໑. ຊຣາຘມ຺ມສຸຕ຺ຕວຓ຺ຓນາ

໕໑໑. ປຎ຺ຈມວຄ຺ຄສ຺ສ ປຐເມ ປຈ຺ຉາຕເປຕິ ປາສາທຈ຺ຉາຍາຍ ປຸຣຕ຺ຖິມທິສໍ ປຏິຈ຺ຉນ຺ນຕ຺ຕາ ປາສາທສ຺ສ ປຈ຺ຉິມທິສາຠາເຄ ອາຕໂປ ໂຫຕິ, ຕສ຺ມິໍ ຐາເນ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນຕິ ອຕ຺ໂຖ. ປິຏ຺ຐິໍ ໂອຕາປຍມາໂນຕິ ຍສ຺ມາ ສມ຺ມາສມ຺ພຸທ຺ຘສ຺ສປິ ອຸປາທິນ຺ນກສຣີເຣ ອຸຓ຺ຫກາເລ ອຸຓ຺ຫໍ ໂຫຕິ, ສີຕກາເລ ສີຕໍ, ອຍຎ຺ຈ ຫິມປາຕສີຕສມໂຍ. ຕສ຺ມາ ມຫາຈີວຣໍ ໂອຕາເຣຕ຺ວາ ສູຣິຍຣສ຺ມີຫິ ປິຏ຺ຐິໍ ໂອຕາປຍມາໂນ ນິສີທິ.

ກິໍ ປນ ພຸທ຺ຘຣສ຺ມິໂຍ ມທ຺ທິຕ຺ວາ ສູຣິຍຣສ຺ມິ ອນ຺ໂຕ ປວິສິຕຸໍ ສກ຺ໂກຕີຕິ? ນ ສກ຺ໂກຕິ. ເອວໍ ສນ຺ເຕ ກິໍ ຕາເປຕີຕິ? ຣສ຺ມິເຕຊໍ. ຍເຖວ ຫິ ຐິຕມຊ຺ຌນ຺ຫິເກ ປຣິມຓ຺ຑລາຍ ຉາຍາຍ ຣຸກ຺ຂມູເລ ນິສິນ຺ນສ຺ສ ກິຎ຺ຈາປິ ສູຣິຍຣສ຺ມິໂຍ ສຣີຣໍ ນ ຜຸສນ຺ຕິ, ສພ຺ພທິສາສຸ ປນ ເຕໂຊ ຜຣຕິ, ອຄ຺ຄິຊາລາຫິ ປຣິກ຺ຂິຕ຺ໂຕ ວິຍ ໂຫຕິ, ເອວໍ ສູຣິຍຣສ຺ມີສຸ ພຸທ຺ຘຣສ຺ມິໂຍ ມທ຺ທິຕ຺ວາ ອນ຺ໂຕ ປວິສິຕຸໍ ອສກ຺ກຸຓນ຺ຕີສຸປິ ສຕ຺ຖາ ເຕຊໍ ຕາເປນ຺ໂຕ ນິສິນ຺ໂນຕິ ເວທິຕພ຺ໂພ.

ອໂນມຊ຺ຊນ຺ໂຕຕິ ປິຏ຺ຐິປຣິກມ຺ມກຣຓວເສນ ອນຸມຊ຺ຊນ຺ໂຕ. ອຈ຺ຉຣິຍໍ ຠນ຺ເຕຕິ ເຖໂຣ ຠຄວໂຕ ປິຏ຺ຐິໂຕ ມຫາຈີວຣໍ ໂອຕາເຣຕ຺ວາ ນິສິນ຺ນສ຺ສ ທ຺ວິນ຺ນໍ ອໍສກູຏານໍ ອນ຺ຕເຣ ສຸວຓ຺ຓາວຏ຺ຏໍ ວິຍ ເກສຄ຺ຄປ຺ປມາຓໍ ວລິຍາວຏ຺ຏໍ ທິສ຺ວາ – ‘‘ເອວຣູເປປິ ນາມ ສຣີເຣ ຊຣາ ປຎ຺ຎາຍຕີ’’ຕິ ສຎ຺ຊາຕສໍເວໂຄ ຊຣໍ ຄຣຫນ຺ໂຕ ເອວມາຫ. ຄຣຫນຈ຺ຉຣິຍໍ ນາມ ກິເຣຕໍ.

ນ ເຈວໍ ທານິ, ຠນ຺ເຕ, ຠຄວໂຕ ຕາວ ປຣິສຸທ຺ໂຘຕິ ຍຖາ ປກຕິຍາ ຉວິວຓ຺ໂຓ ປຣິສຸທ຺ໂຘ, ນ ເອວເມຕຣຫີຕິ ທີເປນ຺ໂຕ ເອວມາຫ. ຕຖາຄຕສ຺ສ ຫິ ທຫຣກາເລ ສງ຺ກຸສຕສມພ຺ຠາຫຕໍ ອຸສຠຈມ຺ມໍ ວິຍ ວິຫຕວລິໂກ ກາໂຍ ໂຫຕິ, ຕສ຺ມິໍ ຐປິໂຕ ຫຕ຺ໂຖ ຠສ຺ສເຕວ, ນ ສນ຺ຕິຏ຺ຐຕິ, ເຕລປຸຎ຺ຉນາກາຣປ຺ປຕ຺ໂຕ ວິຍ ໂຫຕິ. ມຫລ຺ລກກາເລ ປນ ສິຣາຊາລາ ມິລາຍນ຺ຕິ, ສນ຺ຘິປພ຺ພານິ ສິຖິລານິ ໂຫນ຺ຕິ, ມໍສໍ ອຏ຺ຐິໂຕ ມຸຈ຺ຈິຕ຺ວາ ສິຖິລຠາວໍ ອາປຊ຺ຊິຕ຺ວາ ຕຕ຺ຖ ຕຕ຺ຖ ໂອລມ຺ພຕິ. ພຸທ຺ຘານໍ ປນ ເອວຣູປໍ ນ ໂຫຕິ. ອຎ຺ເຎສໍ ອປາກຏໍ, ສນ຺ຕິກາວຈຣຕ຺ຕາ ອານນ຺ທຕ຺ເຖຣສ຺ເສວ ປາກຏໍ ໂຫຕິ, ຕສ຺ມາ ເອວມາຫ.

ສິຖິລານິ ຈ ຄຕ຺ຕານີຕິ ອຎ຺ເຎສໍ ມຸເຂ ອໍສກູຏນ຺ຕເຣຫິ ເຕສຸ ເຕສຸ ຐາເນສຸ ວລິໂຍ ສນ຺ຕິຏ຺ຐນ຺ຕິ, ສຕ຺ຖຸ ປເນຕໍ ນຕ຺ຖິ, ເຖໂຣ ຈ ທ຺ວິນ຺ນໍ ອໍສກູຏານໍ ອນ຺ຕເຣ ວລິຍາວຏ຺ຏກໍ ທິສ຺ວາ ເອວມາຫ. ສພ຺ພານິ ວລິຍຊາຕານີຕິ ອິທມ຺ປິ ອຕ຺ຕໂນ ປາກຏວເສນ ເອວມາຫ – ສຕ຺ຖຸ ປນ ອຎ຺ເຎສໍ ວິຍ ວລິໂຍ ນາມ ນຕ຺ຖິ. ປຸຣໂຕ ປພ຺ຠາໂຣ ຈ ກາໂຍຕິ ສຕ຺ຖາ ພ຺ຣຫ຺ມຸຊຸຄຕ຺ໂຕ, ເທວນຄເຣ ສມຸສ຺ສິຕສຸວຓ຺ຓໂຕຣຓໍ ວິຍສ຺ສ ກາໂຍ ອຸຊຸກເມວ ອຸຄ຺ຄໂຕ. ມຫລ຺ລກກາເລ ປນ ກາໂຍ ປຸຣໂຕ ວງ຺ໂກ ໂຫຕິ, ສ຺ວາຍໍ ອຎ຺ເຎສໍ ອປາກໂຏ, ສນ຺ຕິກາວຈຣຕ຺ຕາ ປນ ເຖຣສ຺ເສວ ປາກໂຏ, ຕສ຺ມາ ເອວມາຫ. ທິສ຺ສຕິ ຈ ອິນ຺ທ຺ຣິຍານໍ ອຎ຺ຎຖຕ຺ຕນ຺ຕິ ອິນ຺ທ຺ຣິຍານິ ນາມ ນ ຈກ຺ຂຸວິຎ຺ເຎຍ຺ຍານິ. ຍໂຕ ປນ ປກຕິຍາ ປຣິສຸທ຺ໂຘ ຉວິວຓ຺ໂຓ, ອິທານິ ນ ຕຖາ ປຣິສຸທ຺ໂຘ, ອໍສກູຏນ຺ຕເຣ ວລິ ປຎ຺ຎາຍຕິ, ພ຺ຣຫ຺ມຸຊຸກາໂຍ ປຸຣໂຕ ວງ຺ໂກ, ອິມິນາວ ກາຣເຓນ ຈກ຺ຂາທີນຎ຺ຈ ອິນ຺ທ຺ຣິຍານໍ ອຎ຺ຎຖຕ຺ເຕນ ຠວິຕພ຺ພນ຺ຕິ ນຍຄ຺ຄາຫໂຕ ເອວມາຫ. ຘີ ຕໍ ຊມ຺ມິ ຊເຣ ອຕ຺ຖູຕິ ລາມເກ ຊເຣ ຘີ ຕໍ ຕຸຍ຺ຫໍ ໂຫຕຸ, ຘິກ຺ກາໂຣ ຕໍ ຜຸສຕຸ. ພິມ຺ພນ຺ຕິ ອຕ຺ຕຠາໂວ.