໘. ອຸຕ຺ຕິຍຕ຺ເຖຣອປທານໍ

໑໖໙. ‘‘ຈນ຺ທຠາຄານທີຕີເຣ, ສຸສຸມາໂຣ ອຫໍ ຕທາ;

ສໂຄຈຣປ຺ປສຸໂຕຫໍ [ສໂຠຊນປສຸຕາຫໍ (ສ຺ຍາ. ກ.)], ນທີຕິຕ຺ຖໍ ອຄຈ຺ຉຫໍ.

໑໗໐. ‘‘ສິທ຺ຘຕ຺ໂຖ ຕມ຺ຫິ ສມເຍ, ສຍມ຺ຠູ ອຄ຺ຄປຸຄ຺ຄໂລ;

ນທິໍ ຕຣິຕຸກາໂມ ໂສ, ນທີຕິຕ຺ຖໍ ອຸປາຄມິ.

໑໗໑. ‘‘ອຸປາຄເຕ ຈ [ອຸປາຄຕມ຺ຫິ (ສ຺ຍາ. ກ.)] ສມ຺ພຸທ຺ເຘ, ອຫມ຺ປິ ຕຕ຺ຖຸປາຄມິໍ;

ອຸປຄນ຺ຕ຺ວານ ສມ຺ພຸທ຺ຘໍ, ອິມໍ ວາຈໍ ອຸທີຣຍິໍ.

໑໗໒. ‘‘‘ອຠິຣູຫ ມຫາວີຣ, ຕາເຣສ຺ສາມິ ອຫໍ ຕຸວໍ;

ເປຕ຺ຕິກໍ ວິສຍໍ ມຍ຺ຫໍ, ອນຸກມ຺ປ ມຫາມຸນິ’.

໑໗໓. ‘‘ມມ ອຸຄ຺ຄຊ຺ຊນໍ ສຸຕ຺ວາ, ອຠິຣູຫິ ມຫາມຸນິ;

ຫຏ຺ໂຐ ຫຏ຺ເຐນ ຈິຕ຺ເຕນ, ຕາເຣສິໍ ໂລກນາຍກໍ.

໑໗໔. ‘‘ນທິຍາ ປາຣິເມ ຕີເຣ, ສິທ຺ຘຕ຺ໂຖ ໂລກນາຍໂກ;

ອສ຺ສາເສສິ ມມໍ ຕຕ຺ຖ, ອມຕໍ ປາປຸຓິສ຺ສສິ.

໑໗໕. ‘‘ຕມ຺ຫາ ກາຍາ ຈວິຕ຺ວານ, ເທວໂລກໍ ອາຄຈ຺ຉຫໍ;

ທິພ຺ພສຸຂໍ ອນຸຠວິໍ, ອຈ຺ຉຣາຫິ ປຸຣກ຺ຂໂຕ.

໑໗໖. ‘‘ສຕ຺ຕກ຺ຂຕ຺ຕຸຎ຺ຈ ເທວິນ຺ໂທ, ເທວຣຊ຺ຊມກາສຫໍ;

ຕີຓິກ຺ຂຕ຺ຕຸໍ ຈກ຺ກວຕ຺ຕີ, ມຫິຍາ ອິສ຺ສໂຣ ອຫຸໍ.

໑໗໗. ‘‘ວິເວກມນຸຍຸຕ຺ໂຕຫໍ, ນິປໂກ ຈ ສຸສໍວຸໂຕ;

ຘາເຣມິ ອນ຺ຕິມໍ ເທຫໍ, ສມ຺ມາສມ຺ພຸທ຺ຘສາສເນ.

໑໗໘. ‘‘ຈຕຸນ຺ນວຸຕິໂຕ ກປ຺ເປ, ຕາເຣສິໍ ຍໍ ນຣາສຠໍ;

ທຸຄ຺ຄຕິໍ ນາຠິຊານາມິ, ຕຣຓາຍ ອິທໍ ຜລໍ.

໑໗໙. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸຕ຺ຕິໂຍ [ອຸຕ຺ຕິຣິໂຍ (ສີ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸຕ຺ຕິຍຕ຺ເຖຣສ຺ສາປທານໍ ອຏ຺ຐມໍ.