(໑໗-໑໙) ສີຫປຸພ຺ພທ຺ຘກາຍາທິຕິລກ຺ຂຓໍ

໒໒໔. ‘‘ຍມ຺ປິ, ຠິກ຺ຂເວ, ຕຖາຄໂຕ ປຸຣິມໍ ຊາຕິໍ ປຸຣິມໍ ຠວໍ ປຸຣິມໍ ນິເກຕໍ ປຸພ຺ເພ ມນຸສ຺ສຠູໂຕ ສມາໂນ ພຫຸຊນສ຺ສ ອຕ຺ຖກາໂມ ອໂຫສິ ຫິຕກາໂມ ຜາສຸກາໂມ ໂຍຄກ຺ເຂມກາໂມ – ‘ກິນ຺ຕິເມ ສທ຺ຘາຍ ວຑ຺ເຒຍ຺ຍຸໍ, ສີເລນ ວຑ຺ເຒຍ຺ຍຸໍ, ສຸເຕນ ວຑ຺ເຒຍ຺ຍຸໍ [ສຸເຕນ ວຑ຺ເຒຍ຺ຍຸໍ, ພຸທ຺ຘິຍາ ວຑ຺ເຒຍ຺ຍຸໍ (ສ຺ຍາ.)], ຈາເຄນ ວຑ຺ເຒຍ຺ຍຸໍ, ຘມ຺ເມນ ວຑ຺ເຒຍ຺ຍຸໍ, ປຎ຺ຎາຍ ວຑ຺ເຒຍ຺ຍຸໍ, ຘນຘຎ຺ເຎນ ວຑ຺ເຒຍ຺ຍຸໍ, ເຂຕ຺ຕວຕ຺ຖຸນາ ວຑ຺ເຒຍ຺ຍຸໍ, ທ຺ວິປທຈຕຸປ຺ປເທຫິ ວຑ຺ເຒຍ຺ຍຸໍ, ປຸຕ຺ຕທາເຣຫິ ວຑ຺ເຒຍ຺ຍຸໍ, ທາສກມ຺ມກຣໂປຣິເສຫິ ວຑ຺ເຒຍ຺ຍຸໍ, ຎາຕີຫິ ວຑ຺ເຒຍ຺ຍຸໍ, ມິຕ຺ເຕຫິ ວຑ຺ເຒຍ຺ຍຸໍ, ພນ຺ຘເວຫິ ວຑ຺ເຒຍ຺ຍຸ’ນ຺ຕິ. ໂສ ຕສ຺ສ ກມ຺ມສ຺ສ ກຏຕ຺ຕາ…ເປ… ໂສ ຕໂຕ ຈຸໂຕ ອິຕ຺ຖຕ຺ຕໍ ອາຄໂຕ ສມາໂນ ອິມານິ ຕີຓິ ມຫາປຸຣິສລກ຺ຂຓານິ ປຏິລຠຕິ. ສີຫປຸພ຺ພທ຺ຘກາໂຍ ຈ ໂຫຕິ ຈິຕນ຺ຕຣໍໂສ ຈ ສມວຏ຺ຏກ຺ຂນ຺ໂຘ ຈ.

‘‘ໂສ ເຕຫິ ລກ຺ຂເຓຫິ ສມນ຺ນາຄໂຕ ສເຈ ອຄາຣໍ ອຊ຺ຌາວສຕິ, ຣາຊາ ໂຫຕິ ຈກ຺ກວຕ຺ຕີ…ເປ… ຣາຊາ ສມາໂນ ກິໍ ລຠຕິ? ອປຣິຫານຘມ຺ໂມ ໂຫຕິ, ນ ປຣິຫາຍຕິ ຘນຘຎ຺ເຎນ ເຂຕ຺ຕວຕ຺ຖຸນາ ທ຺ວິປທຈຕຸປ຺ປເທຫິ ປຸຕ຺ຕທາເຣຫິ ທາສກມ຺ມກຣໂປຣິເສຫິ ຎາຕີຫິ ມິຕ຺ເຕຫິ ພນ຺ຘເວຫິ, ນ ປຣິຫາຍຕິ ສພ຺ພສມ຺ປຕ຺ຕິຍາ. ຣາຊາ ສມາໂນ ອິທໍ ລຠຕິ… ພຸທ຺ໂຘ ສມາໂນ ກິໍ ລຠຕິ? ອປຣິຫານຘມ຺ໂມ ໂຫຕິ, ນ ປຣິຫາຍຕິ ສທ຺ຘາຍ ສີເລນ ສຸເຕນ ຈາເຄນ ປຎ຺ຎາຍ, ນ ປຣິຫາຍຕິ ສພ຺ພສມ຺ປຕ຺ຕິຍາ. ພຸທ຺ໂຘ ສມາໂນ ອິທໍ ລຠຕິ’’. ເອຕມຕ຺ຖໍ ຠຄວາ ອໂວຈ.

໒໒໕. ຕຕ຺ເຖຕໍ ວຸຈ຺ຈຕິ –

‘‘ສທ຺ຘາຍ ສີເລນ ສຸເຕນ ພຸທ຺ຘິຍາ,

ຈາເຄນ ຘມ຺ເມນ ພຫູຫິ ສາຘຸຫິ;

ຘເນນ ຘຎ຺ເຎນ ຈ ເຂຕ຺ຕວຕ຺ຖຸນາ,

ປຸຕ຺ເຕຫິ ທາເຣຫິ ຈຕຸປ຺ປເທຫິ ຈ.

‘‘ຎາຕີຫິ ມິຕ຺ເຕຫິ ຈ ພນ຺ຘເວຫິ ຈ,

ພເລນ ວຓ຺ເຓນ ສຸເຂນ ຈູຠຍໍ;

ກຖໍ ນ ຫາເຍຍ຺ຍຸໍ ປເຣຕິ ອິຈ຺ຉຕິ,

ອຕ຺ຖສ຺ສ ມິທ຺ຘີ ຈ [ອິທໍ ສມິທ຺ຘຎ຺ຈ (ກ.), ອທ຺ຘໍ ສມິທ຺ຘຎ຺ຈ (ສ຺ຍາ.)] ປນາຠິກງ຺ຂຕິ.

‘‘ສ ສີຫປຸພ຺ພທ຺ຘສຸສຓ຺ຐິໂຕ ອຫຸ,

ສມວຏ຺ຏກ຺ຂນ຺ໂຘ ຈ ຈິຕນ຺ຕຣໍໂສ;

ປຸພ຺ເພ ສຸຈິຓ຺ເຓນ ກເຕນ ກມ຺ມຸນາ,

ອຫານິຍໍ ປຸພ຺ພນິມິຕ຺ຕມສ຺ສ ຕໍ.

‘‘ຄິຫີປິ ຘຎ຺ເຎນ ຘເນນ ວຑ຺ຒຕິ,

ປຸຕ຺ເຕຫິ ທາເຣຫິ ຈຕຸປ຺ປເທຫິ ຈ;

ອກິຎ຺ຈໂນ ປພ຺ພຊິໂຕ ອນຸຕ຺ຕຣໍ,

ປປ຺ໂປຕິ ໂພຘິໍ ອສຫານຘມ຺ມຕ’’ນ຺ຕິ [ສມ຺ໂພຘິມຫານຘມ຺ມຕນ຺ຕິ (ສ຺ຍາ. ກ.) ຏີກາ ໂອໂລເກຕພ຺ພາ].