໓. ຉຕ຺ຕທາຍກຕ຺ເຖຣອປທານໍ

໑໑. ‘‘ປຸຕ຺ໂຕ ມມ ປພ຺ພຊິໂຕ, ກາສາຍວສໂນ ຕທາ;

ໂສ ຈ ພຸທ຺ຘຕ຺ຕໍ ສມ຺ປຕ຺ໂຕ, ນິພ຺ພຸໂຕ ໂລກປູຊິໂຕ.

໑໒. ‘‘ວິຈິນນ຺ໂຕ ສກໍ ປຸຕ຺ຕໍ, ອຄມໍ ປຈ຺ຉໂຕ ອຫໍ;

ນິພ຺ພຸຕສ຺ສ ມຫນ຺ຕສ຺ສ, ຈິຕກໍ ອຄມາສຫໍ.

໑໓. ‘‘ປຄ຺ຄຍ຺ຫ ອຎ຺ຊລິໍ ຕຕ຺ຖ, ວນ຺ທິຕ຺ວາ ຈິຕກໍ ອຫໍ;

ເສຕຈ຺ຉຕ຺ຕຎ຺ຈ ປຄ຺ຄຍ຺ຫ, ອາໂຣເປສິໍ ອຫໍ ຕທາ.

໑໔. ‘‘ຈຕຸນ຺ນວຸຕິໂຕ ກປ຺ເປ, ຍໍ ຉຕ຺ຕມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ຉຕ຺ຕທານສ຺ສິທໍ ຜລໍ.

໑໕. ‘‘ປຎ຺ຈວີເສ ອິໂຕ ກປ຺ເປ, ສຕ຺ຕ ອາສຸໍ ຊນາຘິປາ;

ມຫາຣຫສນາມາ ເຕ, ຈກ຺ກວຕ຺ຕີ ມຫພ຺ພລາ.

໑໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຉຕ຺ຕທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຉຕ຺ຕທາຍກຕ຺ເຖຣສ຺ສາປທານໍ ຕຕິຍໍ.