໕. ນຬາຄາຣິກຕ຺ເຖຣອປທານໍ

໓໑. ‘‘ຫິມວນ຺ຕສ຺ສາວິທູເຣ, ຫາຣິໂຕ ນາມ ປພ຺ພໂຕ;

ສຍມ຺ຠູ ນາຣໂທ ນາມ, ຣຸກ຺ຂມູເລ ວສີ ຕທາ.

໓໒. ‘‘ນຬາຄາຣໍ ກຣິຕ຺ວານ, ຕິເຓນ ຉາທຍິໍ ອຫໍ;

ຈງ຺ກມໍ ໂສຘຍິຕ຺ວານ, ສຍມ຺ຠຸສ຺ສ ອທາສຫໍ.

໓໓. ‘‘ຈຕຸທ຺ທສສຸ ກປ຺ເປສຸ, ເທວໂລເກ ຣມິໍ ອຫໍ;

ຈຕຸສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊໍ ອກາຣຍິໍ.

໓໔. ‘‘ຈຕຸສຕ຺ຕຕິ [ສຕ຺ຕສຕ຺ຕຕິ (ສີ.)] ກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໓໕. ‘‘ອຸພ຺ພິທ຺ຘໍ ຠວນໍ ມຍ຺ຫໍ, ອິນ຺ທລຏ຺ຐີວ ອຸຄ຺ຄຕໍ;

ສຫສ຺ສຖມ຺ຠໍ ອຕຸລໍ, ວິມານໍ ສປຠສ຺ສຣໍ.

໓໖. ‘‘ທ຺ເວ ສມ຺ປຕ຺ຕີ ອນຸໂຠຕ຺ວາ, ສຸກ຺ກມູເລນ ໂຈທິໂຕ;

ໂຄຕມສ຺ສ ຠຄວໂຕ, ສາສເນ ປພ຺ພຊິໍ ອຫໍ.

໓໗. ‘‘ປຘານປຫິຕຕ຺ໂຕມ຺ຫິ, ອຸປສນ຺ໂຕ ນິຣູປຘິ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໓໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນຬາຄາຣິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນຬາຄາຣິກຕ຺ເຖຣສ຺ສາປທານໍ ປຎ຺ຈມໍ.