ ກຕ຺ຖຈິກ຺ຂຍໍ;

ອຍໍ ເມ ອນ຺ຕິມາ ຊາຕິ, ວິປຈ຺ຈຕິ ອິຘາປິ ເມ.

໓໒. ‘‘ສຕສຫສ຺ສິໂຕ ກປ຺ເປ, ຍໍ ທຸສ຺ສມທທິໍ ຕທາ;

ທຸຄ຺ຄຕິໍ ນາຠິຊານາມິ, ເອກທຸສ຺ສສ຺ສິທໍ ຜລໍ.

໓໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກທຸສ຺ສທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ເອກທຸສ຺ສທາຍກຕ຺ເຖຣສ຺ສາປທານໍ ທຸຕິຍໍ.