໕. ໂມຆຣາຊຕ຺ເຖຣອປທານໍ

໖໔. ‘‘ອຕ຺ຖທສ຺ສີ ຕຸ ຠຄວາ, ສຍມ຺ຠູ ອປຣາຊິໂຕ;

ຠິກ຺ຂຸສງ຺ຆປຣິພ຺ຍູຬ຺ໂຫ, ຣຖິຍໍ ປຏິປຊ຺ຊຖ.

໖໕. ‘‘ສິສ຺ເສຫິ ສມ຺ປຣິວຸໂຕ, ຆຣມ຺ຫາ ອຠິນິກ຺ຂມິໍ;

ນິກ຺ຂມິຕ຺ວານຫໍ ຕຕ຺ຖ, ອທ຺ທສໍ ໂລກນາຍກໍ.

໖໖. ‘‘ອຠິວາທິຍ ສມ຺ພຸທ຺ຘໍ, ສິເຣ ກຕ຺ວານ ອຎ຺ຊລິໍ;

ສກໍ ຈິຕ຺ຕໍ ປສາເທຕ຺ວາ, ສນ຺ຖວິໍ ໂລກນາຍກໍ.

໖໗. ‘‘ຍາວຕາ ຣູປິໂນ ສຕ຺ຕາ, ອຣູປີ ວາ ອສຎ຺ຎິໂນ;

ສພ຺ເພ ເຕ ຕວ ຎາຓມ຺ຫິ, ອນ຺ໂຕ ໂຫນ຺ຕິ ສໂມຄຘາ.

໖໘. ‘‘ສຸຂຸມຈ຺ຉິກຊາເລນ, ອຸທກໍ ໂຍ ປຣິກ຺ຂິເປ;

ເຍ ເກຈິ ອຸທເກ ປາຓາ, ອນ຺ໂຕຊາເລ ຠວນ຺ຕິ ເຕ.

໖໙. ‘‘ເຍສຎ຺ຈ ເຈຕນາ ອຕ຺ຖິ, ຣູປິໂນ ຈ ອຣູປິໂນ;

ສພ຺ເພ ເຕ ຕວ ຎາຓມ຺ຫິ, ອນ຺ໂຕ ໂຫນ຺ຕິ ສໂມຄຘາ.

໗໐. ‘‘ສມຸທ຺ຘຣສິມໍ ໂລກໍ, ອນ຺ຘກາຣສມາກຸລໍ;

ຕວ ຘມ຺ມໍ ສຸຓິຕ຺ວານ, ກງ຺ຂາໂສຕໍ ຕຣນ຺ຕິ ເຕ.

໗໑. ‘‘ອວິຊ຺ຊານິວຸເຕ ໂລເກ, ອນ຺ຘກາເຣນ ໂອຕ຺ຖເຏ;

ຕວ ຎາຓມ຺ຫິ ໂຊຕນ຺ເຕ, ອນ຺ຘກາຣາ ປຘໍສິຕາ.

໗໒. ‘‘ຕຸວໍ ຈກ຺ຂູສິ ສພ຺ເພສໍ, ມຫາຕມປນູທໂນ;

ຕວ ຘມ຺ມໍ ສຸຓິຕ຺ວານ, ນິພ຺ພາຍຕິ ພຫຸຊ຺ຊໂນ.

໗໓. ‘‘ປຸຏກໍ ປູຣຍິຕ຺ວານ [ປີຐຣໍ (ສີ.), ປຸຕຣໍ (ສ຺ຍາ.)], ມຘຸຂຸທ຺ທມເນຬກໍ;

ອຸໂຠ ຫຕ຺ເຖຫິ ປຄ຺ຄຍ຺ຫ, ອຸປເນສິໍ ມເຫສິໂນ.

໗໔. ‘‘ປຏິຄ຺ຄຓ຺ຫິ ມຫາວີໂຣ, ສຫຕ຺ເຖນ ມຫາ ອິສີ;

ຠຸຎ຺ຊິຕ຺ວາ ຕຎ຺ຈ ສພ຺ພຎ຺ຎູ, ເວຫາສໍ ນຠມຸຄ຺ຄມິ.

໗໕. ‘‘ອນ຺ຕລິກ຺ເຂ ຐິໂຕ ສຕ຺ຖາ, ອຕ຺ຖທສ຺ສີ ນຣາສໂຠ;

ມມ ຈິຕ຺ຕໍ ປສາເທນ຺ໂຕ, ອິມາ ຄາຖາ ອຠາສຖ.

໗໖. ‘‘‘ເຍນິທໍ ຖວິຕໍ ຎາຓໍ, ພຸທ຺ຘເສຏ຺ໂຐ ຈ ໂຖມິໂຕ;

ເຕນ ຈິຕ຺ຕປ຺ປສາເທນ, ທຸຄ຺ຄຕິໍ ໂສ ນ ຄຈ຺ຉຕິ.

໗໗. ‘‘‘ຈຕຸທ຺ທສຎ຺ຈກ຺ຂຕ຺ຕຸໍ [ຈຕຸສຏ຺ຐິຎ຺ຈ (ສ຺ຍາ.)] ໂສ, ເທວຣຊ຺ຊໍ ກຣິສ຺ສຕິ;

ປຖພ຺ຍາ ຣຊ຺ຊໍ ອຏ຺ຐສຕໍ, ວສຸຘໍ ອາວສິສ຺ສຕິ.

໗໘. ‘‘‘ປຎ຺ເຈວ ສຕກ຺ຂຕ຺ຕຸຎ຺ຈ [ອຖ ປຎ຺ຈສຕກ຺ຂຕ຺ຕຸໍ (ສີ.)], ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ອສງ຺ເຂຍ຺ຍໍ, ມຫິຍາ ກາຣຍິສ຺ສຕິ.

໗໙. ‘‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ໂຄຕມສ຺ສ ຠຄວໂຕ, ສາສເນ ປພ຺ພຊິສ຺ສຕິ.

໘໐. ‘‘‘ຄມ຺ຠີຣໍ ນິປຸຓໍ ອຕ຺ຖໍ, ຎາເຓນ ວິຈິນິສ຺ສຕິ;

ໂມຆຣາຊາຕິ ນາເມນ, ເຫສ຺ສຕິ ສຕ຺ຖຸ ສາວໂກ.

໘໑. ‘‘‘ຕີຫິ ວິຊ຺ຊາຫິ ສມ຺ປນ຺ນໍ, ກຕກິຈ຺ຈມນາສວໍ;

ໂຄຕໂມ ສຕ຺ຖວາຫຄ຺ໂຄ, ເອຕທຄ຺ເຄ ຐເປສ຺ສຕິ’.

໘໒. ‘‘ຫິຕ຺ວາ ມານຸສກໍ ໂຍຄໍ, ເຉຕ຺ວານ ຠວພນ຺ຘນໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໘໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂມຆຣາໂຊ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ໂມຆຣາຊຕ຺ເຖຣສ຺ສາປທານໍ ປຎ຺ຈມໍ.