໑໘. ກຸມຸທວຄ຺ໂຄ

໑. ກຸມຸທມາລິຍຕ຺ເຖຣອປທານໍ

໑. ‘‘ປພ຺ພເຕ ຫິມວນ຺ຕມ຺ຫິ, ມຫາຊາຕສ຺ສໂຣ ອຫຸ;

ຕຕ຺ຖໂຊ ຣກ຺ຂໂສ ອາສິໍ, ໂຆຣຣູໂປ ມຫພ຺ພໂລ.

໒. ‘‘ກຸມຸທໍ ປຸປ຺ຜເຕ ຕຕ຺ຖ, ຈກ຺ກມຕ຺ຕານິ ຊາຍເຣ;

ໂອຈິນາມິ ຈ ຕໍ ປຸປ຺ຜໍ, ພລິໂນ ສມິຕິໍ ຕທາ.

໓. ‘‘ອຕ຺ຖທສ຺ສີ ຕຸ ຠຄວາ, ທ຺ວິປທິນ຺ໂທ ນຣາສໂຠ;

ປຸປ຺ຜສງ຺ໂກຈິຕໍ [ປຸປ຺ຜໍ ສງ຺ໂກຈິຕໍ (ສີ. ສ຺ຍາ.), ປຸປ຺ຜໍ ສໂມຈິຕໍ (?)] ທິສ຺ວາ, ອາຄຈ຺ຉິ ມມ ສນ຺ຕິກໍ.

໔. ‘‘ອຸປາຄຕຎ຺ຈ ສມ຺ພຸທ຺ຘໍ, ເທວເທວໍ ນຣາສຠໍ;

ສພ຺ພຎ຺ຈ ປຸປ຺ຜໍ ປຄ຺ຄຍ຺ຫ, ພຸທ຺ຘສ຺ສ ອຠິໂຣປຍິໍ.

໕. ‘‘ຍາວຕາ ຫິມວນ຺ຕນ຺ຕາ, ປຣິສາ ສາ [ຫິມວນ຺ຕສ຺ມິໍ, ຍາວ ມາລາ (ສ຺ຍາ.)] ຕທາ ອຫຸ;

ຕາວຈ຺ຉທນສມ຺ປນ຺ໂນ, ອຄມາສິ ຕຖາຄໂຕ.

໖. ‘‘ອຏ຺ຐາຣເສ ກປ຺ປສເຕ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໗. ‘‘ອິໂຕ ປນ຺ນຣເສ ກປ຺ເປ, ສຕ຺ຕາເຫສຸໍ ຊນາຘິປາ;

ສຫສ຺ສຣຖນາມາ ເຕ, ຈກ຺ກວຕ຺ຕີ ມຫພ຺ພລາ.

໘. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ກຸມຸທມາລິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ກຸມຸທມາລິຍຕ຺ເຖຣສ຺ສາປທານໍ ປຐມໍ.

໒. ນິສ຺ເສຓິທາຍກຕ຺ເຖຣອປທານໍ

໙. ‘‘ໂກຓ຺ຑຎ຺ຎສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ອາໂຣຫຕ຺ຖາຍ ປາສາທໍ, ນິສ຺ເສຓີ ກາຣິຕາ ມຍາ.

໑໐. ‘‘ເຕນ ຈິຕ຺ຕປ຺ປສາເທນ, ອນຸໂຠຕ຺ວານ ສມ຺ປທາ;

ຘາເຣມິ ອນ຺ຕິມໍ ເທຫໍ, ສມ຺ມາສມ຺ພຸທ຺ຘສາສເນ.

໑໑. ‘‘ເອກຕ຺ຕິໍສມ຺ຫິ ກປ຺ປານໍ, ສຫສ຺ສມ຺ຫິ ຕໂຍ ອຫຸໍ [ມຫາ (ສີ. ສ຺ຍາ.)];

ສມ຺ພຫຸລາ ນາມ ຣາຊາໂນ, ຈກ຺ກວຕ຺ຕີ ມຫພ຺ພລາ.

໑໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນິສ຺ເສຓິທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນິສ຺ເສຓິທາຍກຕ຺ເຖຣສ຺ສາປທານໍ ທຸຕິຍໍ.

໓. ຣຕ຺ຕິປຸປ຺ຜິຍຕ຺ເຖຣອປທານໍ

໑໓. ‘‘ມິຄລຸທ຺ໂທ ປຸເຣ ອາສິໍ, ອຣຎ຺ເຎ ການເນ ອຫໍ;

ວິປສ຺ສິໍ ອທ຺ທສໍ ພຸທ຺ຘໍ, ເທວເທວໍ ນຣາສຠໍ.

໑໔. ‘‘ຣຕ຺ຕິກໍ ປຸປ຺ຜິຕໍ ທິສ຺ວາ, ກຸຏຊໍ ຘຣຓີຣຸຫໍ;

ສມູລໍ ປຄ຺ຄເຫຕ຺ວານ, ອຸປເນສິໍ ມເຫສິໂນ.

໑໕. ‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ປຸປ຺ຜທານສ຺ສິທໍ ຜລໍ.

໑໖. ‘‘ອິໂຕ ຈ ອຏ຺ຐເມ ກປ຺ເປ, ສຸປ຺ປສນ຺ນສນາມໂກ;

ສຕ຺ຕຣຕນສມ຺ປນ຺ໂນ, ຣາຊາໂຫສິໍ ມຫພ຺ພໂລ.

໑໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣຕ຺ຕິປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຣຕ຺ຕິປຸປ຺ຜິຍຕ຺ເຖຣສ຺ສາປທານໍ ຕຕິຍໍ.

໔. ອຸທປານທາຍກຕ຺ເຖຣອປທານໍ

໑໘. ‘‘ວິປສ຺ສິໂນ ຠຄວໂຕ, ອຸທປາໂນ ກໂຕ ມຍາ;

ປິຓ຺ຑປາຕຎ຺ຈ ທຕ຺ວານ [ຄເຫຕ຺ວານ (ສ຺ຍາ.)], ນິຍ຺ຍາເທສິມຫໍ ຕທາ.

໑໙. ‘‘ເອກນວຸຕິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ອຸທປານສ຺ສິທໍ ຜລໍ.

໒໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸທປານທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸທປານທາຍກຕ຺ເຖຣສ຺ສາປທານໍ ຈຕຸຕ຺ຖໍ.

໕. ສີຫາສນທາຍກຕ຺ເຖຣອປທານໍ

໒໑. ‘‘ນິພ຺ພຸເຕ ໂລກນາຖມ຺ຫິ, ປທຸມຸຕ຺ຕຣນາຍເກ;

ປສນ຺ນຈິຕ຺ໂຕ ສຸມໂນ, ສີຫາສນມທາສຫໍ.

໒໒. ‘‘ພຫູຫິ ຄນ຺ຘມາເລຫິ, ທິຏ຺ຐຘມ຺ມສຸຂາວເຫ;

ຕຕ຺ຖ ປູຊຎ຺ຈ ກຕ຺ວານ, ນິພ຺ພາຍຕິ ພຫຸຊ຺ຊໂນ.

໒໓. ‘‘ປສນ຺ນຈິຕ຺ໂຕ ສຸມໂນ, ວນ຺ທິຕ຺ວາ ໂພຘິມຸຕ຺ຕມໍ;

ກປ຺ປານໍ ສຕສຫສ຺ສໍ, ທຸຄ຺ຄຕິໍ ນຸປປຊ຺ຊຫໍ.

໒໔. ‘‘ປນ຺ນຣສສຫສ຺ສມ຺ຫິ, ກປ຺ປານໍ ອຏ຺ຐ ອາສຸ ເຕ [ອຏ຺ຐ ອາສຍຸໍ (ກ.)];

ສິລຸຈ຺ຈຍສນາມາ ຈ, ຣາຊາໂນ ຈກ຺ກວຕ຺ຕິໂນ.

໒໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສີຫາສນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ສີຫາສນທາຍກຕ຺ເຖຣສ຺ສາປທານໍ ປຎ຺ຈມໍ.

໖. ມຄ຺ຄທຕ຺ຕິກຕ຺ເຖຣອປທານໍ

໒໖. ‘‘ອໂນມທສ຺ສີ ຠຄວາ, ທ຺ວິປທິນ຺ໂທ ນຣາສໂຠ;

ທິຏ຺ຐຘມ຺ມສຸຂຕ຺ຖາຍ, ອພ຺ໂຠກາສມ຺ຫິ ຈງ຺ກມິ.

໒໗. ‘‘ອຸທ຺ຘເຕ ປາເທ ປຸປ຺ຜານິ, ໂສຠໍ ມຸທ຺ຘນິ ຕິຏ຺ຐເຣ;

ປສນ຺ນຈິຕ຺ໂຕ ສຸມໂນ, ວນ຺ທິຕ຺ວາ ປຸປ຺ຜໂມກິຣິໍ.

໒໘. ‘‘ວີສກປ຺ປສຫສ຺ສມ຺ຫິ, ອິໂຕ ປຎ຺ຈ ຊນາ ອຫຸໍ;

ປຸປ຺ຜຈ຺ຉທນິຍາ ນາມ, ຈກ຺ກວຕ຺ຕີ ມຫພ຺ພລາ.

໒໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຄ຺ຄທຕ຺ຕິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຄ຺ຄທຕ຺ຕິກຕ຺ເຖຣສ຺ສາປທານໍ ຉຏ຺ຐໍ.

໗. ເອກທີປິຍຕ຺ເຖຣອປທານໍ

໓໐. ‘‘ປທຸມຸຕ຺ຕຣສ຺ສ ມຸນິໂນ, ສຬເລ ໂພຘິມຸຕ຺ຕເມ;

ປສນ຺ນຈິຕ຺ໂຕ ສຸມໂນ, ເອກທີປໍ ອທາສຫໍ.

໓໑. ‘‘ຠເວ ນິພ຺ພຕ຺ຕມານມ຺ຫິ, ນິພ຺ພຕ຺ເຕ ປຸຎ຺ຎສຎ຺ຈເຍ;

ທຸຄ຺ຄຕິໍ ນາຠິຊານາມິ, ທີປທານສ຺ສິທໍ ຜລໍ.

໓໒. ‘‘ໂສຬເສ ກປ຺ປສຫສ຺ເສ, ອິໂຕ ເຕ ຈຕຸໂຣ ຊນາ;

ຈນ຺ທາຠາ ນາມ ນາເມນ, ຈກ຺ກວຕ຺ຕີ ມຫພ຺ພລາ.

໓໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກທີປິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກທີປິຍຕ຺ເຖຣສ຺ສາປທານໍ ສຕ຺ຕມໍ.

ນວມໍ ຠາຓວາຣໍ.

໘. ມຓິປູຊກຕ຺ເຖຣອປທານໍ

໓໔. ‘‘ໂອເຣນ ຫິມວນ຺ຕສ຺ສ, ນທິກາ ສມ຺ປວຕ຺ຕຖ;

ຕສ຺ສາ ຈານຸປເຂຕ຺ຕມ຺ຫິ, ສຍມ຺ຠູ ວສເຕ ຕທາ.

໓໕. ‘‘ມຓິໍ ປຄ຺ຄຍ຺ຫ ປລ຺ລງ຺ກໍ, ສາຘຸຈິຕ຺ຕໍ ມໂນຣມໍ;

ປສນ຺ນຈິຕ຺ໂຕ ສຸມໂນ, ພຸທ຺ຘສ຺ສ ອຠິໂຣປຍິໍ.

໓໖. ‘‘ຈຕຸນ຺ນວຸຕິໂຕ ກປ຺ເປ, ຍໍ ມຓິໍ ອຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໓໗. ‘‘ອິໂຕ ຈ ທ຺ວາທເສ ກປ຺ເປ, ສຕຣໍສີສນາມກາ;

ອຏ຺ຐ ເຕ ອາສຸໍ ຣາຊາໂນ, ຈກ຺ກວຕ຺ຕີ ມຫພ຺ພລາ.

໓໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຓິປູຊໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຓິປູຊກຕ຺ເຖຣສ຺ສາປທານໍ ອຏ຺ຐມໍ.

໙. ຕິກິຈ຺ຉກຕ຺ເຖຣອປທານໍ

໓໙. ‘‘ນຄເຣ ພນ຺ຘຸມຕິຍາ, ເວຊ຺ໂຊ ອາສິໍ ສຸສິກ຺ຂິໂຕ;

ອາຕຸຣານໍ ສທຸກ຺ຂານໍ, ມຫາຊນສຸຂາວໂຫ.

໔໐. ‘‘ພ຺ຍາຘິຕໍ ສມຓໍ ທິສ຺ວາ, ສີລວນ຺ຕໍ ມຫາຊຸຕິໍ;

ປສນ຺ນຈິຕ຺ໂຕ ສຸມໂນ, ເຠສຊ຺ຊມທທິໍ ຕທາ.

໔໑. ‘‘ອໂຣໂຄ ອາສິ ເຕເນວ, ສມໂຓ ສໍວຸຕິນ຺ທ຺ຣິໂຍ;

ອໂສໂກ ນາມ ນາເມນ, ອຸປຏ຺ຐາໂກ ວິປສ຺ສິໂນ.

໔໒. ‘‘ເອກນວຸຕິໂຕ ກປ຺ເປ, ຍໍ ໂອສຘມທາສຫໍ;

ທຸຄ຺ຄຕິໍ ນາຠິຊານາມິ, ເຠສຊ຺ຊສ຺ສ ອິທໍ ຜລໍ.

໔໓. ‘‘ອິໂຕ ຈ ອຏ຺ຐເມ ກປ຺ເປ, ສພ຺ໂພສຘສນາມໂກ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໔໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິກິຈ຺ຉໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິກິຈ຺ຉກຕ຺ເຖຣສ຺ສາປທານໍ ນວມໍ.

໑໐. ສງ຺ຆຸປຏ຺ຐາກຕ຺ເຖຣອປທານໍ

໔໕. ‘‘ເວສ຺ສຠຸມ຺ຫິ ຠຄວຕິ, ອໂຫສາຣາມິໂກ ອຫໍ;

ປສນ຺ນຈິຕ຺ໂຕ ສຸມໂນ, ອຸປຏ຺ຐິໍ ສງ຺ຆມຸຕ຺ຕມໍ.

໔໖. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ອຸປຏ຺ຐານສ຺ສິທໍ ຜລໍ.

໔໗. ‘‘ອິໂຕ ເຕ ສຕ຺ຕເມ ກປ຺ເປ, ສຕ຺ເຕວາສຸໍ ສໂມທກາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໔໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສງ຺ຆຸປຏ຺ຐາໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສງ຺ຆຸປຏ຺ຐາກຕ຺ເຖຣສ຺ສາປທານໍ ທສມໍ.

ກຸມຸທວຄ຺ໂຄ ອຏ຺ຐາຣສໂມ.