໑໐. ໂສຓ຺ຓໂກນ຺ຕຣິກຕ຺ເຖຣອປທານໍ

໑໕໗. ‘‘ມໂນຠາວນິຍໍ ພຸທ຺ຘໍ, ອຕ຺ຕທນ຺ຕໍ ສມາຫິຕໍ;

ອິຣິຍມານໍ ພ຺ຣຫ຺ມປເຖ, ຈິຕ຺ຕວູປສເມ ຣຕໍ.

໑໕໘. ‘‘ນິຕ຺ຕິຓ຺ຓໂອຆໍ ສມ຺ພຸທ຺ຘໍ, ຌາຍິໍ ຌານຣຕໍ ມຸນິໍ;

ອຸປຕິຕ຺ຖໍ ສມາປນ຺ນໍ, ອິນ຺ທິວຣທລປ຺ປຠໍ.

໑໕໙. ‘‘ອລາພຸໂນທກໍ ຄຍ຺ຫ, ພຸທ຺ຘເສຏ຺ຐໍ ອຸປາຄມິໍ;

ພຸທ຺ຘສ຺ສ ປາເທ ໂຘວິຕ຺ວາ, ອລາພຸກມທາສຫໍ.

໑໖໐. ‘‘ອາຓາເປສິ ຈ ສມ຺ພຸທ຺ໂຘ, ປທຸມຸຕ຺ຕຣນາມໂກ;

‘ອິມິນາ ທກມາຫຕ຺ວາ, ປາທມູເລ ຐເປຫິ ເມ’.

໑໖໑. ‘‘ສາຘູຕິຫໍ ປຏິສ຺ສຸຕ຺ວາ, ສຕ຺ຖຸຄາຣວຕາຍ ຈ;

ທກໍ ອລາພຸນາຫຕ຺ວາ, ພຸທ຺ຘເສຏ຺ຐໍ ອຸປາຄມິໍ.

໑໖໒. ‘‘ອນຸໂມທິ ມຫາວີໂຣ, ຈິຕ຺ຕໍ ນິພ຺ພາປຍໍ ມມ;

‘ອິມິນາລາພຸທາເນນ, ສງ຺ກປ຺ໂປ ເຕ ສມິຊ຺ຌຕຸ’.

໑໖໓. ‘‘ປນ຺ນຣເສສຸ ກປ຺ເປສຸ, ເທວໂລເກ ຣມິໍ ອຫໍ;

ຕິໍສຕິກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ອໂຫສຫໍ.

໑໖໔. ‘‘ທິວາ ວາ ຍທິ ວາ ຣຕ຺ຕິໍ, ຈງ຺ກມນ຺ຕສ຺ສ ຕິຏ຺ຐໂຕ;

ໂສວຓ຺ຓໍ ໂກນ຺ຕຣໍ ຄຍ຺ຫ, ຕິຏ຺ຐເຕ ປຸຣໂຕ ມມ.

໑໖໕. ‘‘ພຸທ຺ຘສ຺ສ ທຕ຺ວານລາພຸໍ, ລຠາມິ ໂສຓ຺ຓໂກນ຺ຕຣໍ;

ອປ຺ປກມ຺ປິ ກຕໍ ກາຣໍ, ວິປຸລໍ ໂຫຕິ ຕາທິສຸ.

໑໖໖. ‘‘ສຕສຫສ຺ສິໂຕ ກປ຺ເປ, ຍໍລາພຸມທທິໍ ຕທາ;

ທຸຄ຺ຄຕິໍ ນາຠິຊານາມິ, ອລາພຸສ຺ສ ອິທໍ ຜລໍ.

໑໖໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໖໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂສຓ຺ຓໂກນ຺ຕຣິໂກ ເຖໂຣ ອິມາ

ຄາຖາໂຍ ອຠາສິຕ຺ຖາຕິ.

ໂສຓ຺ຓໂກນ຺ຕຣິກຕ຺ເຖຣສ຺ສາປທານໍ ທສມໍ.

ສກິໍສມ຺ມຊ຺ຊກວຄ຺ໂຄ ເຕຈຕ຺ຕາລີສໂມ.