໗. ຊາລິຍສຸຕ຺ຕໍ

ທ຺ເວປພ຺ພຊິຕວຕ຺ຖຸ

໓໗໘. ເອວໍ ເມ ສຸຕໍ – ເອກໍ ສມຍໍ ຠຄວາ ໂກສມ຺ພິຍໍ ວິຫຣຕິ ໂຆສິຕາຣາເມ. ເຕນ ໂຂ ປນ ສມເຍນ ທ຺ເວ ປພ຺ພຊິຕາ – ມຸຓ຺ຑິໂຍ ຈ ປຣິພ຺ພາຊໂກ ຊາລິໂຍ ຈ ທາຣຸປຕ຺ຕິກນ຺ເຕວາສີ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິໍສຸ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ອຏ຺ຐໍສຸ. ເອກມນ຺ຕໍ ຐິຕາ ໂຂ ເຕ ທ຺ເວ ປພ຺ພຊິຕາ ຠຄວນ຺ຕໍ ເອຕທໂວຈຸໍ – ‘‘ກິໍ ນຸ ໂຂ, ອາວຸໂສ ໂຄຕມ, ຕໍ ຊີວໍ ຕໍ ສຣີຣໍ, ອຸທາຫຸ ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ?

໓໗໙. ‘‘ເຕນ ຫາວຸໂສ, ສຸຓາຖ ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວມາວຸໂສ’’ຕິ ໂຂ ເຕ ທ຺ເວ ປພ຺ພຊິຕາ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ອິຘາວຸໂສ, ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ, ສມ຺ມາສມ຺ພຸທ຺ໂຘ…ເປ… (ຍຖາ ໑໙໐-໒໑໒ ອນຸຈ຺ເຉເທສຸ ເອວໍ ວິຕ຺ຖາເຣຕພ຺ພໍ). ເອວໍ ໂຂ, ອາວຸໂສ, ຠິກ຺ຂຸ ສີລສມ຺ປນ຺ໂນ ໂຫຕິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ. ໂຍ ໂຂ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ກລ຺ລໍ ນຸ ໂຂ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ໂຍ ໂສ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ກລ຺ລໍ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ອຫໍ ໂຂ ປເນຕໍ, ອາວຸໂສ, ເອວໍ ຊານາມິ ເອວໍ ປສ຺ສາມິ. ອຖ ຈ ປນາຫໍ ນ ວທາມິ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ. ໂຍ ໂຂ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ກລ຺ລໍ ນຸ ໂຂ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ? ໂຍ ໂສ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ ກລ຺ລໍ, ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ອຫໍ ໂຂ ປເນຕໍ, ອາວຸໂສ, ເອວໍ ຊານາມິ ເອວໍ ປສ຺ສາມິ. ອຖ ຈ ປນາຫໍ ນ ວທາມິ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາ…ເປ… ຎາຓທສ຺ສນາຍ ຈິຕ຺ຕໍ ອຠິນີຫຣຕິ ອຠິນິນ຺ນາເມຕິ…ເປ… ໂຍ ໂຂ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ກລ຺ລໍ ນຸ ໂຂ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ໂຍ ໂສ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ ກລ຺ລໍ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ອຫໍ ໂຂ ປເນຕໍ, ອາວຸໂສ, ເອວໍ ຊານາມິ ເອວໍ ປສ຺ສາມິ. ອຖ ຈ ປນາຫໍ ນ ວທາມິ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາ…ເປ….

໓໘໐. …ເປ… ນາປຣໍ ອິຕ຺ຖຕ຺ຕາຍາຕິ ປຊານາຕິ. ໂຍ ໂຂ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ກລ຺ລໍ ນຸ ໂຂ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ? ໂຍ ໂສ, ອາວຸໂສ, ຠິກ຺ຂຸ ເອວໍ ຊານາຕິ ເອວໍ ປສ຺ສຕິ, ນ ກລ຺ລໍ ຕສ຺ເສຕໍ ວຈນາຍ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາຕິ. ອຫໍ ໂຂ ປເນຕໍ, ອາວຸໂສ, ເອວໍ ຊານາມິ ເອວໍ ປສ຺ສາມິ. ອຖ ຈ ປນາຫໍ ນ ວທາມິ – ‘ຕໍ ຊີວໍ ຕໍ ສຣີຣ’ນ຺ຕິ ວາ ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ວາ’’ຕິ. ອິທມໂວຈ ຠຄວາ. ອຕ຺ຕມນາ ເຕ ທ຺ເວ ປພ຺ພຊິຕາ ຠຄວໂຕ ຠາສິຕໍ ອຠິນນ຺ທຸນ຺ຕິ.

ຊາລິຍສຸຕ຺ຕໍ ນິຏ຺ຐິຕໍ ສຕ຺ຕມໍ.