໒. ອໂຍຄຸຬສຸຕ຺ຕວຓ຺ຓນາ

໘໓໔. ຕຕິຍວຄ຺ຄສ຺ສ ທຸຕິເຍ ອິມິນາ ຈາຕຸມຫາຠູຕິເກນາຕິ ອິມິນາ ຈຕຸມຫາຠູຕມເຍນ ເອວໍ ຠາຣິເກນ ຄຣຸເກນ ສມາເນນາປິ. ໂອມາຕີຕິ ປໂຫຕິ ສກ຺ໂກຕິ, ອິທໍ ເຕປິຏເກ ພຸທ຺ຘວຈເນ ອສມ຺ຠິນ຺ນປທໍ. ກາຍມ຺ປິ ຈິຕ຺ເຕ ສໂມທຫຕີຕິ ກາຍໍ ຄເຫຕ຺ວາ ຈິຕ຺ເຕ ອາໂຣເປຕິ, ຈິຕ຺ຕສນ຺ນິສ຺ສິຕໍ ກໂຣຕິ, ຈິຕ຺ຕຄຕິຍາ ເປເສຕິ. ຈິຕ຺ຕໍ ນາມ ມຫຄ຺ຄຕຈິຕ຺ຕໍ, ຈິຕ຺ຕຄຕິຄມນໍ ລຫຸກໍ ໂຫຕິ. ຈິຕ຺ຕມ຺ປິ ກາເຍ ສໂມທຫຕີຕິ ຈິຕ຺ຕໍ ຄເຫຕ຺ວາ ກາເຍ ອາໂຣເປຕິ, ກາຍສນ຺ນິສ຺ສິຕໍ ກໂຣຕິ, ກາຍຄຕິຍາ ເປເສຕິ, ກາໂຍ ນາມ ກຣຊກາໂຍ, ກາຍຄຕິຄມນໍ ທນ຺ຘໍ ໂຫຕິ. ສຸຂສຎ຺ຎຎ຺ຈ ລຫຸສຎ຺ຎຎ຺ຈາຕິ ອຠິຎ຺ຎາຈິຕ຺ຕສຫຊາຕສຎ຺ຎາ. ສາ ຫິ ສນ຺ຕສຸຂສມນ຺ນາຄຕຕ຺ຕາ ສຸຂສຎ຺ຎາ ນາມ ໂຫຕິ, ກິເລສທນ຺ຘາຍິຕຕ຺ຕສ຺ສ ຈ ອຠາວາ ລຫຸສຎ຺ຎາ ນາມ.

ອໂຍຄຸໂຬ ທິວສໍ ສນ຺ຕຕ຺ໂຕ ລຫຸຕໂຣ ເຈວ ໂຫຕີຕິ ໂສ ຫິ ທ຺ວີຫິ ຕີຫິ ຊເນຫິ ອຸກ຺ຂິປິຕ຺ວາ ກມ຺ມາຣຸທ຺ຘເນ ປກ຺ຂິຕ຺ໂຕປິ ທິວສໍ ປຈ຺ຈມາໂນ ວິວຣານຸປວິຏ຺ເຐນ ເຕເຊນ ເຈວ ວາເຍນ ຈ ວາໂຍສຫຄໂຕ ຈ ອຸສ຺ມາສຫຄໂຕ ຈ ເຕໂຊສຫຄໂຕ ຈ ຫຸຕ຺ວາ ເອວໍ ລຫຸໂກ ໂຫຕິ, ຍຖາ ນໍ ກມ຺ມາໂຣ ມຫາສຓ຺ຑາເສນ ຄເຫຕ຺ວາ ເອກໂຕ ປຣິວຕ຺ເຕຕິ ອຸກ຺ຂິປຕິ ພຫິ ນີຫຣຕິ. ເອວໍ ປນ ມຸທຸ ຈ ໂຫຕິ ກມ຺ມນິໂຍ ຈ. ຍຖາ ນໍ ໂສ ຂຓ຺ຑໍ ຂຓ຺ຑໍ ວິຈ຺ຉິນ຺ທຕິ, ກູເຏນ ຫນນ຺ໂຕ ທີຆຈຕຸຣສ຺ສາທິເຠທໍ ກໂຣຕິ. ອິມສ຺ມິໍ ສຸຕ຺ເຕ ວິກຸພ຺ພນິທ຺ຘິ ກຖິຕາ.