໓໑. ປທຸມເກສຣວຄ຺ໂຄ

໑. ປທຸມເກສຣິຍຕ຺ເຖຣອປທານໍ

໑. ‘‘ອິສິສງ຺ເຆ ອຫໍ ປຸພ຺ເພ, ອາສິໍ ມາຕງ຺ຄວາຣໂຓ;

ມເຫສີນໍ ປສາເທນ, ປທ຺ມເກສຣໂມກິຣິໍ.

໒. ‘‘ປຈ຺ເຈກຊິນເສຏ຺ເຐສຸ, ຘຸຕຣາເຄສຸ ຕາທິສຸ;

ເຕສຸ ຈິຕ຺ຕໍ ປສາເທຕ຺ວາ, ກປ຺ປໍ ສຄ຺ຄມ຺ຫິ ໂມທຫໍ.

໓. ‘‘ເອກນວຸຕິໂຕ ກປ຺ເປ, ເກສຣໍ ໂອກິຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປທຸມເກສຣິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປທຸມເກສຣິຍຕ຺ເຖຣສ຺ສາປທານໍ ປຐມໍ.

໒. ສພ຺ພຄນ຺ຘິຍຕ຺ເຖຣອປທານໍ

໕. ‘‘ຄນ຺ຘມາລໍ ມຍາ ທິນ຺ນໍ, ວິປສ຺ສິສ຺ສ ມເຫສິໂນ;

ອທາສິໍ ອຸຊຸຠູຕສ຺ສ, ໂກເສຍ຺ຍວຕ຺ຖມຸຕ຺ຕມໍ.

໖. ‘‘ເອກນວຸຕິໂຕ ກປ຺ເປ, ຍໍ ວຕ຺ຖມທທິໍ [ຄນ຺ຘມທທິໍ (ສ຺ຍາ.)] ປຸເຣ;

ທຸຄ຺ຄຕິໍ ນາຠິຊານາມິ, ຄນ຺ຘທານສ຺ສິທໍ ຜລໍ.

໗. ‘‘ອິໂຕ ປນ຺ນຣເສ ກປ຺ເປ, ສຸເຈໂຬ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສພ຺ພຄນ຺ຘິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສພ຺ພຄນ຺ຘິຍຕ຺ເຖຣສ຺ສາປທານໍ ທຸຕິຍໍ.

໓. ປຣມນ຺ນທາຍກຕ຺ເຖຣອປທານໍ

໙. ‘‘ກຓິກາຣໍວ ໂຊຕນ຺ຕໍ, ອຸທຍນ຺ຕໍວ ຠາຓຸມໍ;

ວິປສ຺ສິໍ ອທ຺ທສໍ ພຸທ຺ຘໍ, ໂລກເຊຏ຺ຐໍ ນຣາສຠໍ.

໑໐. ‘‘ອຎ຺ຊລິໍ ປຄ຺ຄເຫຕ຺ວານ, ອຠິເນສິໍ ສກໍ ຆຣໍ;

ອຠິເນຕ຺ວານ ສມ຺ພຸທ຺ຘໍ, ປຣມນ຺ນມທາສຫໍ.

໑໑. ‘‘ເອກນວຸຕິໂຕ ກປ຺ເປ, ປຣມນ຺ນມທິໍ [ປຣມນ຺ນໍ ທທິໍ (ສີ.), ປຣມນ຺ນມທໍ (ສ຺ຍາ.)] ຕທາ;

ທຸຄ຺ຄຕິໍ ນາຠິຊານາມິ, ປຣມນ຺ນສ຺ສິທໍ ຜລໍ.

໑໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຣມນ຺ນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຣມນ຺ນທາຍກຕ຺ເຖຣສ຺ສາປທານໍ ຕຕິຍໍ.

໔. ຘມ຺ມສຎ຺ຎກຕ຺ເຖຣອປທານໍ

໑໓. ‘‘ວິປສ຺ສິໂນ ຠຄວໂຕ, ມຫາໂພຘິມໂຫ ອຫຸ;

ຣຸກ຺ຂຏ຺ຐສ຺ເສວ ສມ຺ພຸທ຺ໂຘ, [ຣຸກ຺ຂຏ຺ເຐເຍວ ສມ຺ພຸທ຺ເຘ (ສີ.), ຣຸກ຺ຂຏ຺ໂຐ ອິວ ສມ຺ພຸທ຺ໂຘ (ອຏ຺ຐ.) ເອຕ຺ຖ ຣຸກ຺ຂຏ຺ຐສ຺ເສວ ໂພຘິມຫກາຣຊນສ຺ສ ສມ຺ພຸທ຺ໂຘ ຈຕຸສຈ຺ຈໍ ປກາເສຕີຕິ ອຕ຺ໂຖປິ ສກ຺ກາ ຎາຕຸໍ] ໂລກເຊຏ຺ໂຐ ນຣາສໂຠ [ໂລກເຊຏ຺ເຐ ນຣາສເຠ (ສີ.)].

໑໔. ‘‘ຠຄວາ ຕມ຺ຫິ ສມເຍ, ຠິກ຺ຂຸສງ຺ຆປຸຣກ຺ຂໂຕ;

ຈຕຸສຈ຺ຈໍ ປກາເສຕິ, ວາຈາສຠິມຸທີຣຍໍ.

໑໕. ‘‘ສງ຺ຂິຕ຺ເຕນ ຈ ເທເສນ຺ໂຕ, ວິຕ຺ຖາເຣນ ຈ ເທສຍໍ [ເທສຍິ (ສ຺ຍາ.), ຠາສຕິ (ກ.)];

ວິວຏ຺ຏຈ຺ຉໂທ ສມ຺ພຸທ຺ໂຘ, ນິພ຺ພາເປສິ ມຫາຊນໍ.

໑໖. ‘‘ຕສ຺ສາຫໍ ຘມ຺ມໍ ສຸຕ຺ວານ, ໂລກເຊຏ຺ຐສ຺ສ ຕາທິໂນ;

ວນ຺ທິຕ຺ວາ ສຕ຺ຖຸໂນ ປາເທ, ປກ຺ກາມິໍ ອຸຕ຺ຕຣາມຸໂຂ.

໑໗. ‘‘ເອກນວຸຕິໂຕ ກປ຺ເປ, ຍໍ ຘມ຺ມມສຸຓິໍ ຕທາ;

ທຸຄ຺ຄຕິໍ ນາຠິຊານາມິ, ຘມ຺ມສວສ຺ສິທໍ ຜລໍ.

໑໘. ‘‘ເຕຕ຺ຕິໍສມ຺ຫິ ອິໂຕ ກປ຺ເປ, ເອໂກ ອາສິໍ ມຫີປຕິ;

ສຸຕວາ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຘມ຺ມສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຘມ຺ມສຎ຺ຎກຕ຺ເຖຣສ຺ສາປທານໍ ຈຕຸຕ຺ຖໍ.

໕. ຜລທາຍກຕ຺ເຖຣອປທານໍ

໒໐. ‘‘ຠາຄີຣຖີນທີຕີເຣ, ອໂຫສິ ອສ຺ສໂມ ຕທາ;

ຕມຫໍ ອສ຺ສມໍ ຄຈ຺ຉິໍ, ຜລຫຕ຺ໂຖ ອເປກ຺ຂວາ.

໒໑. ‘‘ວິປສ຺ສິໍ ຕຕ຺ຖ ອທ຺ທກ຺ຂິໍ, ປີຕຣໍສິໍວ ຠາຓຸມໍ;

ຍໍ ເມ ອຕ຺ຖິ ຜລໍ ສພ຺ພໍ, ອທາສິໍ ສຕ຺ຖຸໂນ ອຫໍ.

໒໒. ‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

໒໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຜລທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຜລທາຍກຕ຺ເຖຣສ຺ສາປທານໍ ປຎ຺ຈມໍ.

໖. ສມ຺ປສາທກຕ຺ເຖຣອປທານໍ

໒໔. ‘‘‘ນໂມ ເຕ ພຸທ຺ຘ ວີຣຕ຺ຖຸ, ວິປ຺ປມຸຕ຺ໂຕສິ ສພ຺ພຘິ;

ພ຺ຍສນມ຺ຫິ [ພ຺ຍສນໍ ຫິ (ສີ.)] ອນຸປ຺ປຕ຺ໂຕ, ຕສ຺ສ ເມ ສຣຓໍ ຠວ’.

໒໕. ‘‘ສິທ຺ຘຕ຺ໂຖ ຕສ຺ສ ພ຺ຍາກາສິ, ໂລເກ ອປ຺ປຏິປຸຄ຺ຄໂລ;

‘ມໂຫທຘິສໂມ ສງ຺ໂຆ, ອປ຺ປເມຍ຺ໂຍ ອນຸຕ຺ຕໂຣ.

໒໖. ‘‘‘ຕຕ຺ຖ ຕ຺ວໍ ວິຣເຊ ເຂຕ຺ເຕ, ອນນ຺ຕຜລທາຍເກ;

ສງ຺ເຆ ຈິຕ຺ຕໍ ປສາເທຕ຺ວາ, ສຸພີຊໍ ວາປ [ຈາປິ (ສີ.), ວາປິ (ສ຺ຍາ.)] ໂຣປຍ.

໒໗. ‘‘ອິທໍ ວຕ຺ວານ ສພ຺ພຎ຺ຎູ, ໂລກເຊຏ຺ໂຐ ນຣາສໂຠ;

ມເມວ ອນຸສາສິຕ຺ວາ, ເວຫາສໍ ນຠມຸຄ຺ຄມິ.

໒໘. ‘‘ອຈິຣໍ ຄຕມຕ຺ຕມ຺ຫິ, ສພ຺ພຎ຺ຎຸມ຺ຫິ ນຣາສເຠ;

ມຣຓໍ ສມນຸປ຺ປຕ຺ໂຕ, ຕຸສິຕໍ ອຸປປຊ຺ຊຫໍ.

໒໙. ‘‘ຕທາຫໍ ວິຣເຊ ເຂຕ຺ເຕ, ອນນ຺ຕຜລທາຍເກ;

ສງ຺ເຆ ຈິຕ຺ຕໍ ປສາເທຕ຺ວາ, ກປ຺ປໍ ສຄ຺ຄມ຺ຫິ ໂມທຫໍ.

໓໐. ‘‘ຈຕຸນ຺ນວຸຕິໂຕ ກປ຺ເປ, ປສາທມລຠິໍ ຕທາ;

ທຸຄ຺ຄຕິໍ ນາຠິຊານາມິ, ປສາທສ຺ສ ອິທໍ ຜລໍ.

໓໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສມ຺ປສາທໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສມ຺ປສາທກຕ຺ເຖຣສ຺ສາປທານໍ ຉຏ຺ຐໍ.

໗. ອາຣາມທາຍກຕ຺ເຖຣອປທານໍ

໓໒. ‘‘ສິທ຺ຘຕ຺ຖສ຺ສ ຠຄວໂຕ, ອາຣາໂມ ໂຣປິໂຕ ມຍາ;

ສນ຺ທຈ຺ຉາເຍສຸ [ສີຕຉາເຍສຸ (ສ຺ຍາ.), ສນ຺ຕຈ຺ຉາເຍສຸ (ກ.)] ຣຸກ຺ເຂສຸ, ອຸປາສນ຺ເຕສຸ ປກ຺ຂິສຸ.

໓໓. ‘‘ອທ຺ທສໍ ວິຣຊໍ ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ອາຣາມໍ ອຠິນາເມສິໍ, ໂລກເຊຏ຺ຐໍ ນຣາສຠໍ.

໓໔. ‘‘ຫຏ຺ໂຐ ຫຏ຺ເຐນ ຈິຕ຺ເຕນ, ຜລໍ ປຸປ຺ຜມທາສຫໍ;

ຕໂຕ ຊາຕປ຺ປສາໂທວ, ຕໍ ວນໍ ປຣິຓາມຍິໍ.

໓໕. ‘‘ພຸທ຺ຘສ຺ສ ຍມິທໍ ທາສິໍ, ວິປ຺ປສນ຺ເນນ ເຈຕສາ;

ຠເວ ນິພ຺ພຕ຺ຕມານມ຺ຫິ, ນິພ຺ພຕ຺ຕຕິ ຜລໍ ມມ.

໓໖. ‘‘ຈຕຸນ຺ນວຸຕິໂຕ ກປ຺ເປ, ຍໍ ອາຣາມມທໍ ຕທາ;

ທຸຄ຺ຄຕິໍ ນາຠິຊານາມິ, ອາຣາມສ຺ສ ອິທໍ ຜລໍ.

໓໗. ‘‘ສຕ຺ຕຕິໍເສ ອິໂຕ ກປ຺ເປ, ສຕ຺ຕາສຸໍ ມຸທຸສີຕລາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໓໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອາຣາມທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອາຣາມທາຍກຕ຺ເຖຣສ຺ສາປທານໍ ສຕ຺ຕມໍ.

໘. ອນຸເລປທາຍກຕ຺ເຖຣອປທານໍ

໓໙. ‘‘ອຕ຺ຖທສ຺ສິສ຺ສ ມຸນິໂນ, ອທ຺ທສໍ ສາວກໍ ອຫໍ;

ນວກມ຺ມໍ ກໂຣນ຺ຕສ຺ສ, ສີມາຍ ອຸປຄຈ຺ຉຫໍ.

໔໐. ‘‘ນິຏ຺ຐິເຕ ນວກມ຺ເມ ຈ, ອນຸເລປມທາສຫໍ;

ປສນ຺ນຈິຕ຺ໂຕ ສຸມໂນ, ປຸຎ຺ຎກ຺ເຂຕ຺ເຕ ອນຸຕ຺ຕເຣ.

໔໑. ‘‘ອຏ຺ຐາຣເສ ກປ຺ປສເຕ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ອນຸເລປສ຺ສິທໍ ຜລໍ.

໔໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອນຸເລປທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອນຸເລປທາຍກຕ຺ເຖຣສ຺ສາປທານໍ ອຏ຺ຐມໍ.

໙. ພຸທ຺ຘສຎ຺ຎກຕ຺ເຖຣອປທານໍ

໔໓. ‘‘ອຸເທນ຺ຕໍ ສຕຣໍສິໍວ, ປີຕຣໍສິໍວ ຠາຓຸມໍ;

ວນນ຺ຕຣຄຕໍ ສນ຺ຕໍ, ໂລກເຊຏ຺ຐໍ ນຣາສຠໍ.

໔໔. ‘‘ອທ຺ທສໍ ສຸປິນນ຺ເຕນ, ສິທ຺ຘຕ຺ຖໍ ໂລກນາຍກໍ;

ຕຕ຺ຖ ຈິຕ຺ຕໍ ປສາເທຕ຺ວາ, ສຸຄຕິໍ ອຸປປຊ຺ຊຫໍ.

໔໕. ‘‘ຈຕຸນ຺ນວຸຕິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘສຎ຺ຎາຍິທໍ ຜລໍ.

໔໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ພຸທ຺ຘສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ພຸທ຺ຘສຎ຺ຎກຕ຺ເຖຣສ຺ສາປທານໍ ນວມໍ.

໑໐. ປພ຺ຠາຣທາຍກຕ຺ເຖຣອປທານໍ

໔໗. ‘‘ປິຍທສ຺ສິໂນ ຠຄວໂຕ, ປພ຺ຠາໂຣ ໂສຘິໂຕ ມຍາ;

ຆຏກຎ຺ຈ ອຸປຏ຺ຐາສິໍ, ປຣິໂຠຄາຍ ຕາທິໂນ.

໔໘. ‘‘ຕໍ ເມ ພຸທ຺ໂຘ ວິຍາກາສິ, ປິຍທສ຺ສີ ມຫາມຸນິ;

ສຫສ຺ສກຓ຺ໂຑ ສຕເຠຓ຺ຑຸ [ສຕເຄຓ຺ຑຸ (ສ຺ຍາ. ກ.)], ຘຊາລຸ ຫຣິຕາມໂຍ.

໔໙. ‘‘ນິພ຺ພຕ຺ຕິສ຺ສຕິ ໂສ ຍູໂປ, ຣຕນຎ຺ຈ ອນປ຺ປກໍ;

ປພ຺ຠາຣທານໍ ທຕ຺ວານ, ກປ຺ປໍ ສຄ຺ຄມ຺ຫິ ໂມທຫໍ.

໕໐. ‘‘ອິໂຕ ພາຕ຺ຕິໍສກປ຺ປມ຺ຫິ, ສຸສຸທ຺ໂຘ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໕໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປພ຺ຠາຣທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປພ຺ຠາຣທາຍກຕ຺ເຖຣສ຺ສາປທານໍ ທສມໍ.

ປທຸມເກສຣວຄ຺ໂຄ ເອກຕິໍສຕິໂມ.