໒. ປຸປ຺ຜຖູປິຍຕ຺ເຖຣອປທານໍ

໑໐. ‘‘ຫິມວນ຺ຕສ຺ສາວິທູເຣ, ກຸກ຺ກຸໂຣ ນາມ [ກຸກ຺ກຸໂຏ ນາມ (ສີ.)] ປພ຺ພໂຕ;

ເວມຊ຺ເຌ ຕສ຺ສ ວສຕິ, ພ຺ຣາຫ຺ມໂຓ ມນ຺ຕປາຣຄູ.

໑໑. ‘‘ປຎ຺ຈ ສິສ຺ສສຫສ຺ສານິ, ປຣິວາເຣນ຺ຕິ ມໍ ສທາ;

ປຸພ຺ພຸຏ຺ຐາຍີ ຈ ເຕ ອາສຸໍ, ມນ຺ເຕສຸ ຈ ວິສາຣທາ.

໑໒. ‘‘ພຸທ຺ໂຘ ໂລເກ ສມຸປ຺ປນ຺ໂນ, ຕໍ ວິຊານາຖ ໂນ ຠວໍ;

ອສີຕິພ຺ຍຎ຺ຊນານສ຺ສ, ພາຕ຺ຕິໍສວຣລກ຺ຂຓາ.

໑໓. ‘‘ພ຺ຍາມປ຺ປໂຠ ຊິນວໂຣ, ອາທິຈ຺ໂຈວ ວິໂຣຈຕິ;

ສິສ຺ສານໍ ວຈນໍ ສຸຕ຺ວາ, ພ຺ຣາຫ຺ມໂຓ ມນ຺ຕປາຣຄູ.

໑໔. ‘‘ອສ຺ສມາ ອຠິນິກ຺ຂມ຺ມ, ທິສໍ ປຸຈ຺ຉຕິ ສິສ຺ສເກ [ພ຺ຣາຫ຺ມໂຓ (ສ຺ຍາ.)];

ຍມ຺ຫິ ເທເສ ມຫາວີໂຣ, ວສຕິ ໂລກນາຍໂກ.

໑໕. ‘‘ຕາຫໍ ທິສໍ ນມສ຺ສິສ຺ສໍ, ຊິນໍ ອປ຺ປຏິປຸຄ຺ຄລໍ;

ອຸທຄ຺ຄຈິຕ຺ໂຕ ສຸມໂນ, ປູເຊສິໍ ຕໍ ຕຖາຄຕໍ.

໑໖. ‘‘ເອຖ ສິສ຺ສາ ຄມິສ຺ສາມ, ທກ຺ຂິສ຺ສາມ ຕຖາຄຕໍ;

ວນ຺ທິຕ຺ວາ ສຕ຺ຖຸໂນ ປາເທ, ໂສສ຺ສາມ ຊິນສາສນໍ.

໑໗. ‘‘ເອກາຫໍ ອຠິນິກ຺ຂມ຺ມ, ພ຺ຍາຘິໍ ປຏິລຠິໍ ອຫໍ;

ພ຺ຍາຘິນາ ປີຬິໂຕ ສນ຺ໂຕ, ສາລໍ ວາສຍິຕຸໍ ຄມິໍ.

໑໘. ‘‘ສພ຺ເພ ສິສ຺ເສ ສມາເນຕ຺ວາ, ອປຸຈ຺ຉິໍ ເຕ ຕຖາຄຕໍ;

ກີທິສໍ ໂລກນາຖສ຺ສ, ຄຸຓໍ ປຣມພຸທ຺ຘິໂນ.

໑໙. ‘‘ເຕ ເມ ປຸຏ຺ຐາ ວິຍາກໍສຸ, ຍຖາ ທສ຺ສາວິໂນ ຕຖາ;

ສກ຺ກຈ຺ຈໍ ພຸທ຺ຘເສຏ຺ຐໍ ຕໍ, ເທເສສຸໍ [ທສ຺ເສສຸໍ (ສີ. ສ຺ຍາ.)] ມມ ສມ຺ມຸຂາ.

໒໐. ‘‘ເຕສາຫໍ ວຈນໍ ສຸຕ຺ວາ, ສກໍ ຈິຕ຺ຕໍ ປສາທຍິໍ;

ປຸປ຺ເຜຫິ ຖູປໍ ກຕ຺ວານ, ຕຕ຺ຖ ກາລງ຺ກໂຕ ອຫໍ.

໒໑. ‘‘ເຕ ເມ ສຣີຣໍ ຌາເປຕ຺ວາ, ອຄມຸໍ ພຸທ຺ຘສນ຺ຕິກໍ;

ອຎ຺ຊລິໍ ປຄ຺ຄເຫຕ຺ວານ, ສຕ຺ຖາຣມຠິວາທຍຸໍ.

໒໒. ‘‘ປຸປ຺ເຜຫິ ຖູປໍ ກຕ຺ວານ, ສຸຄຕສ຺ສ ມເຫສິໂນ;

ກປ຺ປານໍ ສຕສຫສ຺ສໍ, ທຸຄ຺ຄຕິໍ ນຸປປຊ຺ຊຫໍ.

໒໓. ‘‘ຈຕ຺ຕາລີສສຫສ຺ສມ຺ຫິ, ກປ຺ເປ ໂສຬສ ຂຕ຺ຕິຍາ;

ນາເມນຄ຺ຄິສມາ ນາມ, ຈກ຺ກວຕ຺ຕີ ມຫພ຺ພລາ.

໒໔. ‘‘ວີສກປ຺ປສຫສ຺ສມ຺ຫິ, ຣາຊາໂນ ຈກ຺ກວຕ຺ຕິໂນ;

ຆຕາສນສນາມາວ, ອຏ຺ຐຕ຺ຕິໍສ ມຫີປຕີ.

໒໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຸປ຺ຜຖູປິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຸປ຺ຜຖູປິຍຕ຺ເຖຣສ຺ສາປທານໍ ທຸຕິຍໍ.