໙. ກນ຺ທລິປຸປ຺ຜິຍຕ຺ເຖຣອປທານໍ

໔໗. ‘‘ສິນ຺ຘຸຍາ ນທິຍາ ຕີເຣ, ອໂຫສິໍ ກສ຺ສໂກ ຕທາ;

ປຣກມ຺ມາຍເນ ຍຸຕ຺ໂຕ, ປຣຠຕ຺ຕໍ ອປສ຺ສິໂຕ.

໔໘. ‘‘ສິນ຺ຘຸໍ ອນຸຈຣນ຺ໂຕຫໍ, ສິທ຺ຘຕ຺ຖໍ ຊິນມທ຺ທສໍ;

ສມາຘິນາ ນິສິນ຺ນໍວ, ສຕປຕ຺ຕໍວ ປຸປ຺ຜິຕໍ.

໔໙. ‘‘ສຕ຺ຕ ກນ຺ທລິປຸປ຺ຜານິ, ວຓ຺ເຏ ເຉຕ຺ວານຫໍ ຕທາ;

ມຕ຺ຖເກ ອຠິໂຣເປສິໍ, ພຸທ຺ຘສ຺ສາທິຈ຺ຈພນ຺ຘຸໂນ.

໕໐. ‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອນຸກູເລ ສມາຫິຕໍ;

ຕິຘາປຠິນ຺ນມາຕງ຺ຄໍ, ກຸຎ຺ຊຣໍວ ທຸຣາສທໍ.

໕໑. ‘‘ຕມຫໍ ອຸປຄນ຺ຕ຺ວານ, ນິປກໍ ຠາວິຕິນ຺ທ຺ຣິຍໍ;

ອຎ຺ຊລິໍ ປຄ຺ຄເຫຕ຺ວານ, ອວນ຺ທິໍ ສຕ຺ຖຸໂນ ອຫໍ.

໕໒. ‘‘ຈຕຸນ຺ນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໕໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ກນ຺ທລິປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ກນ຺ທລິປຸປ຺ຜິຍຕ຺ເຖຣສ຺ສາປທານໍ ນວມໍ.