໕. ປຸປ຺ຜາສນທາຍກຕ຺ເຖຣອປທານໍ

໒໐. ‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ປີຕຣໍສິໍວ [ສຕຣໍສິໍວ (ສີ. ສ຺ຍາ.)] ຠາຓຸມໍ;

ອວິທູເຣນ ຄຈ຺ຉນ຺ຕໍ, ສິທ຺ຘຕ຺ຖໍ ອປຣາຊິຕໍ.

໒໑. ‘‘ຕສ຺ສ ປຈ຺ຈຸຄ຺ຄມິຕ຺ວານ, ປເວເສຕ຺ວານ ອສ຺ສມໍ;

ປຸປ຺ຜາສນໍ ມຍາ ທິນ຺ນໍ, ວິປ຺ປສນ຺ເນນ ເຈຕສາ.

໒໒. ‘‘ອຎ຺ຊລິໍ ປຄ຺ຄເຫຕ຺ວານ, ເວທຊາໂຕ ຕທາ ອຫໍ;

ພຸທ຺ເຘ ຈິຕ຺ຕໍ ປສາເທຕ຺ວາ, ຕໍ ກມ຺ມໍ ປຣິຓາມຍິໍ.

໒໓. ‘‘ຍໍ ເມ ອຕ຺ຖິ ກຕໍ ປຸຎ຺ຎໍ, ສຍມ຺ຠຸມ຺ຫປຣາຊິເຕ;

ສພ຺ເພນ ເຕນ ກຸສເລນ, ວິມໂລ ໂຫມິ ສາສເນ.

໒໔. ‘‘ຈຕຸນ຺ນວຸຕິໂຕ ກປ຺ເປ, ປຸປ຺ຜາສນມທໍ ຕທາ;

ທຸຄ຺ຄຕິໍ ນາຠິຊານາມິ, ປຸປ຺ຜາສນສ຺ສິທໍ ຜລໍ.

໒໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຸປ຺ຜາສນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຸປ຺ຜາສນທາຍກຕ຺ເຖຣສ຺ສາປທານໍ ປຎ຺ຈມໍ.