໔. ເອກທຸສ຺ສທາຍກຕ຺ເຖຣອປທານໍ

໑໙. ‘‘ນຄເຣ ຫໍສວຕິຍາ, ອໂຫສິໍ ຕິຓຫາຣໂກ;

ຕິຓຫາເຣນ ຊີວາມິ, ເຕນ ໂປເສມິ ທາຣເກ.

໒໐. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຕມນ຺ຘກາຣໍ ນາເສຕ຺ວາ, ອຸປ຺ປຊ຺ຊິ ໂລກນາຍໂກ.

໒໑. ‘‘ສເກ ຆເຣ ນິສີທິຕ຺ວາ, ເອວໍ ຈິນ຺ເຕສຫໍ ຕທາ;

‘ພຸທ຺ໂຘ ໂລເກ ສມຸປ຺ປນ຺ໂນ, ເທຍ຺ຍຘມ຺ໂມ ຈ ນຕ຺ຖິ ເມ.

໒໒. ‘‘‘ອິທໍ ເມ ສາຏກໍ ເອກໍ, ນຕ຺ຖິ ເມ ໂກຈິ ທາຍໂກ;

ທຸກ຺ໂຂ ນິຣຍສມ຺ຜສ຺ໂສ, ໂຣປຍິສ຺ສາມິ ທກ຺ຂິຓໍ’.

໒໓. ‘‘ເອວາຫໍ ຈິນ຺ຕຍິຕ຺ວານ, ສກໍ ຈິຕ຺ຕໍ ປສາທຍິໍ;

ເອກໍ ທຸສ຺ສໍ ຄເຫຕ຺ວານ, ພຸທ຺ຘເສຏ຺ຐສ຺ສທາສຫໍ.

໒໔. ‘‘ເອກໍ ທຸສ຺ສໍ ທທິຕ຺ວານ, ອຸກ຺ກຸຏ຺ຐິໍ ສມ຺ປວຕ຺ຕຍິໍ;

ຍທິ ພຸທ຺ໂຘ ຕຸວໍ ວີຣ, ຕາເຣຫິ ມໍ ມຫາມຸນິ.

໒໕. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ທານໍ ປກິຕ຺ເຕນ຺ໂຕ, ອກາ ເມ ອນຸໂມທນໍ.

໒໖. ‘‘‘ອິມິນາ ເອກທຸສ຺ເສນ, ເຈຕນາປຓິຘີຫິ ຈ;

ກປ຺ປສຕສຫສ຺ສານິ, ວິນິປາຕໍ ນ ຄຈ຺ຉຕິ.

໒໗. ‘‘‘ຉຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ;

ເຕຕ຺ຕິໍສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໒໘. ‘‘‘ເທວໂລເກ ມນຸສ຺ເສ ວາ, ສໍສຣນ຺ໂຕ ຕຸວໍ ຠເວ;

ຣູປວາ ຄຸຓສມ຺ປນ຺ໂນ, ອນວກ຺ກນ຺ຕເທຫວາ;

ອກ຺ໂຂຠໍ ອມິຕໍ ທຸສ຺ສໍ, ລຠິສ຺ສສິ ຍທິຈ຺ຉກໍ’.

໒໙. ‘‘ອິທໍ ວຕ຺ວານ ສມ຺ພຸທ຺ໂຘ, ຊລຊຸຕ຺ຕມນາມໂກ;

ນຠໍ ອພ຺ຠຸຄ຺ຄມີ ຘີໂຣ, ຫໍສຣາຊາວ ອມ຺ພເຣ.

໓໐. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ໂຠເຄ ເມ ອູນຕາ ນຕ຺ຖິ, ເອກທຸສ຺ສສ຺ສິທໍ ຜລໍ.

໓໑. ‘‘ປທຸທ຺ຘາເຣ ປທຸທ຺ຘາເຣ, ທຸສ຺ສໍ ນິພ຺ພຕ຺ຕເຕ ມມໍ;

ເຫຏ຺ຐາ ທຸສ຺ສມ຺ຫິ ຕິຏ຺ຐາມິ, ອຸປຣິ ຉທນໍ ມມ.

໓໒. ‘‘ຈກ຺ກວາຬມຸປາທາຍ, ສການນໍ ສປພ຺ພຕໍ;

ອິຈ຺ຉມາໂນ ຈຫໍ ອຊ຺ຊ, ທຸສ຺ເສຫິ ຉາທເຍຍ຺ຍຫໍ.

໓໓. ‘‘ເຕເນວ ເອກທຸສ຺ເສນ, ສໍສຣນ຺ໂຕ ຠວາຠເວ;

ສຸວຓ຺ຓວຓ຺ໂຓ ຫຸຕ຺ວານ, ສໍສຣາມິ ຠວາຠເວ.

໓໔. ‘‘ວິປາກໍ ເອກທຸສ຺ສສ຺ສ, ນຊ຺ຌຄໍ ກຕ຺ຖຈິກ຺ຂຍໍ;

ອຍໍ ເມ ອນ຺ຕິມາ ຊາຕິ, ວິປຈ຺ຈຕິ ອິຘາປິ ເມ.

໓໕. ‘‘ສຕສຫສ຺ສິໂຕ ກປ຺ເປ, ຍໍ ທຸສ຺ສມທທິໍ ຕທາ;

ທຸຄ຺ຄຕິໍ ນາຠິຊານາມິ, ເອກທຸສ຺ສສ຺ສິທໍ ຜລໍ.

໓໖. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໓໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກທຸສ຺ສທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກທຸສ຺ສທາຍກຕ຺ເຖຣສ຺ສາປທານໍ ຈຕຸຕ຺ຖໍ.