໗. ມຘຸປິຓ຺ຑິກຕ຺ເຖຣອປທານໍ

໓໗. ‘‘ວິປິເນ [ວິວເນ (ສ຺ຍາ. ອຏ຺ຐ.)] ການເນ ທິສ຺ວາ, ອປ຺ປສທ຺ເທ ນິຣາກຸເລ;

ສິທ຺ຘຕ຺ຖໍ ອິສິນໍ ເສຏ຺ຐໍ, ອາຫຸຕີນໍ ປຏິຄ຺ຄຫໍ.

໓໘. ‘‘ນິພ຺ພຸຕຕ຺ຕໍ [ນິພ຺ພຸຕຄ຺ຄໍ (ກ.), ນິພ຺ພູຕິກໍ (ສ຺ຍາ.)] ມຫານາຄໍ, ນິສຠາຊານິຍໍ ຍຖາ;

ໂອສຘິໍວ ວິໂຣຈນ຺ຕໍ, ເທວສງ຺ຆນມສ຺ສິຕໍ.

໓໙. ‘‘ວິຕ຺ຕິ ມມາຫຸ ຕາວເທ [ວິຕ຺ຕິ ເມ ປາຫຸນາ ຕາວ (ສີ. ສ຺ຍາ.)], ຎາຓໍ ອຸປ຺ປຊ຺ຊິ ຕາວເທ;

ວຸຏ຺ຐິຕສ຺ສ ສມາຘິມ຺ຫາ, ມຘຸໍ ທຕ຺ວານ ສຕ຺ຖຸໂນ.

໔໐. ‘‘ວນ຺ທິຕ຺ວາ ສຕ຺ຖຸໂນ ປາເທ, ປກ຺ກາມິໍ ປາຈິນາມຸໂຂ;

ຈຕຸຕ຺ຕິໍສມ຺ຫິ ກປ຺ປມ຺ຫິ, ຣາຊາ ອາສິໍ ສຸທສ຺ສໂນ.

໔໑. ‘‘ມຘຸ ຠິເສຫິ ສວຕິ, ໂຠຊນມ຺ຫິ ຈ ຕາວເທ;

ມຘຸວສ຺ສໍ ປວສ຺ສິຕ຺ຖ, ປຸພ຺ພກມ຺ມສ຺ສິທໍ ຜລໍ.

໔໒. ‘‘ຈຕຸນ຺ນວຸຕິໂຕ ກປ຺ເປ, ຍໍ ມຘຸໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ມຘຸທານສ຺ສິທໍ ຜລໍ.

໔໓. ‘‘ຈຕຸຕ຺ຕິໍເສ ອິໂຕ ກປ຺ເປ, ຈຕ຺ຕາໂຣ ເຕ ສຸທສ຺ສນາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໔໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຘຸປິຓ຺ຑິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຘຸປິຓ຺ຑິກຕ຺ເຖຣສ຺ສາປທານໍ ສຕ຺ຕມໍ.