໒. ຕມ຺ພປຸປ຺ຜິຍຕ຺ເຖຣອປທານໍ

໗. ‘‘ປຣກມ຺ມາຍເນ ຍຸຕ຺ໂຕ, ອປຣາຘໍ ອກາສຫໍ;

ວນນ຺ຕໍ ອຠິຘາວິສ຺ສໍ, ຠຍເວຣສມປ຺ປິໂຕ.

໘. ‘‘ປຸປ຺ຜິຕໍ ປາທປໍ ທິສ຺ວາ, ປິຓ຺ຑິພນ຺ຘໍ ສຸນິມ຺ມິຕໍ;

ຕມ຺ພປຸປ຺ຜໍ ຄເຫຕ຺ວານ, ໂພຘິຍໍ ໂອກິຣິໍ ອຫໍ.

໙. ‘‘ສມ຺ມຊ຺ຊິຕ຺ວານ ຕໍ ໂພຘິໍ, ປາຏລິໍ ປາທປຸຕ຺ຕມໍ;

ປລ຺ລງ຺ກໍ ອາຠຸຊິຕ຺ວານ, ໂພຘິມູເລ ອຸປາວິສິໍ.

໑໐. ‘‘ຄຕມຄ຺ຄໍ ຄເວສນ຺ຕາ, ອາຄຈ຺ຉຸໍ ມມ ສນ຺ຕິກໍ;

ເຕ ຈ ທິສ຺ວານຫໍ ຕຕ຺ຖ, ອາວຊ຺ຊິໍ ໂພຘິມຸຕ຺ຕມໍ.

໑໑. ‘‘ວນ຺ທິຕ຺ວານ ອຫໍ ໂພຘິໍ, ວິປ຺ປສນ຺ເນນ ເຈຕສາ;

ອເນກຕາເລ ປປຕິໍ, ຄິຣິທຸຄ຺ເຄ ຠຍານເກ.

໑໒. ‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ໂພຘິປູຊາຍິທໍ ຜລໍ.

໑໓. ‘‘ອິໂຕ ຈ ຕຕິເຍ ກປ຺ເປ, ຣາຊາ ສຸສຎ຺ຎໂຕ ອຫໍ [ສໍຖຸສິໂຕ ອຫຸໍ (ສີ.)];

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໑໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕມ຺ພປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕມ຺ພປຸປ຺ຜິຍຕ຺ເຖຣສ຺ສາປທານໍ ທຸຕິຍໍ.