໕. ຣໂຫສຎ຺ຎກຕ຺ເຖຣອປທານໍ

໓໔. ‘‘ຫິມວນ຺ຕສ຺ສາວິທູເຣ, ວສໂຠ ນາມ ປພ຺ພໂຕ;

ຕສ຺ມິໍ ປພ຺ພຕປາທມ຺ຫິ, ອສ຺ສໂມ ອາສິ ມາປິໂຕ.

໓໕. ‘‘ຕີຓິ ສິສ຺ສສຫສ຺ສານິ, ວາເຈສິໍ ພ຺ຣາຫ຺ມໂຓ [ພ຺ຣາຫ຺ມເຓ (ສີ.)] ຕທາ;

ສໍຫຣິຕ຺ວານ [ສໍສາວິຕ຺ວານ (ສ຺ຍາ.)] ເຕ ສິສ຺ເສ, ເອກມນ຺ຕໍ ອຸປາວິສິໍ.

໓໖. ‘‘ເອກມນ຺ຕໍ ນິສີທິຕ຺ວາ, ພ຺ຣາຫ຺ມໂຓ ມນ຺ຕປາຣຄູ;

ພຸທ຺ຘເວທໍ ຄເວສນ຺ໂຕ [ປເວສນ຺ໂຕ (ກ.)], ຎາເຓ ຈິຕ຺ຕໍ ປສາທຍິໍ.

໓໗. ‘‘ຕຕ຺ຖ ຈິຕ຺ຕໍ ປສາເທຕ຺ວາ, ນິສີທິໍ ປຓ຺ຓສນ຺ຖເຣ;

ປລ຺ລງ຺ກໍ ອາຠຸຊິຕ຺ວານ, ຕຕ຺ຖ ກາລງ຺ກໂຕ ອຫໍ.

໓໘. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ຎາຓສຎ຺ຎາຍິທໍ ຜລໍ.

໓໙. ‘‘ສຕ຺ຕວີສຕິກປ຺ປມ຺ຫິ, ຣາຊາ ສິຣິຘໂຣ ອຫຸ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໔໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣໂຫສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຣໂຫສຎ຺ຎກຕ຺ເຖຣສ຺ສາປທານໍ ປຎ຺ຈມໍ.