໔. ປຫາຣສິກ຺ຂາປທວຓ຺ຓນາ

໔໔໙. ຈຕຸຕ຺ເຖ – ປຫາຣໍ ເທນ຺ຕີຕິ ‘‘ອາວຸໂສ ປີຐກໍ ປຎ຺ຎເປຖ, ປາທໂຘວນໍ ອາຫຣຖາ’’ຕິອາທີນິ ວຕ຺ວາ ຕຖາ ອກໂຣນ຺ຕານໍ ປຫາຣໍ ເທນ຺ຕິ.

໔໕໑. ປຫາຣໍ ເທຕິ ອາປຕ຺ຕິ ປາຈິຕ຺ຕິຍສ຺ສາຕິ ເອຕ຺ຖ ປຫຣິຕຸກາມຕາຍ ປຫາເຣ ທິນ຺ເນ ສເຈປິ ມຣຕິ ປາຈິຕ຺ຕິຍເມວ. ປຫາເຣນ ຫຕ຺ໂຖ ວາ ປາໂທ ວາ ຠິຊ຺ຊຕິ, ສີສໍ ວາ ຠິນ຺ນໍ ໂຫຕິ, ປາຈິຕ຺ຕິຍເມວ. ‘‘ຍຖາຍໍ ສງ຺ຆມຊ຺ເຌ ນ ວິໂຣຈຕິ, ຕຖາ ນໍ ກໂຣມີ’’ຕິ ເອວໍ ວິຣູປກຣຓາຘິປ຺ປາເຍນ ກຓ຺ຓໍ ວາ ນາສໍ ວາ ຉິນ຺ທຕິ, ທຸກ຺ກຏໍ.

໔໕໒. ອນຸປສມ຺ປນ຺ນສ຺ສາຕິ ຄຫຏ຺ຐສ຺ສ ວາ ປພ຺ພຊິຕສ຺ສ ວາ ອິຕ຺ຖິຍາ ວາ ປຸຣິສສ຺ສ ວາ ອນ຺ຕມໂສ ຕິຣຈ຺ຉານຄຕສ຺ສາປິ ປຫາຣໍ ເທຕິ, ທຸກ຺ກຏໍ. ສເຈ ປນ ຣຕ຺ຕຈິຕ຺ໂຕ ອິຕ຺ຖິໍ ປຫຣຕິ, ສງ຺ຆາທິເສໂສ.

໔໕໓. ເກນຈິ ວິເຫຐິຍມາໂນຕິ ມນຸສ຺ເສນ ວາ ຕິຣຈ຺ຉານຄເຕນ ວາ ວິເຫຐິຍມາໂນ. ໂມກ຺ຂາຘິປ຺ປາໂຍຕິ ຕໂຕ ອຕ຺ຕໂນ ໂມກ຺ຂໍ ປຕ຺ຖຍມາໂນ. ປຫາຣໍ ເທຕີຕິ ກາຍກາຍປຏິພທ຺ຘນິສ຺ສຄ຺ຄິຍານໍ ອຎ຺ຎຕເຣນ ປຫາຣໍ ເທຕິ, ອນາປຕ຺ຕິ. ສເຈປິ ອນ຺ຕຣາມຄ຺ເຄ ໂຈຣໍ ວາ ປຈ຺ຈຕ຺ຖິກໍ ວາ ວິເຫເຐຕຸກາມໍ ທິສ຺ວາ ‘‘ອຸປາສກ, ເອຕ຺ເຖວ ຕິຏ຺ຐ, ມາ ອາຄມີ’’ຕິ ວຕ຺ວາ ວຈນໍ ອນາທິຍິຕ຺ວາ ອາຄຈ຺ຉນ຺ຕໍ ‘‘ຄຈ຺ຉ ເຣ’’ຕິ ມຸຄ຺ຄເຣນ ວາ ສຕ຺ຖເກນ ວາ ປຫຣິຕ຺ວາ ຍາຕິ, ໂສ ເຈ ເຕນ ປຫາເຣນ ມຣຕິ, ອນາປຕ຺ຕິເຍວ. ວາຬມິເຄສຸປິ ເອເສວ ນໂຍ. ເສສເມຕ຺ຖ ອຸຕ຺ຕານເມວ. ສມຸຏ຺ຐານາທີນິ ປນສ຺ສ ປຐມປາຣາຊິກສທິສານິ, ອິທໍ ປນ ທຸກ຺ຂເວທນນ຺ຕິ.

ປຫາຣສິກ຺ຂາປທໍ ຈຕຸຕ຺ຖໍ.