໙. ສມາທປກຕ຺ເຖຣອປທານໍ

໔໔. ‘‘ນຄເຣ ພນ຺ຘຸມຕິຍາ, ມຫາປູຄຄໂຓ ອຫຸ;

ເຕສາຫໍ ປວໂຣ ອາສິໍ, ມມ ພທ຺ຘຈຣາ [ປຏ຺ຐຈຣາ (ສ຺ຍາ.)] ຈ ເຕ.

໔໕. ‘‘ສພ຺ເພ ເຕ ສນ຺ນິປາເຕຕ຺ວາ, ປຸຎ຺ຎກມ຺ເມ ສມາທຍິໍ;

ມາຬໍ ກສ຺ສາມ ສງ຺ຆສ຺ສ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ.

໔໖. ‘‘ສາຘູຕິ ເຕ ປຏິສ຺ສຸຕ຺ວາ, ມມ ຉນ຺ທວສານຸຄາ;

ນິຏ຺ຐາເປຕ຺ວາ ຈ ຕໍ ມາຬໍ, ວິປສ຺ສິສ຺ສ ອທມ຺ຫເສ.

໔໗. ‘‘ເອກນວຸຕິໂຕ ກປ຺ເປ, ຍໍ ມາຬມທທິໍ ຕທາ;

ທຸຄ຺ຄຕິໍ ນາຠິຊານາມິ, ມາຬທານສ຺ສິທໍ ຜລໍ.

໔໘. ‘‘ເອກູນສຕ຺ຕຕິກປ຺ເປ [ເອກູນສຏ຺ຐິກປ຺ປມ຺ຫິ (ສີ. ສ຺ຍາ.)],

ເອໂກ ອາສິ ຊນາຘິໂປ.

ອາເທຍ຺ໂຍ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໔໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສມາທປໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສມາທປກຕ຺ເຖຣສ຺ສາປທານໍ ນວມໍ.