໓. ອນິຍຕກຓ຺ຑໍ

໑. ປຐມອນິຍຕສິກ຺ຂາປທວຓ຺ຓນາ

໔໔໓. ເຕນ ສມເຍນ ພຸທ຺ໂຘ ຠຄວາຕິ ປຐມອນິຍຕສິກ຺ຂາປທໍ. ຕຕ຺ຖ ກາລຍຸຕ຺ຕໍ ສມຸລ຺ລປນ຺ໂຕຕິ ກາລໍ ສລ຺ລກ຺ເຂຕ຺ວາ ຍທາ ນ ອຎ຺ໂຎ ໂກຈິ ສມີເປນ ຄຈ຺ຉຕິ ວາ ອາຄຈ຺ຉຕິ ວາ ຕທາ ຕທນຸຣູປໍ ‘‘ກຈ຺ຈິ ນ ອຸກ຺ກຓ຺ຐສິ, ນ ກິລມສິ, ນ ຉາຕາສີ’’ຕິອາທິກໍ ເຄຫສ຺ສິຕໍ ກຖໍ ກເຖນ຺ໂຕ. ກາລຍຸຕ຺ຕໍ ຘມ຺ມໍ ຠຓນ຺ໂຕຕິ ກາລໍ ສລ຺ລກ຺ເຂຕ຺ວາ ຍທາ ອຎ຺ໂຎ ໂກຈິ ສມີເປນ ຄຈ຺ຉຕິ ວາ ອາຄຈ຺ຉຕິ ວາ ຕທາ ຕທນຸຣູປໍ ‘‘ອຸໂປສຖໍ ກເຣຍ຺ຍາສິ, ສລາກຠຕ຺ຕໍ ທເທຍ຺ຍາສີ’’ຕິອາທິກໍ ຘມ຺ມກຖໍ ກເຖນ຺ໂຕ.

ພຫູ ຘີຕໂຣ ຈ ປຸຕ຺ຕາ ຈ ອສ຺ສາຕິ ພຫຸປຸຕ຺ຕາ. ຕສ຺ສາ ກິຣ ທສ ປຸຕ຺ຕາ ທສ ຘີຕໂຣ ອເຫສຸໍ, ພຫູ ນຕ຺ຕາໂຣ ອສ຺ສາຕິ ພຫຸນຕ຺ຕາ. ຍເຖວ ຫິ ຕສ຺ສາ ເອວມສ຺ສາ ປຸຕ຺ຕຘີຕານມ຺ປິ ວີສຕິ ວີສຕິ ທາຣກາ ອເຫສຸໍ, ອິຕິ ສາ ວີສຸຕ຺ຕຣຈຕຸສຕປຸຕ຺ຕນຕ຺ຕປຣິວາຣາ ອໂຫສິ. ອຠິມງ຺ຄລສມ຺ມຕາຕິ ອຸຕ຺ຕມມງ຺ຄລສມ຺ມຕາ. ຍຎ຺ເຎສູຕິ ທານປ຺ປທາເນສຸ. ຉເຓສູຕິ ອາວາຫວິວາຫມງ຺ຄລາທີສຸ ອນ຺ຕຣຸສ຺ສເວສຸ. ອຸສ຺ສເວສູຕິ ອາສາຬ຺ຫີປວາຣຓນກ຺ຂຕ຺ຕາທີສຸ ມຫຸສ຺ສເວສຸ. ປຐມໍ ໂຠເຊນ຺ຕີຕິ ‘‘ອິເມປິ ທາຣກາ ຕຍາ ສມານາຍຸກາ ນິໂຣຄາ ໂຫນ຺ຕູ’’ຕິ ອາຍາຈນ຺ຕາ ປຐມໍເຍວ ໂຠເຊນ຺ຕິ, ເຍປິ ສທ຺ຘາ ໂຫນ຺ຕິ ປສນ຺ນາ, ເຕປິ ຠິກ຺ຂູ ໂຠເຊຕ຺ວາ ຕທນນ຺ຕຣໍ ສພ຺ພປຐມໍ ຕໍເຍວ ໂຠເຊນ຺ຕິ. ນາທິຍີຕິ ຕສ຺ສາ ວຈນໍ ນ ອາທິຍິ, ນ ຄຓ຺ຫິ, ນ ວາ ອາທຣມກາສີຕິ ອຕ຺ໂຖ.

໔໔໔-໕. ອລໍກມ຺ມນິເຍຕິ ກມ຺ມກ຺ຂມໍ ກມ຺ມໂຍຄ຺ຄນ຺ຕິ ກມ຺ມນິຍໍ, ອລໍ ປຣິຍຕ຺ຕໍ ກມ຺ມນິຍຠາວາຍາຕິ ອລໍກມ຺ມນິຍໍ, ຕສ຺ມິໍ ອລໍກມ຺ມນິເຍ, ຍຕ຺ຖ ອຊ຺ຌາຈາຣໍ ກໂຣນ຺ຕາ ສກ຺ໂກນ຺ຕິ, ຕໍ ກມ຺ມໍ ກາຕຸໍ ຕາທິເສຕິ ອຕ຺ໂຖ. ເຕເນວສ຺ສ ປທຠາຊເນ ວຸຕ຺ຕໍ – ‘‘ສກ຺ກາ ໂຫຕິ ເມຖຸນໍ ຘມ຺ມໍ ປຏິເສວິຕຸ’’ນ຺ຕິ, ຍຕ຺ຖ ເມຖຸນໍ ຘມ຺ມໍ ສກ຺ກາ ໂຫຕິ ປຏິເສວິຕຸນ຺ຕິ ວຸຕ຺ຕໍ ໂຫຕິ. ນິສຊ຺ຊໍ ກປ຺ເປຍ຺ຍາຕິ ນິສຊ຺ຊໍ ກເຣຍ຺ຍ, ນິສີເທຍ຺ຍາຕິ ອຕ຺ໂຖ. ຍສ຺ມາ ປນ ນິສີທິຕ຺ວາວ ນິປຊ຺ຊຕິ, ເຕນສ຺ສ ປທຠາຊເນ ອຸຠຍມ຺ປິ ວຸຕ຺ຕໍ. ຕຕ຺ຖ ອຸປນິສິນ຺ໂນຕິ ອຸປຄນ຺ຕ຺ວາ ນິສິນ຺ໂນ. ເອວໍ ອຸປນິປນ຺ໂນປິ ເວທິຕພ຺ໂພ. ຠິກ຺ຂຸ ນິສິນ຺ເນຕິ ຠິກ຺ຂຸມ຺ຫິ ນິສິນ຺ເນຕິ ອຕ຺ໂຖ. ອຸໂຠ ວາ ນິສິນ຺ນາຕິ ທ຺ເວປິ ອປຈ຺ຉາ ອປຸຣິມໍ ນິສິນ຺ນາ. ເອຕ຺ຖ ຈ ກິຎ຺ຈາປິ ປາຬິຍໍ ‘‘ໂສຕສ຺ສ ຣໂຫ’’ຕິ ອາຄຕໍ, ຈກ຺ຂຸສ຺ສ ຣເຫເນວ ປນ ປຣິຈ຺ເຉໂທ ເວທິຕພ຺ໂພ. ສເຈປິ ຫິ ປິຫິຕກວາຏສ຺ສ ຄພ຺ຠສ຺ສ ທ຺ວາເຣ ນິສິນ຺ໂນ ວິຎ຺ຎູ ປຸຣິໂສ ໂຫຕິ, ເນວ ອນາປຕ຺ຕິໍ ກໂຣຕິ. ອປິຫິຕກວາຏສ຺ສ ປນ ທ຺ວາເຣ ນິສິນ຺ໂນ ອນາປຕ຺ຕິໍ ກໂຣຕິ. ນ ເກວລຎ຺ຈ ທ຺ວາເຣ ອນ຺ໂຕທ຺ວາທສຫຕ຺ເຖປິ ໂອກາເສ ນິສິນ຺ໂນ, ສເຈ ສຈກ຺ຂຸໂກ ວິກ຺ຂິຕ຺ໂຕປິ ນິທ຺ທາຍນ຺ໂຕປິ ອນາປຕ຺ຕິໍ ກໂຣຕິ. ສມີເປ ຐິໂຕປິ ອນ຺ໂຘ ນ ກໂຣຕິ, ຈກ຺ຂຸມາປິ ນິປຊ຺ຊິຕ຺ວາ ນິທ຺ທາຍນ຺ໂຕ ນ ກໂຣຕິ. ອິຕ຺ຖີນໍ ປນ ສຕມ຺ປິ ອນາປຕ຺ຕິໍ ນ ກໂຣຕິເຍວ.

ສທ຺ເຘຍ຺ຍວຈສາຕິ ສທ຺ຘາຕພ຺ພວຈນາ. ສາ ປນ ຍສ຺ມາ ອຣິຍສາວິກາວ ໂຫຕິ, ເຕນສ຺ສ ປທຠາຊເນ ‘‘ອາຄຕຜລາ’’ຕິອາທິ ວຸຕ຺ຕໍ. ຕຕ຺ຖ ອາຄຕໍ ຜລໍ ອສ຺ສາຕິ ອາຄຕຜລາ ປຏິລທ຺ຘໂສຕາປຕ຺ຕິຜລາຕິ ອຕ຺ໂຖ. ອຠິສເມຕາວິນີຕິ ປຏິວິທ຺ຘຈຕຸສຈ຺ຈາ. ວິຎ຺ຎາຕໍ ສິກ຺ຂຕ຺ຕຍສາສນໍ ເອຕາຍາຕິ ວິຎ຺ຎາຕສາສນາ. ນິສຊ຺ຊໍ ຠິກ຺ຂຸ ປຏິຊານມາໂນຕິ ກິຎ຺ຈາປິ ເອວຣູປາ ອຸປາສິກາ ທິສ຺ວາ ວທຕິ, ອຖ ໂຂ ຠິກ຺ຂຸ ນິສຊ຺ຊໍ ປຏິຊານມາໂນເຍວ ຕິຓ຺ຓໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ, ນ ອປ຺ປຏິຊານມາໂນຕິ ອຕ຺ໂຖ.

ເຍນ ວາ ສາ ສທ຺ເຘຍ຺ຍວຈສາ ອຸປາສິກາ ວເທຍ຺ຍ ເຕນ ໂສ ຠິກ຺ຂຸ ກາເຣຕພ຺ໂພຕິ ນິສຊ຺ຊາທີສຸ ອາກາເຣສຸ ເຍນ ວາ ອາກາເຣນ ສທ຺ຘິໍ ເມຖຸນຘມ຺ມາທີນິ ອາໂຣເປຕ຺ວາ ສາ ອຸປາສິກາ ວເທຍ຺ຍ, ປຏິຊານມາໂນວ ເຕນ ໂສ ຠິກ຺ຂຸ ກາເຣຕພ຺ໂພ. ເອວຣູປາຍປິ ອຸປາສິກາຍ ວຈນມຕ຺ເຕນ ນ ກາເຣຕພ຺ໂພຕິ ອຕ຺ໂຖ. ກສ຺ມາ? ຍສ຺ມາ ທິຏ຺ຐໍ ນາມ ຕຖາປິ ໂຫຕິ, ອຎ຺ຎຖາປິ ໂຫຕິ.

ຕທຕ຺ຖໂຊຕນຕ຺ຖຎ຺ຈ ອິທໍ ວຕ຺ຖຸໍ ອຸທາຫຣນ຺ຕິ – ມລ຺ລາຣາມວິຫາເຣ ກິຣ ເອໂກ ຂີຓາສວຕ຺ເຖໂຣ ເອກທິວສໍ ອຸປຏ຺ຐາກກຸລໍ ຄນ຺ຕ຺ວາ ອນ຺ໂຕເຄເຫ ນິສີທິ, ອຸປາສິກາປິ ສຍນປລ຺ລງ຺ກໍ ນິສ຺ສາຍ ຐິຕາ ໂຫຕິ. ອເຖໂກ ປິຓ຺ຑຈາຣິໂກ ທ຺ວາເຣ ຐິໂຕ ທິສ຺ວາ ‘‘ເຖໂຣ ອຸປາສິກາຍ ສທ຺ຘິໍ ເອກາສເນ ນິສິນ຺ໂນ’’ຕິ ສຎ຺ຎໍ ປຏິລຠິຕ຺ວາ ປຸນປ຺ປຸນໍ ໂອໂລເກສິ. ເຖໂຣປິ ‘‘ອຍໍ ມຍິ ອສຸທ຺ຘລທ຺ຘິໂກ ຊາໂຕ’’ຕິ ສລ຺ລກ຺ເຂຕ຺ວາ ກຕຠຕ຺ຕກິຈ຺ໂຈ ວິຫາຣໍ ຄນ຺ຕ຺ວາ ອຕ຺ຕໂນ ວສນຏ຺ຐານໍ ປວິສິຕ຺ວາ ອນ຺ໂຕວ ນິສີທິ. ໂສປິ ຠິກ຺ຂຸ ‘‘ເຖຣໍ ໂຈເທສ຺ສາມີ’’ຕິ ອາຄນ຺ຕ຺ວາ ອຸກ຺ກາສິຕ຺ວາ ທ຺ວາຣໍ ວິວຣິ. ເຖໂຣ ຕສ຺ສ ຈິຕ຺ຕໍ ຎຕ຺ວາ ອາກາເສ ອຸປ຺ປຕິຕ຺ວາ ກູຏາຄາຣກຓ຺ຓິກໍ ນິສ຺ສາຍ ປລ຺ລງ຺ເກນ ນິສີທິ. ໂສປິ ຠິກ຺ຂຸ ອນ຺ໂຕ ປວິສິຕ຺ວາ ມຎ຺ຈຎ຺ຈ ເຫຏ຺ຐາມຎ຺ຈຎ຺ຈ ໂອໂລເກຕ຺ວາ ເຖຣໍ ອປສ຺ສນ຺ໂຕ ອຸທ຺ຘໍ ອຸລ຺ໂລເກສິ, ອຖ ອາກາເສ ນິສິນ຺ນໍ ເຖຣໍ ທິສ຺ວາ ‘‘ຠນ຺ເຕ, ເອວໍ ມຫິທ຺ຘິກາ ນາມ ຕຸມ຺ເຫ ມາຕຸຄາເມນ ສທ຺ຘິໍ ເອກາສເນ ນິສິນ຺ນຠາວໍ ວທາເປຖ ເອວາ’’ຕິ ອາຫ. ເຖໂຣ ‘‘ອນ຺ຕຣຆຣສ຺ເສເວໂສ ອາວຸໂສ ໂທໂສ, ອຫໍ ປນ ຕໍ ສທ຺ຘາເປຕຸໍ ອສກ຺ໂກນ຺ໂຕ ເອວມກາສິໍ, ຣກ຺ເຂຍ຺ຍາສິ ມ’’ນ຺ຕິ ວຕ຺ວາ ໂອຕຣີຕິ.

໔໔໖. ອິໂຕ ປຣໍ ສາ ເຈ ເອວໍ ວເທຍ຺ຍາຕິອາທິ ສພ຺ພໍ ປຏິຎ຺ຎາຍ ກາຣຓາກາຣທສ຺ສນຕ຺ຖໍ ວຸຕ຺ຕໍ, ຕຕ຺ຖ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕຕິ ມາຕຸຄາມສ຺ສ ມຄ຺ເຄ ເມຖຸນໍ ຘມ຺ມໍ ປຏິເສວນ຺ໂຕຕິ ອຕ຺ໂຖ. ນິສຊ຺ຊາຍ ກາເຣຕພ຺ໂພຕິ ນິສຊ຺ຊໍ ປຏິຊານິຕ຺ວາ ເມຖຸນຘມ຺ມປຏິເສວນໍ ອປ຺ປຏິຊານນ຺ໂຕ ເມຖຸນຘມ຺ມປາຣາຊິກາປຕ຺ຕິຍາ ອກາເຣຕ຺ວາ ນິສຊ຺ຊາມຕ຺ເຕນ ຍໍ ອາປຕ຺ຕິໍ ອາປຊ຺ຊຕິ ຕາຍ ກາເຣຕພ຺ໂພ, ປາຈິຕ຺ຕິຍາປຕ຺ຕິຍາ ກາເຣຕພ຺ໂພຕິ ອຕ຺ໂຖ. ເອເຕນ ນເຍນ ສພ຺ພຈຕຸກ຺ເກສຸ ວິນິຈ຺ຉໂຍ ເວທິຕພ຺ໂພ.

໔໕໑. ສິກ຺ຂາປທປຣິໂຍສາເນ ປນ ອາປຕ຺ຕານາປຕ຺ຕິປຣິຈ຺ເຉທທສ຺ສນຕ຺ຖໍ ວຸຕ຺ເຕສຸ ຄມນໍ ປຏິຊານາຕີຕິອາທີສຸ ຄມນໍ ປຏິຊານາຕີຕິ ‘‘ຣໂຫນິສຊ຺ຊສ຺ສາທຕ຺ຖໍ ຄໂຕມ຺ຫີ’’ຕິ ເອວໍ ຄມນໍ ປຏິຊານາຕິ, ນິສຊ຺ຊນ຺ຕິ ນິສຊ຺ຊສ຺ສາເທເນວ ນິສຊ຺ຊໍ ປຏິຊານາຕິ. ອາປຕ຺ຕິນ຺ຕິ ຕີສຸ ອຎ຺ຎຕຣໍ ອາປຕ຺ຕິໍ. ອາປຕ຺ຕິຍາ ກາເຣຕພ຺ໂພຕິ ຕີສຸ ຍໍ ປຏິຊານາຕິ, ຕາຍ ກາເຣຕພ຺ໂພ. ເສສເມຕ຺ຖ ຈຕຸກ຺ເກ ອຸຕ຺ຕານາຘິປ຺ປາຍເມວ. ທຸຕິຍຈຕຸກ຺ເກ ປນ ຄມນໍ ນ ປຏິຊານາຕີຕິ ຣໂຫ ນິສຊ຺ຊສ຺ສາທວເສນ ນ ປຏິຊານາຕິ, ‘‘ສລາກຠຕ຺ຕາທິນາ ອຕ຺ຕໂນ ກມ຺ເມນ ຄໂຕມ຺ຫິ, ສາ ປນ ມຍ຺ຫໍ ນິສິນ຺ນຏ຺ຐານໍ ອາຄຕາ’’ຕິ ວທຕິ. ເສສເມຕ຺ຖາປິ ອຸຕ຺ຕານາຘິປ຺ປາຍເມວ.

ອຍໍ ປນ ສພ຺ພຕ຺ຖ ວິນິຈ຺ຉໂຍ – ຣໂຫ ນິສຊ຺ຊສ຺ສາໂທຕິ ເມຖຸນຘມ຺ມສນ຺ນິສ຺ສິຕກິເລໂສ ວຸຈ຺ຈຕິ. ໂຍ ຠິກ຺ຂຸ ເຕນສ຺ສາເທນ ມາຕຸຄາມສ຺ສ ສນ຺ຕິກໍ ຄນ຺ຕຸກາໂມ ອກ຺ຂິໍ ອຎ຺ເຊຕິ, ທຸກ຺ກຏໍ. ນິວາສນໍ ນິວາເສຕິ, ກາຍພນ຺ຘນໍ ພນ຺ຘຕິ, ຈີວຣໍ ປາຣຸປຕິ, ສພ຺ພຕ຺ຖ ປໂຍເຄ ປໂຍເຄ ທຸກ຺ກຏໍ. ຄຈ຺ຉຕິ, ປທວາເຣ ປທວາເຣ ທຸກ຺ກຏໍ. ຄນ຺ຕ຺ວາ ນິສີທຕິ, ທຸກ຺ກຏເມວ. ມາຕຸຄາເມ ອາຄນ຺ຕ຺ວາ ນິສິນ຺ນມຕ຺ເຕ ປາຈິຕ຺ຕິຍໍ. ສເຈ ສາ ອິຕ຺ຖີ ເກນຈິ ກຣຓີເຍນ ອຸຏ຺ຐາຍຸຏ຺ຐາຍ ປຸນປ຺ປຸນໍ ນິສີທຕິ, ນິສຊ຺ຊາຍ ນິສຊ຺ຊາຍ ປາຈິຕ຺ຕິຍໍ. ຍໍ ສນ຺ຘາຍ ຄໂຕ, ສາ ນ ທິຏ຺ຐາ, ອຎ຺ຎາ ອາຄນ຺ຕ຺ວາ ນິສີທຕິ, ອສ຺ສາເທ ອຸປ຺ປນ຺ເນ ປາຈິຕ຺ຕິຍໍ. ມຫາປຈ຺ຈຣິຍໍ ປນ ‘‘ຄມນກາລໂຕ ປຏ຺ຐາຍ ອສຸທ຺ຘຈິຕ຺ຕຕ຺ຕາ ອາປຕ຺ຕິເຍວາ’’ຕິ ວຸຕ຺ຕໍ. ສເຈ ສມ຺ພຫຸລາ ອາຄຈ຺ຉນ຺ຕິ, ມາຕຸຄາມຄຓນາຍ ປາຈິຕ຺ຕິຍານິ. ສເຈ ອຸຏ຺ຐາຍຸຏ຺ຐາຍ ປຸນປ຺ປຸນໍ ນິສີທນ຺ຕິ, ນິສຊ຺ຊາຄຓນາຍ ປາຈິຕ຺ຕິຍານິ. ອນິຍເມຕ຺ວາ ທິຏ຺ຐທິຏ຺ຐາຍ ສທ຺ຘິໍ ຣຫສ຺ສາທໍ ກປ຺ເປສ຺ສາມີຕິ ຄນ຺ຕ຺ວາ ນິສິນ຺ນສ຺ສາປິ ອາຄຕາຄຕານໍ ວເສນ ປຸນປ຺ປຸນໍ ນິສຊ຺ຊາວເສນ ຈ ວຸຕ຺ຕນເຍເນວ ອາປຕ຺ຕິໂຍ ເວທິຕພ຺ພາ. ສເຈ ສຸທ຺ຘຈິຕ຺ເຕນ ຄນ຺ຕ຺ວາ ນິສິນ຺ນສ຺ສ ສນ຺ຕິກໍ ອາຄນ຺ຕ຺ວາ ນິສິນ຺ນາຍ ອິຕ຺ຖິຍາ ຣຫສ຺ສາໂທ ອຸປ຺ປຊ຺ຊຕິ ອນາປຕ຺ຕິ.

ສມຸຏ຺ຐານາທີນິ ປຐມປາຣາຊິກສທິສາເນວາຕິ.

ປຐມອນິຍຕສິກ຺ຂາປທວຓ຺ຓນາ ນິຏ຺ຐິຕາ.

໒. ທຸຕິຍອນິຍຕສິກ຺ຂາປທວຓ຺ຓນາ

໔໕໒. ເຕນ ສມເຍນ ພຸທ຺ໂຘ ຠຄວາຕິ ທຸຕິຍອນິຍຕສິກ຺ຂາປທໍ. ຕຕ຺ຖ ຠຄວຕາ ປຏິກ຺ຂິຕ຺ຕນ຺ຕິອາທິມ຺ຫິ ‘‘ຍໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປຍ຺ຍ, ຕໍ ນິສຊ຺ຊໍ ກປ຺ເປຕຸໍ ປຏິກ຺ຂິຕ຺ຕ’’ນ຺ຕິ ເອວໍ ສມ຺ພນ຺ໂຘ ເວທິຕພ຺ໂພ. ອິຕຣຖາ ຫິ ‘‘ເອກສ຺ສ ເອກາຍາ’’ຕິ ວຕ຺ຕພ຺ພໍ ສິຍາ, ກສ຺ມາ? ‘‘ປຏິກ຺ຂິຕ຺ຕ’’ນ຺ຕິ ວຸຕ຺ຕຕ຺ຕາ. ສາມິອຕ຺ເຖ ວາ ເອຕໍ ປຈ຺ຈຕ຺ຕວຈນໍ ເວທິຕພ຺ພໍ.

໔໕໓. ນ ເຫວ ໂຂ ປນ ປຏິຈ຺ຉນ຺ນນ຺ຕິ ເອຕ຺ຖ ປນ ຍມ຺ປິ ພຫິ ປຣິກ຺ຂິຕ຺ຕໍ ອນ຺ໂຕ ວິວຏໍ ປຣິເວຓງ຺ຄຓາທິ, ຕມ຺ປິ ອນ຺ໂຕຄຘນ຺ຕິ ເວທິຕພ຺ພໍ. ເອວຣູປຎ຺ຫິ ຐານໍ ອປ຺ປຏິຈ຺ຉນ຺ເນເຍວ ຄຫິຕນ຺ຕິ ມຫາປຈ຺ຈຣິຍໍ ວຸຕ຺ຕໍ. ເສສໍ ປຐມສິກ຺ຂາປທນເຍເນວ ເວທິຕພ຺ພໍ. ເກວລຎ຺ຫິ ອິຘ ອິຕ຺ຖີປິ ປຸຣິໂສປິ ໂຍ ໂກຈິ ວິຎ຺ຎູ ອນນ຺ໂຘ ອພຘິໂຣ ອນ຺ໂຕທ຺ວາທສຫຕ຺ເຖ ໂອກາເສ ຐິໂຕ ວາ ນິສິນ຺ໂນ ວາ ວິກ຺ຂິຕ຺ໂຕປິ ນິທ຺ທາຍນ຺ໂຕປິ ອນາປຕ຺ຕິໍ ກໂຣຕິ. ພຘິໂຣ ປນ ຈກ຺ຂຸມາປິ ອນ຺ໂຘ ວາ ອພຘິໂຣປິ ນ ກໂຣຕິ. ປາຣາຊິກາປຕ຺ຕິຎ຺ຈ ປຣິຫາເປຕ຺ວາ ທຸຏ຺ຐຸລ຺ລວາຈາປຕ຺ຕິ ວຸຕ຺ຕາຕິ ອຍໍ ວິເສໂສ. ເສສໍ ປຸຣິມສທິສເມວ. ອຸຠຍຕ຺ຖາປິ ອຸມ຺ມຕ຺ຕກອາທິກມ຺ມິການໍ ອນາປຕ຺ຕິ.

ສມຸຏ຺ຐານາທີສຸ ອິທໍສິກ຺ຂາປທໍ ຕິສມຸຏ຺ຐານໍ – ກາຍຈິຕ຺ຕໂຕ, ວາຈາຈິຕ຺ຕໂຕ, ກາຍວາຈາຈິຕ຺ຕໂຕ ຈ ສມຸຏ຺ຐາຕິ. ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ສຸຂມຊ຺ຌຕ຺ຕເວທນາຫິ ທ຺ວິເວທນໍ. ເສສໍ ອຸຕ຺ຕານຕ຺ຖເມວາຕິ.

ທຸຕິຍອນິຍຕສິກ຺ຂາປທວຓ຺ຓນາ ນິຏ຺ຐິຕາ.

ສມນ຺ຕປາສາທິກາຍ ວິນຍສໍວຓ຺ຓນາຍ

ອນິຍຕວຓ຺ຓນາ ນິຏ຺ຐິຕາ.