ອາປຕ຺ຕານາປຕ຺ຕິວາຣວຓ຺ຓນາ

໖໖. ອິທານິ ຍໍ ວຸຕ຺ຕໍ ‘‘ມນຸສ຺ສິຕ຺ຖິຍາ ຕໂຍ ມຄ຺ເຄ ເມຖຸນໍ ຘມ຺ມໍ ປຏິເສວນ຺ຕສ຺ສາ’’ຕິອາທິ, ເອຕ຺ຖ ອສມ຺ໂມຫຕ຺ຖໍ ‘‘ມຄ຺ເຄນ ມຄ຺ຄ’’ນ຺ຕິອາທິມາຫ. ຕຕ຺ຖ ມຄ຺ເຄນ ມຄ຺ຄນ຺ຕິ ອິຕ຺ຖິຍາ ຕີສຸ ມຄ຺ເຄສຸ ອຎ຺ຎຕເຣນ ມຄ຺ເຄນ ອຕ຺ຕໂນ ອງ຺ຄຊາຕໍ ປເວເສຕິ ອຖ ວາ ສມ຺ຠິນ຺ເນສຸ ທ຺ວີສຸ ມຄ຺ເຄສຸ ປສ຺ສາວມຄ຺ເຄນ ວຈ຺ຈມຄ຺ຄໍ ວຈ຺ຈມຄ຺ເຄນ ວາ ປສ຺ສາວມຄ຺ຄໍ ປເວເສຕິ. ມຄ຺ເຄນ ອມຄ຺ຄນ຺ຕິ ປສ຺ສາວາທິມຄ຺ເຄນ ປເວເສຕ຺ວາ ຕສ຺ສ ສາມນ຺ຕາ ວເຓນ ນີຫຣຕິ. ອມຄ຺ເຄນ ມຄ຺ຄນ຺ຕິ ມຄ຺ຄສາມນ຺ເຕນ ວເຓນ ປເວເສຕ຺ວາ ມຄ຺ເຄນ ນີຫຣຕິ. ອມຄ຺ເຄນ ອມຄ຺ຄນ຺ຕິ ທ຺ວີສຸ ສມ຺ຠິນ຺ນວເຓສຸ ເອເກນ ວເຓນ ປເວເສຕ຺ວາ ທຸຕິເຍນ ນີຫຣຕິ. ອິມສ຺ສ ສຸຕ຺ຕສ຺ສ ອນຸໂລມວເສນ ສພ຺ພຕ຺ຖ ວຓສງ຺ເຂເປ ຖຸລ຺ລຈ຺ຈຍໍ ເວທິຕພ຺ພໍ.

ອິທານິ ຍໍ ປຣໂຕ ວກ຺ຂຕິ ‘‘ອນາປຕ຺ຕິ ອຊານນ຺ຕສ຺ສ ອສາທິຍນ຺ຕສ຺ສາ’’ຕິ, ຕຕ຺ຖ ອສມ຺ໂມຫຕ຺ຖໍ ‘‘ຠິກ຺ຂຸ ສຸຕ຺ຕຠິກ຺ຂຸມ຺ຫີ’’ຕິອາທິມາຫ. ຕຕ຺ຣາຍໍ ອຘິປ຺ປາໂຍ – ໂຍ ປຏິພຸທ຺ໂຘ ສາທິຍຕິ ໂສ ‘‘ສຸຕ຺ຕມ຺ຫິ ມຍິ ເອໂສ ວິປ຺ປຏິປຊ຺ຊິ, ນາຫໍ ຊານາມີ’’ຕິ ນ ມຸຈ຺ຈຕິ. ອຸໂຠ ນາເສຕພ຺ພາຕິ ເຈຕ຺ຖ ທ຺ເວປິ ລິງ຺ຄນາສເນນ ນາເສຕພ຺ພາ. ຕຕ຺ຣ ທູສກສ຺ສ ປຏິຎ຺ຎາກຣຓໍ ນຕ຺ຖິ, ທູສິໂຕ ປຸຈ຺ຉິຕ຺ວາ ປຏິຎ຺ຎາຍ ນາເສຕພ຺ໂພ. ສເຈ ນ ສາທິຍຕິ, ນ ນາເສຕພ຺ໂພ. ເອສ ນໂຍ ສາມເຓຣວາເຣປິ.

ເອວໍ ຕຕ຺ຖ ຕຕ຺ຖ ຕໍ ຕໍ ອາປຕ຺ຕິຎ຺ຈ ອນາປຕ຺ຕິຎ຺ຈ ທສ຺ເສຕ຺ວາ ອິທານິ ອນາປຕ຺ຕິເມວ ທສ຺ເສນ຺ໂຕ ‘‘ອນາປຕ຺ຕິ ອຊານນ຺ຕສ຺ສາ’’ຕິອາທິມາຫ. ຕຕ຺ຖ ອຊານນ຺ໂຕ ນາມ ໂຍ ມຫານິທ຺ທໍ ໂອກ຺ກນ຺ໂຕ ປເຣນ ກຕໍ ອຸປກ຺ກມມ຺ປິ ນ ຊານາຕິ ເວສາລິຍໍ ມຫາວເນ ທິວາວິຫາຣຄໂຕ ຠິກ຺ຂຸ ວິຍ. ເອວຣູປສ຺ສ ອນາປຕ຺ຕິ. ວຸຕ຺ຕມ຺ປິ ເຈຕໍ – ‘‘‘ນາຫໍ ຠຄວາ ຊານາມີ’ຕິ; ‘ອນາປຕ຺ຕິ, ຠິກ຺ຂຸ, ອຊານນ຺ຕສ຺ສາ’’’ຕິ (ປາຣາ. ໗໕). ອສາທິຍນ຺ໂຕ ນາມ ໂຍ ຊານິຕ຺ວາປິ ນ ສາທິຍຕິ, ຕຕ຺ເຖວ ສຫສາ ວຸຏ຺ຐິຕຠິກ຺ຂຸ ວິຍ. ວຸຕ຺ຕມ຺ປິ ເຈຕໍ – ‘‘‘ນາຫໍ ຠຄວາ ສາທິຍິ’ນ຺ຕິ. ‘ອນາປຕ຺ຕິ, ຠິກ຺ຂຸ, ອສາທິຍນ຺ຕສ຺ສາ’’ຕິ.

ອຸມ຺ມຕ຺ຕໂກ ນາມ ປິຕ຺ຕຸມ຺ມຕ຺ຕໂກ. ທຸວິຘຎ຺ຫິ ປິຕ຺ຕໍ – ພທ຺ຘປິຕ຺ຕໍ, ອພທ຺ຘປິຕ຺ຕຎ຺ຈາຕິ. ຕຕ຺ຖ ອພທ຺ຘປິຕ຺ຕໍ ໂລຫິຕໍ ວິຍ ສພ຺ພງ຺ຄຄຕໍ, ຕມ຺ຫິ ກຸປິເຕ ສຕ຺ຕານໍ ກຓ຺ຑຸກຈ຺ຉຸສຣີຣກມ຺ປາທີນິ ໂຫນ຺ຕິ. ຕານິ ເຠສຊ຺ຊກິຣິຍາຍ ວູປສມນ຺ຕິ. ພທ຺ຘປິຕ຺ຕໍ ປນ ປິຕ຺ຕໂກສເກ ຐິຕໍ. ຕມ຺ຫິ ກຸປິເຕ ສຕ຺ຕາ ອຸມ຺ມຕ຺ຕກາ ໂຫນ຺ຕິ ວິປລ຺ລຕ຺ຖສຎ຺ຎາ ຫິໂຣຕ຺ຕປ຺ປໍ ຉຑ຺ເຑຕ຺ວາ ອສາຣຸປ຺ປາຈາຣໍ ຈຣນ຺ຕິ. ລຫຸກຄຣຸການິ ສິກ຺ຂາປທານິ ມທ຺ທນ຺ຕາປິ ນ ຊານນ຺ຕິ. ເຠສຊ຺ຊກິຣິຍາຍປິ ອເຕກິຈ຺ຉາ ໂຫນ຺ຕິ. ເອວຣູປສ຺ສ ອຸມ຺ມຕ຺ຕກສ຺ສ ອນາປຕ຺ຕິ.

ຂິຕ຺ຕຈິຕ຺ໂຕ ນາມ ວິສ຺ສຏ຺ຐຈິຕ຺ໂຕ ຍກ຺ຂຸມ຺ມຕ຺ຕໂກ ວຸຈ຺ຈຕິ. ຍກ຺ຂາ ກິຣ ເຠຣວານິ ວາ ອາຣມ຺ມຓານິ ທສ຺ເສຕ຺ວາ ມຸເຂນ ຫຕ຺ຖໍ ປເວເສຕ຺ວາ ຫທຍຣູປໍ ວາ ມທ຺ທນ຺ຕາ ສຕ຺ເຕ ວິກ຺ຂິຕ຺ຕຈິຕ຺ເຕ ວິປລ຺ລຕ຺ຖສຎ຺ເຎ ກໂຣນ຺ຕິ. ເອວຣູປສ຺ສ ຂິຕ຺ຕຈິຕ຺ຕສ຺ສ ອນາປຕ຺ຕິ. ເຕສໍ ປນ ອຸຠິນ຺ນໍ ອຍໍ ວິເສໂສ – ປິຕ຺ຕຸມ຺ມຕ຺ຕໂກ ນິຈ຺ຈເມວ ອຸມ຺ມຕ຺ຕໂກ ໂຫຕິ, ປກຕິສຎ຺ຎໍ ນ ລຠຕິ. ຍກ຺ຂຸມ຺ມຕ຺ຕໂກ ອນ຺ຕຣນ຺ຕຣາ ປກຕິສຎ຺ຎໍ ປຏິລຠຕີຕິ. ອິຘ ປນ ປິຕ຺ຕຸມ຺ມຕ຺ຕໂກ ວາ ໂຫຕຸ ຍກ຺ຂຸມ຺ມຕ຺ຕໂກ ວາ, ໂຍ ສພ຺ພໂສ ມຸຏ຺ຐສ຺ສຕິ ກິຎ຺ຈິ ນ ຊານາຕິ, ອຄ຺ຄິມ຺ປິ ສຸວຓ຺ຓມ຺ປິ ຄູຖມ຺ປິ ຈນ຺ທນມ຺ປິ ເອກສທິສໍ ມທ຺ທນ຺ໂຕວ ວິຈຣຕິ, ເອວຣູປສ຺ສ ອນາປຕ຺ຕິ. ອນ຺ຕຣນ຺ຕຣາ ສຎ຺ຎໍ ປຏິລຠິຕ຺ວາ ຎຕ຺ວາ ກໂຣນ຺ຕສ຺ສ ປນ ອາປຕ຺ຕິເຍວ.

ເວທນາຏ຺ໂຏ ນາມ ໂຍ ອຘິມຕ຺ຕາຍ ທຸກ຺ຂເວທນາຍ ອາຕຸໂຣ ກິຎ຺ຈິ ນ ຊານາຕິ, ເອວຣູປສ຺ສ ອນາປຕ຺ຕິ.

ອາທິກມ຺ມິໂກ ນາມ ໂຍ ຕສ຺ມິໍ ຕສ຺ມິໍ ກມ຺ເມ ອາທິຠູໂຕ. ອິຘ ປນ ສຸທິນ຺ນຕ຺ເຖໂຣ ອາທິກມ຺ມິໂກ, ຕສ຺ສ ອນາປຕ຺ຕິ. ອວເສສານໍ ມກ຺ກຏີສມຓວຊ຺ຊິປຸຕ຺ຕກາທີນໍ ອາປຕ຺ຕິເຍວາຕິ.

ປທຠາຊນີຍວຓ຺ຓນາ ນິຏ຺ຐິຕາ.